Bakı, 18 aprel, AZƏRTAC 

Fövqəladə Hallar Nazirliyinin (FHN) və Azərbaycan Milli Elmlər Akademiyasının (AMEA) birgə təşkilatçılığı ilə FHN-in Akademiyasında Azərbaycan Xalq Cümhuriyyətinin 100 illik yubileyinə həsr olunmuş “Azərbaycan Respublikası - Azərbaycan Xalq Cümhuriyyətinin varisidir” mövzusunda elmi-praktik konfrans keçirilib.

FHN-dən AZƏRTAC-a bildiriblər ki, tədbirdə fövqəladə hallar nazirinin müavinləri, tibb xidməti general-leytenantı Faiq Tağı-zadə və general-leytenant Etibar Mirzəyev, Azərbaycan Milli Elmlər Akademiyasının (AMEA) vitse-prezidenti, Milli Məclisin deputatı, akademik İsa Həbibbəyli, institut rəhbərləri, alimlər iştirak ediblər.

Konfrans iştirakçıları əvvəlcə Akademiyanın həyətində ümummilli lider Heydər Əliyevin xatirəsinə ucaldılmış abidənin önünə gül dəstələri qoyub, FHN Akademiyasında fəaliyyət göstərən Heydər Əliyev Mərkəzi və muzeyi ilə tanış olublar.

Konfrans Azərbaycanın dövlət himninin səsləndirilməsi ilə başlayıb.

Tədbiri açan fövqəladə hallar nazirinin müavini, general-leytenant Etibar Mirzəyev bildirib ki, bu tədbir ölkəmiz üçün çox əlamətdar dövrə təsadüf edir. Belə ki, aprelin 11-də Azərbaycanda prezident seçkiləri keçirilib və dövlətimizin başçısı İlham Əliyev seçicilərin mütləq əksəriyyətinin səs çoxluğunu qazanaraq növbəti dəfə Azərbaycan Respublikasının Prezidenti seçilib. Bu qələbənin Azərbaycan xalqının iradəsinin təzahürü olduğunu bildirən natiq konfrans iştirakçıları adından Prezident İlham Əliyevi təbrik edib, ona möhkəm cansağlığı, Azərbaycanın daha da çiçəklənməsi və tərəqqisi naminə fəaliyyətində uğurlar arzulayıb.

Etibar Mirzəyev qeyd edib ki, 1918-ci il mayın 28-də yaradılan Azərbaycan Xalq Cümhuriyyəti müsəlman Şərqində ilk demokratik respublika olmaqla tariximizin şanlı səhifələrindəndir. Ulu öndər Heydər Əliyev və Prezident İlham Əliyev hər zaman Azərbaycan Xalq Cümhuriyyətinin ölkəmizin dövlətçilik tarixində mühüm yerə malik olduğunu bildiriblər.

Nazir müavini deyib ki, Ümummilli Liderin Azərbaycan Xalq Cümhuriyyətinin 80 illiyinin keçirilməsi haqqında, eləcə də Prezident İlham Əliyevin Azərbaycan Xalq Cümhuriyyətinin 90 və 100 illik yubileylərinin keçirilməsinə dair sərəncamları, həmçinin 2018-ci ilin ölkəmizdə “Azərbaycan Xalq Cümhuriyyəti İli” elan edilməsi həmin tarixi fakta dövlət səviyyəsində göstərilən yüksək ehtiramın nümunəsidir. Fövqəladə Hallar Nazirliyinin Akademiyasında keçirilən bu konfransın da dövlətimizin başçısının müvafiq Sərəncamına uyğun keçirildiyini xatırladan E.Mirzəyev tədbirin gənc nəslin şərəfli tarixlərini mükəmməl öyrənməsində mühüm rol oynayacağına ümid etdiyini bildirib.

AMEA-nın vitse-prezidenti, akademik İsa Həbibbəyli çıxışında ulu öndər Heydər Əliyevin Azərbaycan Xalq Cümhuriyyətinin ənənələrinə daim sadiq qaldığını, bu ənənələrin Prezident İlham Əliyev tərəfindən layiqli şəkildə davam etdirildiyini vurğulayıb. O, Azərbaycan Xalq Cümhuriyyətinin və dövlət xadimlərinin tarixi irsinin akademik səviyyədə araşdırılması işinin ümummilli lider Heydər Əliyev tərəfindən başladıldığını və dövlətimizin başçısı İlham Əliyevin nəzarəti altında bu gün də davam etdirildiyini diqqətə çatdırıb.

