Şabranda 20 min başdan çox iribuynuzlu heyvan qarayara xəstəliyinə qarşı peyvənd olunub VİDEO
Quba, 30 yanvar, Elxan Yusifli, AZƏRTAC
Şabran rayonunda 2 min 600 baş iribuynuzlu heyvandan qan nümunəsi götürülüb, 20 min 465 baş iribuynuzlu və 1165 baş təkdırnaqlı qarayaraya qarşı peyvənd olunub.
AZƏRTAC-ın bölgə müxbiri xəbər verir ki, yanvarın əvvəllərindən başlayaraq rayondakı şəxsi və fermer təsərrüfatlarında bruselyoza qarşı seroloji müayinələr və qarayara xəstəliyinə qarşı peyvəndləmə işləri aparılır.
Şabran Rayon Baytarlıq İdarəsinin rəisi Nizaməddin Əliyev bildirib ki, təsərrüfatlarda aparılmış müayinələr zamanı hələlik bruselyoz virusu aşkar edilməyib.
Heyvanlardan alınan qan nümunələri baytarlıq laboratoriyalarında yoxlanıldıqdan sonra nəticələri barədə 2-3 gün ərzində fermerə məlumat verilir. Əgər virus aşkarlanarsa, xəstə heyvan müvafiq qaydada təsərrüfatdan kənarlaşdırılır.
Fevral ayının 10-na kimi 5 min başa yaxın iribuynuzlu heyvandan qan nümunəsinin götürülməsi nəzərdə tutulub. Bununla yanaşı, rayonda saxlanılan 25 min başa yaxın heyvan qarayara xəstəliyinə qarşı peyvənd ediləcək.
Həmçinin, bu günədək rayonda 1617 baş it quduzluğa qarşı peyvəndlənib.
Bölmənin digər xəbərləri
