İQTİSADİYYAT


Bakıda “Rebuild Karabakh”, “BakuBuild 2021”, “Aquatherm Baku 2021” sərgiləri başlayıb YENİLƏNİB VİDEO

Bakı, 20 oktyabr, AZƏRTAC

Bu gün çoxdan gözlənilən – “Rebuild Karabakh” - Azərbaycan Beynəlxalq “Qarabağın Bərpa, Yenidənqurma və İnkişafı” sərgisi gerçəkləşdi.

AZƏRTAC xəbər verir ki, sərginin açılışında iqtisadiyyat nazirinin müavini Elnur Əliyev, energetika nazirinin müavini Elnur Soltanov, Ekologiya və Təbii Sərvətlər nazirinin müavini Vüqar Kərimov, Milli Məclisin deputatı, İqtisadiyyat komitəsinin sədri - Tahir Mirkişili, Dövlət Şəhərsalma və Arxitektura Komitəsi sədrinin müavini Dövlətxan Dövlətxanov, Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin rəis müavini Elxan Əsədov, Azərbaycan Memarlar İttifaqının sədri, professor Elbəy Qasımzadə, “Caspian Event Organisers” şirkətinin rəhbəri Edvard Stron və başqaları iştirak ediblər.

Tədbirdə çıxış edənlər bildiriblər ki, Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində igid Azərbaycan Ordusunun qazandığı tarixi Zəfərdən sonra azad edilmiş torpaqların bərpası prioritet vəzifədir. Həmçinin işğaldan azad edilmiş ərazilərin bərpası və yenidən qurulması prosesinin effektivliyini artırmaq, bu istiqamətdə özəl-dövlət tərəfdaşlığını möhkəmləndirmək, bölgənin inkişafı üçün ən cəlbedici və səmərəli məhsul, layihə və həlləri nümayiş etdirmək məqsədilə təşkil edilmiş “Rebuild Karabakh” sərgisinin vacibliyindən danışılıb.

Oktyabrın 20-22-də Bakı Ekspo Mərkəzində keçiriləcək sərgi artıq ziyarətçilərini gözləyir. Eyni tarixlərdə, 26-cı Azərbaycan Beynəlxalq İnşaat Sərgisi “BakuBuild 2021” və 13-cü Beynəlxalq “İstilik, Havalandırma, Kondisionerləşdirmə, SuTəchizatı, Santexnika və Üzgüçülük Hovuzu” – “Aquatherm Baku 2021” sərgisini özündə birləşdirən ənənəvi Xəzər İnşaat Həftəsi başlayır. Bu günlər ərzində sərgiyə gələn ziyarətçilər dünyanın 17 ölkəsindən 279 şirkətin məhsulları ilə tanış ola biləcəklər.

İştirakçılar və ziyarətçiləri, həmçinin AZPROMO və KOBİA-nın dəstəyi və iştirakı ilə təşkil edilən zəngin mədəni və işgüzar tədbirlər proqramı gözləyir.

Canlı təşkil olunan tədbirlərin təhlükəsiz keçirilməsi üzrə qaydalar Azərbaycan Respublikası Nazirlər Kabineti yanında Operativ Qərargahın, eləcə də Ümumdünya Sərgi Sənayesi Assosiasiyasının (UFI) tövsiyələrinə (sosial məsafə, maska rejimi, antiseptik/təmizləyici vasitələrin tətbiqi, bədən hərarətinin yoxlanılması və ərazinin müntəzəm dezinfeksiya edilməsinə) əsaslanır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.