Beyləqanda tam orta təhsil səviyyəsini bitirən 761 məzun üçün “Son zəng” çalınıb VİDEO
Beyləqan, 14 iyun, Tahir Ağaməmmədov, AZƏRTAC
İyunun 14-də Beyləqan rayonunun 53 ümumi orta məktəbində “Son zəng” çalınıb. Rayon üzrə 761 şagird tam orta, 1123 şagird isə ümumi orta təhsil səviyyəsini bitirib.
AZƏRTAC-ın bölgə müxbiri Beyləqan rayonu Dünyamalılar kənd tam orta məktəbində keçirilən “Son zəng” mərasimində iştirak edib. Sosial məsafə gözlənilməklə açıq hava şəraitində keçirilən tədbir Dövlət himninin səsləndirilməsi ilə başlanıb. Respublikamızın müstəqilliyi və ərazi bütövlüyü uğrunda canından keçən Vətən övladlarının xatirəsi bir dəqiqəlik sükutla yad edilib.
Mərasimdə iştirak edən təhsil nazirinin müavini İdris İsayev məzunları təbrik edib. Bildirib ki, bu il son zəng mərasimləri fərqli qeyd edilir: “2020-ci il sentyabrın 27-də işğalçı Ermənistanın ölkəmizə qarşı həyata keçirdiyi növbəti hərbi təxribatlara cavab olaraq ordumuzun əks-hücum əməliyyatları Zəfərlə sona çatdı. Prezident, Ali Baş Komandan İlham Əliyevin rəhbərliyi ilə şanlı ordumuz torpaqlarımızı işğaldan azad etdi. 44 günlük Vətən müharibəsi təhsilimizə də təsirsiz ötüşmədi. Azərbaycan müəllimi bu müharibədə respublikamızın ərazi bütövlüyü uğrunda döyüşlərə qatıldı. Vətən müharibəsində 20 təhsil işçisi döyüşlərdə qəhrəmanlıq və şücaət göstərərək şəhidlik zirvəsinə ucaldı. Düşmən tərəfindən yaşayış məntəqələrimizin artilleriya atəşinə tutulması nəticəsində 10 şagird həyatını itirdi, məktəb infrastrukturuna ciddi ziyan dəydi”.
İdris İsayev ölkəmizdə gənclərin hərtərəfli inkişafı və təhsili üçün hər cür imkan yaradıldığını bildirib: “Məzunlar ali təhsil müəssisələrinə, peşə məktəblərinə qəbul olaraq müxtəlif ixtisaslara yiyələnə bilərlər. Peşə təhsili müəssisələrinə 20 mindən artıq, ali təhsil müəssisələrinə 55 mindən artıq, orta ixtisas təhsili müəssisələrinə 16 mindən artıq qəbul nəzərdə tutulur. Bunların da böyük əksəriyyəti dövlət sifarişi yerləridir”.
Nazir müavini gənclərə yiyələndikləri peşədən asılı olmayaraq öz bilik və bacarıqları ilə Azərbaycanın inkişafına töhfə verməyi, dövlətimiz üçün layiqli vətəndaş, ailələri üçün layiqli övlad olmalarını arzulayıb.
Rayon təhsil şöbəsinin müdiri Suliddin Əsgərov və məktəbin direktoru Gülxara Niftəliyeva məzunları təbrik edib, onlara gələcək həyatlarında uğurlar arzulayıblar.
Məktəblilərin musiqili-bədii çıxışları ilə davam edən tədbir iştirakçılara xoş və duyğulu anlar yaşadıb. Çalınan “Son zəng” isə məzunları sinif otaqlarına deyil, müstəqil həyata səsləyib.
Təhsil nazirinin müavini İdris İsayev jurnalistlərə açıqlamasında deyib: “Ölkəmizdə 4500-ə yaxın ümumi təhsil müəssisəsində məzun günü qeyd edilir. Bu tədris ilində IX sinifləri 131 mindən çox, XI sinifləri isə 84 mindən çox şagird bitirir. Məzunlar üçün ölkəmizdə geniş imkanlar mövcuddur. Onların bir qismi təhsillərini davam etdirəcək, bir qismi əmək fəaliyyətinə başlayacaq. Əgər məzunlar qısa müddətdə əmək bazarına daxil olmaq istəyirlərsə, peşə təhsili müəssisələrinə üz tutmalıdırlar. Bu il peşə təhsili müəssisələrinə 20 mindən artıq qəbul nəzərdə tutulub ki, bunun da 75 faizi ödənişsizdir. Ali təhsil müəssisələrində qəbul planı ilbəil artmaqdadır. Son iki ildə dövlət sifarişi yerlərinin sayı 66 faiz artıb. Tələbələrin sayı son üç ildə 40 faiz artıb. Bu isə o deməkdir ki, təhsilə gənclərin marağı böyükdür. Biz istəyirik ki, gənclərimiz həyatda layiqli yer tutsunlar. Bunun yeganə yolu isə təhsildir. Bu gün təhsil həm bilik, bacarıq, həm də yeni texnologiya, innovasiya, sosial rifah deməkdir. Biz gənclərə imkanlardan düzgün istifadə etməyi, dövlətimiz, xalqımız üçün layiqli övlad olmağı arzu edirik”.
Bölmənin digər xəbərləri
