Zəfərimizin birinci ildönümü İstanbulda böyük coşqu ilə qeyd edilib VİDEO
İstanbul, 8 noyabr, AZƏRTAC
Azərbaycanın Vətən müharibəsində əldə etdiyi şanlı Zəfərin birinci ildönümü münasibətilə İstanbulda növbəti təntənəli bayram tədbiri keçirilib.
AZƏRTAC xəbər verir ki, tədbir Azərbaycan Respublikası Diasporla İş üzrə Dövlət Komitəsi və Türkiyə-Azərbaycan Dərnəkləri Federasiyasının (TADEF) birə təşkilatçılığı ilə baş tutub.
İki qardaş ölkənin Dövlət himnlərinin səsləndirilməsi ilə başlayan tədbirdə şəhidlərin əziz xatirəsi bir dəqiqəlik sükutla yad edilib. Sonra isə Azərbaycanın 44 günlük Vətən müharibəsini özündə əks etdirən videoçarx nümayiş olunub.
Mərasimdə çıxış edən Şimali Kipr Türk Cümhuriyyətinin Prezidenti Ersin Tatar, Pakistan İslam Respublikasının İstanbuldaki baş konsulu Bilal Xan Pasha, Diasporla İş üzrə Dövlət Komitəsi sədrinin birinci müavini Valeh Hacıyev, TADEF-in rəhbəri Ədalət Turan və digərləri Azərbaycanın Qarabağ Zəfərinin birinci ildönümü münasibətilə tədbir iştirakçılarını təbrik ediblər. Əldə edilən bu tarixi Qələbənin bütün türk dünyası, eləcə də Vətənimizə dost və qardaş olan bütün dövlət və xalqların da Zəfəri olduğu vurğulanıb.
Qeyd edilib ki, Azərbaycan xalqı bu müharibə ilə “Dəmir yumruğu” ermənilərin başına endirərək otuz illik həsrətinə son qoydu. Bu 44 gün ərzində Müzəffər Ali Baş Komandan İlham Əliyevin rəhbərliyi altında qəhrəmanca vuruşan Azərbaycan əsgəri bir gün belə yorulmadan daima irəli getdi. Bu dövr ərzində başda qardaş Türkiyə olmaqla bir sıra ölkələr, o cümlədən Pakistan da öz mənəvi və diplomatik dəstəyi ilə daima Azərbaycanın yanında oldular. Erməni işğalından geriyə isə dağıdılmış şəhərlərin insanı vahiməyə salan görüntülər qalıb. Bu gün Qarabağ öz simasına qovuşur. Azərbaycan dövləti tərəfindən qısa zaman ərzində işğaldan azad edilən ərazilərdə görülən işlər həqiqətən də bir möcüzədir.
Bildirilib ki, bir azərbaycanlı, bir türk olaraq biz daima sülhün, insanlığın tərəfdarı olmuşuq. Lakin, hər kəs bunu da anladı ki, üstümüzə silahla gələn lazımi cavabı alacaq. Daima multikulturallığı ilə seçilən Azərbaycan Vətən müharibəsində də bu insan sevgisini bir daha sübut etdi. Azərbaycanla yanaşı onu sevən, ona dost-qardaş olan ölkələr də öz diplomatiyası, sözü, musiqisi, sosial mediada verdiyi dəstəklə bu müharibədə Vətənimizin yanında oldular.
Sonra Azərbaycan Diasporuna Dəstək Fondu və Diasporla İş üzrə Dövlət Komitəsi tərəfindən hazırlanan İkinci Qarabağ müharibəsinə həsr olunan qısametrajlı "Yaddaş" filmi nümayiş etdirilib.
Tədbir Azərbaycanın görkəmli sənət adamlarının ifası, Azərbaycan rəqsləri və musiqisindən ibarət bədii hissə ilə davam etdirilib.
Mərasimdə Türkiyə-Azərbaycan parlamentlərarası dostluq qrupunun rəhbəri Şamil Ayrım, Türkiyə Böyük Millət Məclisinin deputatları, qardaş ölkənin bir sıra dövlət xadimləri, diplomatik korpusun nümayəndələri, bu ölkədə yaşayan və fəaliyyət göstərən həmvətənlərimiz, qazilər və digərləri iştirak ediblər.
Tədbir əsnasında işğaldan azad edilən ərazilərimizin fotoşəkillərindən ibarət sərgi təşkil olunub.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
