Sofiya, 31 may, AZƏRTAC

Azərbaycanın Bolqarıstandakı səfirliyinin təşəbbüsü ilə Sofiyada Bolqarıstanın Ehtiyatda olan Zabitlər və Serjantlar İttifaqında Azərbaycan Xalq Cümhuriyyətinin (AXC) 100 illik yubileyinin qeyd olunması çərçivəsində səfir Nərgiz Qurbanova “AXC-nin yaradılması və 1991-ci ildə müstəqilliyin yenidən bərpasından sonra Azərbaycanın keçdiyi inkişaf yolu” mövzusunda məruzə ilə çıxış edib və Bakı Media Mərkəzinin prezidenti Arzu Əliyevanın baş prodüseri olduğu “Əbədi ezamiyyət” sənədli filminin təqdimatı keçirilib.

Bolqarıstanın Ehtiyatda olan Zabitlər və Serjantlar İttifaqının sədri general Zlatan Stoykov Azərbaycan tarixi barədə dərindən məlumat əldə etmək imkanı yaratdığına görə səfir N.Qurbanovaya təşəkkürünü bildirib, səfirliyin bu təşəbbüsünü təqdirəlayiq hal kimi qiymətləndirib. Belə tədbirlərin davam etdirilməsinin vacibliyini qeyd edən general rəhbərlik etdiyi İttifaq ilə səfirlik arasında əməkdaşlığın bundan sonra da davam edəcəyinə ümidvar olduğunu deyib.

Səfir N.Qurbanova cari ildə ölkəmizdə, eləcə də onun hüdudlarından kənarda müsəlman Şərqində və türk dünyasında ilk parlament respublikası olan AXC-nin yaradılmasının 100-cü ildönümünün qeyd olunduğunu, Cümhuriyyətin yaradılmasının xalqımızın tarixində şanlı səhifələrdən biri olduğunu bildirib. O, cəmi 23 ay yaşamasına baxmayaraq, AXC-nin qısa müddətdə həyata keçirdiyi tədbirlərin xalqımızın tarixində buraxdığı silinməz izlər, milli dövlətçilik ənənələrimizin bərpasında oynadığı böyük rol barədə tədbir iştirakçılarına məlumat verib. AXC-nin öz mövcudluğu ərzində genişmiqyaslı demokratik islahatlara imza atdığını vurğulayan səfir 1918-ci ildə qadınlara seçib-seçilmək hüququ verərək Cümhuriyyətin bu məsələdə də bir çox dövlətlərə öncüllük etdiyini qeyd edib.

N.Qurbanova Azərbaycan Respublikasının Prezidenti İlham Əliyevin çıxışından sitat gətirərək qeyd edib ki, biz haqlı olaraq qürur hissi keçiririk ki, Şərqdə demokratiyanın əsasını qoyan məhz Azərbaycan xalqı olub, bu gün də bu demokratik ənənələr davam edir. Diplomat Azərbaycan xalqının yalnız qədim tarixə və demokratik ənənələrə deyil, həmçinin zəngin mədəniyyət, ədəbiyyat, incəsənət və musiqiyə malik olduğunu söyləyərək, cari ildə Azərbaycan milli teatrının 145, kinematoqrafiyasının 120, operasının 110 illik yubileylərinin ölkəmizdə böyük təntənə ilə qeyd olunduğu barədə söz açıb.

Sivilizasiyaların və mədəniyyətlərin qovuşuğunda yerləşən Azərbaycanın daim müxtəlif dinlərin, etnik qrupların və mədəniyyətlərin nümayəndələrinin sülh, əmin-amanlıq, tolerantlıq şəraitində birgə yaşadığı məkan olduğunu söyləyən səfir bu gün də Azərbaycanın mədəniyyətlərarası dialoq və multikulturalizm kimi dəyərlərin təbliğinə, qlobal və regional səviyyədə beynəlxalq münasibətlərə böyük töhfələr verməsindən bəhs edib.

AXC-nin süqutundan 71 il sonra, 1991-ci ildə Azərbaycan Respublikasının dövlət müstəqilliyini bərpa edərək dünya ictimaiyyətinə müstəqil dövlət kimi qoşulduğu bildirən N.Qurbanova müstəqilliyimizin ilk illərinin çox ağır bir duruma təsadüf etdiyini təəssüf hissi ilə qeyd edib. Səfir tarixən erməni millətçilərinin Azərbaycan torpaqlarına göz tikməsi, onların əsrlərboyu Ermənistanda yaşayan soydaşlarımızı zorla deportasiya etməsi, ölkəmizə qarşı hərbi təcavüz edərək ərazimizin 20 faizini işğal etməsi və bunun nəticəsində 1 milyon azərbaycanlının qaçqın və məcburi köçkünə çevrilməsi, minlərlə həmvətənimizin, o cümlədən uşaqların, qadınların və yaşlıların ölümünə səbəb olması barədə tədbir iştirakçılarını məlumatlandırıb.

