Sumqayıtda keçirilən əməliyyatlar zamanı 30 kiloqrama yaxın narkotik vasitə qanunsuz dövriyyədən çıxarılıb VİDEO
Bakı, 17 noyabr, AZƏRTAC
Cari ilin on ayı ərzində Sumqayıt Şəhər Polis İdarəsinin əməkdaşları tərəfindən həyata keçirilən əməliyyatlar zamanı 30 kiloqrama yaxın müxtəlif xassəli narkotik vasitə və psixotrop maddə, habelə satışı qadağan olunan 430 ədəd metadon həbi qanunsuz dövriyyədən çıxarılıb. Bu dövrdə Sumqayıtda narkotik vasitələrlə bağlı 171-i satış olmaqla 353 fakt aşkarlanıb. Bu qanunsuz fəaliyyətlə məşğul olan ümumilikdə 425 nəfər məsuliyyətə cəlb edilib.
Daxili İşlər Nazirliyinin mətbuat xidmətindən AZƏRTAC-a bildiriblər ki, bu barədə Sumqayıt Şəhər Polis İdarəsinin rəisi, polis polkovniki Fəqan Azadəliyev şəhər ərazisində yerləşən 11 saylı tam orta məktəbdə narkomaniyanın fəsadlarından bəhs edən maarifləndirmə tədbirində şagirdlərlə görüş zamanı məlumat verib.
Karantin qaydaları nəzərə alınmaqla keçirilən tədbirdə “Narkomaniyaya yox deyək” mövzusunda çıxış edənlər narkotik vasitələrin insanlar üçün yaratdığı problemlərdən danışıb və narkomaniyanın bir nəfərin yox, ümumiyyətlə cəmiyyətin bəlası olduğunu qeyd ediblər. Həmçinin son aylarda Daxili İşlər Nazirliyinin narkotik vasitələrə qarşı ölkəboyu həyata keçirdiyi genişmiqyaslı əməliyyatlar barədə məktəbin IX, X, XI sinif şagirdləri məlumatlandırılıb, onlara sağlam gələcək naminə narkotik vasitələrdən uzaq durmaq tövsiyə edilib. Çıxışlarda gənclərə daim diqqətli olmalarının, narkotik vasitələrin qanunsuz dövriyyəsi ilə məşğul olan şəxslər haqqında məlumat əldə etdikdə bu barədə valideynlərinə, müəllimlərinə, polisə, habelə nazirliyin sosial şəbəkələrdəki rəsmi hesablarına məlumat vermələrinin vacibliyi bildirilib.
Tədbirin sonunda məktəbliləri maraqlandıran suallar cavablandırılıb və narkomaniyanın fəsadlarından bəhs edən sosial çarxlar nümayiş etdirilib.
Sumqayıt Şəhər Polis İdarəsinin əməkdaşları tərəfindən, həmçinin Sumqayıt Dövlət Universitetində tələbələr üçün “İnsan alverinə qarşı mübarizə” mövzusunda maarifləndirmə tədbiri də keçirilib. Tədbir müstəqil həyata başlayan gəncləri insan alverinə qarşı mübarizə barədə məlumatlandırmaq, müəyyən olunmuş qaydalar, prosedur və şərtlərlə tanış etmək məqsədi daşıyıb.
Çıxış edənlər insan alverinin müasir dövrün aktual problemlərindən biri olduğunu qeyd ediblər. Bu sahədə görülən işlər, insan alverinin növləri, insan alverinə qarşı mübarizə yolları, təhlükəsiz sığınacaq xidmətləri və “ 152 Qaynar xətt” telefon xidməti barədə tələbələrə geniş məlumat veriblər.
Sonda tələbələrə insan alverinə qarşı mübarizə ilə bağlı maarifləndirici bukletlər paylanıb və onları maraqlandıran suallar cavablandırılıb.
Sumqayıtda yerləşən təhsil müəssisələrində “Narkomaniyaya yox deyək” və “İnsan alverinə qarşı mübarizə” mövzusunda maarifləndirmə tədbirləri bundan sonra da davam etdiriləcək.
Bölmənin digər xəbərləri