Konfransda “Azərbaycan Xalq Cümhuriyyəti dövlətçilik tariximizin parlaq səhifəsidir” mövzusunda məruzə ilə çıxış edən AMEA-nın A.Bakıxanov adına Tarix İnstitutunun direktoru, Milli Məclisin deputatı, akademik Yaqub Mahmudov Azərbaycan Xalq Cümhuriyyəti tarixini xalqımızın şərəf səlnaməsi adlandıraraq, ilk demokratik respublikamızın yaradılmasından süqutuna qədər olan tarixi mərhələlər, Cümhuriyyətin qurucularının fəaliyyəti barədə ətraflı məlumat verib. Akademik gənc nəslin, eləcə də FHN-in Akademiyası kursantlarının Vətənimizin, o cümlədən Azərbaycan Xalq Cümhuriyyətinin tarixini mükəmməl öyrənmələrinin vacibliyini vurğulayıb. Qeyd edib ki, ilk demokratik respublikamızın tarixi ulu öndər Heydər Əliyevin hakimiyyətə qayıdışından sonra elmi səviyyədə və geniş miqyasda tədqiq olunub. Ümummilli Liderin şəxsi göstərişi ilə “Azərbaycan Xalq Cümhuriyyəti ensiklopediyası” mükəmməl şəkildə tərtib olunaraq nəşrə hazırlanıb.

Qeyd olunub ki, Ulu Öndərin layiqli davamçısı Prezident İlham Əliyev də Cümhuriyyət tarixinin araşdırılması işini xüsusi diqqət mərkəzində saxlayır. Dövlətimizin başçısının diqqəti nəticəsində bu istiqamətdə geniş elmi işlər görülüb. Son illər Azərbaycan Xalq Cümhuriyyəti ilə bağlı çoxsaylı monoqrafiyalar işlənib, müxtəlif ölkələrin arxivlərindən faktlar və sənədlər tapılaraq tədqiq olunub və nəşr edilib.

AMEA-nın Elm Tarixi İnstitutunun direktoru, tarix elmləri doktoru, professor Məryəm Seyidbəyli “Azərbaycanın təhsilində tarixi varislik”, Dilçilik İnstitutunun şöbə müdiri, filologiya elmləri doktoru, professor Sayalı Sadıqova “Azərbaycan Xalq Cümhuriyyəti dövründə dil məsələləri”, Nizami Gəncəvi adına Ədəbiyyat İnstitutunun şöbə müdiri, filologiya elmləri doktoru, professor Asif Rüstəmli “Azərbaycan Xalq Cümhuriyyəti dövründə mətbuat”, Milli Azərbaycan Tarixi Muzeyinin şöbə müdiri, tarix üzrə fəlsəfə doktoru Səbuhi Əhmədov “Azərbaycan Xalq Cümhuriyyəti dövründə dövlət rəmzləri və müasir dövr”, FHN-in Akademiyasının rəisi, general-mayor, texnika üzrə fəlsəfə doktoru, dosent Pənah Süleymanov “Azərbaycan Xalq Cümhuriyyətinin dövlətçilik tariximizdə yeri və əhəmiyyəti” mövzularında məruzələrlə çıxışlar ediblər.

Məruzələrdə bildirilib ki, Azərbaycan Xalq Cümhuriyyətinin yaradılması xalqımızın tarixinə şanlı hadisə kimi daxil olub. Müstəqil, azad, demokratik respublika qurmaq kimi qarşısına şərəfli məqsəd qoyan Azərbaycan Xalq Cümhuriyyəti cəmi 23 aylıq fəaliyyəti dövründə xalqımızın milli mənlik şüurunu özünə qaytarıb, onun öz müqəddəratını təyin etməyə qadir olduğunu əyani şəkildə bütün dünyaya göstərib. Natiqlər Cümhuriyyət xadimlərinin qısa müddət ərzində gördüyü işlərdən, həyata keçirilmiş islahatlardan söz açıb, müsəlman Şərqində ilk dəfə olaraq demokratik təsisatların bərqərar edilməsindən, hətta qadınlara səsvermə hüququnun Avropa ölkələrinin çoxundan xeyli əvvəl verildiyindən danışıblar. Təəssüf hissi ilə qeyd olunub ki, 1920-ci ilin aprelində yaranmış tarixi şərait xalqımıza istiqlal mücadiləsini sonadək davam etdirməyə imkan verməyib.

Konfransın sonunda fövqəladə hallar nazirinin müavini, general leytenant Etibar Mirzəyev tədbirin keçirilməsində verilən dəstəyə görə AMEA-nın rəhbərliyinə minnətdarlığını bildirib, mühazirəçi alimlərə və digər iştirakçılara təşəkkür edib.