Səfir, həmçinin qeyd edib ki, bütün bu çətinliklərə baxmayaraq, son 25 il ərzində Azərbaycan çox uğurlu inkişaf yolu keçərək qlobal və regional proseslərə böyük töhfə verən ölkəyə çevrilib. O, bu uğurlu siyasətin əsasını ümummilli lider Heydər Əliyevin qoyduğunu və daha sonra həmin siyasətin Azərbaycan Respublikasının Prezidenti İlham Əliyev tərəfindən yüksək səviyyədə davam etdirildiyini əlavə edib.

Daha sonra səfir Azərbaycanın bir çox irimiqyaslı layihələrə imza atması, ölkəmizin Bakı-Tbilisi-Qars dəmir yolu vasitəsilə Avropa və Asiya arasında beynəlxalq yük daşımalarının təşviq edilməsi və Avropanın enerji təhlükəsizliyini təmin edəcək Cənub Qaz Dəhlizinin reallaşdırılması istiqamətində gördüyü işlərdən danışıb.

N.Qurbanova bütün bunların ümummilli lider Heydər Əliyevin uzaqgörən siyasətinin uğurlu bəhrəsi olduğunu vurğulayaraq, ölkəmiz üçün çətin bir dövrdə Heydər Əliyev kimi təcrübəli siyasətçi və dövlət xadiminin xalqın iradəsi ilə yenidən 1993-cü ilin iyun ayında hakimiyyətə gələrək və bu mürəkkəb vəzifəni üzərinə götürərək Azərbaycanı çətin durumdan çıxardığını qeyd edib. O, cari il mayın 10-da bu dahi şəxsiyyətin anadan olmasının 95 illiyinin qeyd edilməsindən və onun əziz xatirəsinin xalqımız tərəfindən dərin hörmət və ehtiramla anılmasından söz açıb.

Azərbaycan və Bolqarıstan arasında dostluq əlaqələrinə toxunan səfir 2015-ci il martın 4-də Prezident İlham Əliyevin Sofiyaya rəsmi səfəri zamanı ölkələrimiz arasında strateji tərəfdaşlıq haqqında Birgə Bəyannamənin imzalandığını xatırlayıb. O, ölkələrimiz arasında həm energetika sahəsində, həm də qeyri-neft sektorunda əməkdaşlığın inkişaf etdirilməsi üçün böyük potensialın mövcud olduğunu əlavə edib. Diplomat son nailiyyətlərdən biri kimi, bu il yanvarın 16-dan etibarən fəaliyyətə başlamış və Azərbaycanın ilk aşağıbüdcəli aviaşirkəti olan “Buta Airways” şirkəti tərəfindən həyata keçirilən Bakı-Sofiya birbaşa hava əlaqəsini nümunə göstərib.

Azərbaycanın mədəniyyətlərarası dialoqa verdiyi töhfə ilə yanaşı, İslam dünyasındakı rolu və nüfuzundan da bəhs edən N.Qurbanova ölkəmizin 5 minillik tarixə malik qədim şəhəri olan Naxçıvanın 2018-ci il üçün İslam mədəniyyətinin paytaxtı elan edilməsi barədə məlumat verib. O, şəhərin İslam mədəniyyətinin paytaxtı adına layiq görülməsinin Azərbaycan xalqının tarixi-mədəni irsinə İslam aləmində verilən yüksək qiymətin nəticəsi olduğunu əlavə edib.

Səfir tədbirdə nümayiş olunan “Əbədi ezamiyyət” sənədli filmi ilə bağlı bildirib ki, sözügedən film AXC-nin 1919-cu ilin yanvarında Paris Sülh Konfransına Əlimərdan bəy Topçubaşovun rəhbərliyi ilə ezam etdiyi nümayəndə heyətinin keşməkeşli taleyindən bəhs edir. Filmdə nümayəndə heyətinin gərgin əməyi və Azərbaycanın müstəqilliyi uğrunda apardığı mücadilənin tarixi əks olunub.

Sonra film nümayiş olunub və izləyicilər tərəfindən böyük maraqla qarşılanıb. Filmin nümayişindən sonra ziyafət təşkil edilib.

İqbal Hacıyev

AZƏRTAC-ın xüsusi müxbiri

Sofiya