CƏMİYYƏT
Narkotik vasitənin təsiri altında avtobus idarə edən üç sürücü saxlanılıb VİDEO
Bakı, 30 noyabr, AZƏRTAC
Koronavirus pandemiyasının geniş miqyasda yayılmasının qarşısının alınması məqsədi ilə Daxili İşlər Nazirliyinin (DİN) müvafiq Baş İdarə və İdarələrinin əməkdaşları Sumqayıt şəhərinin, həmçinin Abşeron rayonunun kənd və qəsəbələrindən paytaxt istiqamətində hərəkət edən sərnişin avtobuslarında reydlər keçiriblər.
DİN-in mətbuat xidmətindən AZƏRTAC-a bildirilib ki, avtobuslarda yalnız polis əməkdaşını görən zaman tənəffüs yollarını qoruyan maskalardan istifadə edən bununla da virusun yayılmasına şərait yaradan sürücü və sərnişinlərin aşkarlanması üçün tədbirə mülki geyimli əməkdaşlar da cəlb olunub. Sumqayıt şəhərindən paytaxta doğru hərəkət edən avtobuslarda aparılan yoxlamalar zamanı nəqliyyat vasitəsinin salonunda olarkən maskadan istifadə etməyən şəxslər mülki geyimli polis əməkdaşları tərəfindən müəyyənləşdirilib. Onlar barəsində inzibati tədbir görülüb.
Xırdalan şəhərindən paytaxt istiqamətində hərəkət edən avtobuslarda keçirilən tədbir zamanı sanitar-karantin qaydalarına əməl etməyən sürücü və sərnişinlər də aşkarlanıb. Tənəffüs yollarını qoruyan maskalardan istifadə etməyən şəxslərlə profilaktik söhbətlər aparılıb, onların barələrində inzibati tənbeh tədbirləri tətbiq olunub.
Abşeron rayonunun Qobu qəsəbəsindən paytaxt istiqamətində hərəkət edən sərnişin avtobuslarında aparılan yoxlama zamanı isə polis əməkdaşları daha ciddi qayda pozuntuları aşkarlayıblar. Belə ki, 567 saylı marşrut xətti ilə Qobu qəsəbəsindən paytaxt istiqamətində hərəkət edən sərnişin avtobuslarında nəzarət-profilaktik tədbirlər həyata keçirilən zaman sürücü və sərnişinlər arasında pandemiya qaydalarına əməl edilmədiyi məlum olub. Eləcə də, sürücülərdən bir neçəsinin peyvənd olunmadan sərnişindaşıma fəaliyyəti ilə məşğul olduqları müəyyənləşdirilib. Aparılan yoxlama zamanı həmin xətt üzrə hərəkət edən üç avtobusun sürücüsünün nəqliyyat vasitəsini sərnişinlərin həyatını təhlükə altına qoyaraq narkotik vasitələrin təsiri altında idarə etdiyi aşkarlanıb. Həmin sürücülərin idarə etdiyi avtobuslar xətdən kənarlaşdırılıb, özləri isə saxlanılaraq Qobu Polis Bölməsinə gətiriliblər. Onların etdiyi qanun pozuntusuna hüquqi qiymət verilməsi üçün toplanan materiallar məhkəməyə göndərilib.
Keçirilən sonuncu profilaktik tədbir zamanı Sumqayıt şəhəri və Abşeron rayonundan paytaxt istiqamətində hərəkət edən 70-ə yaxın sürücü və sərnişin sanitar-karantin rejiminə əməl etmədiyi üçün barələrində inzibati tədbir görülüb.
Nazirlik bir daha vətəndaşları qayda və tələblərə əməl etməyə çağırır və bildirir ki, ictimai nəqliyyatda polis əməkdaşlarının keçirdiyi gücləndirilmiş nəzarət-profilaktik tədbirlər bundan sonra da mütəmadi davam etdiriləcək.