Moskvada Azərbaycan Mədəniyyət Mərkəzinin 10 illiyinə həsr edilmiş təntənəli tədbir keçirilib VİDEO
Moskva, 3 dekabr, AZƏRTAC
Moskvada M.İ.Rudomino adına Xarici Ədəbiyyat Kitabxanasında Azərbaycan Mədəniyyət Mərkəzinin 10 illiyinə həsr edilmiş təntənəli tədbir keçirilib.
AZƏRTAC xəbər verir ki, tədbirin təşkilatçıları qismində Heydər Əliyev Fondunun Rusiya Federasiyasındakı nümayəndəliyi və M.İ.Rudomino adına Xarici Ədəbiyyat Kitabxanası çıxış edib.
Heydər Əliyev Fondunun Rusiya Federasiyasındakı nümayəndəliyinin humanitar proqramlar şöbəsinin rəhbəri Tamilla Əhmədova təntənəli tədbiri açıq elan edərək bildirib ki, Moskvadakı Azərbaycan Mədəniyyət Mərkəzi 10 il bundan əvvəl Heydər Əliyev Fondunun vitse-prezidenti Leyla Əliyevanın təşəbbüsü ilə yaradılıb. O deyib: “Bizim üçün doğma evə çevrilmiş bu Mərkəzdə arasında Azərbaycan rəssamlarının sərgiləri, ədəbi gecələr keçirilib, kinofilmlər nümayiş etdirilib. Biz bu evə həmişə məmnuniyyətlə gəlirik və qonaqpərvərliyə görə çox minnətdarıq”.
Mədəniyyət Mərkəzinin ilk günlərdən başlayaraq öz missiyasını yerinə yetirdiyini vurğulayan T.Əhmədova deyib: “Mədəniyyət bir-birimizə ürək sözlərimizi söyləməkdə, bir-birimizi daha yaxşı anlamaqda, bir-birimizə yaxın olmaqda bizə kömək edən universal açardır. Rusiya-Azərbaycan münasibətlərinin strateji, mehriban qonşuluq münasibətləri olması hamıya çoxdan məlumdur və bu münasibətlərdə humanitar tərkib hissə heç də sonuncu yerdə deyil. Bu səbəbdən, bizim Mədəniyyət Mərkəzi həm bugünkü Azərbaycanın təqdim edilməsinə, həm də Azərbaycanın gələcəyi barədə məlumatlandırma işinə öz töhfəsini verir”.
Azərbaycan Mədəniyyət Mərkəzinin direktoru Nisə Mustafayeva çıxışında qeyd edib ki, 2011-ci ildə yaradılmış Mərkəz bu il yubileyini qeyd edir. N.Mustafayeva deyib: “Bu əlamətdar tarixlə əlaqədar, biz uğurlarımız, nailiyyətlərimiz və gələcək üçün planlarımız barədə fikir mübadiləsi aparmaq üçün dostlarımızı bu ədəbi-musiqili gecəyə dəvət etməyi qərara aldıq. Lakin bütün bunlar Heydər Əliyev Fondunun, Fondun Rusiyadakı nümayəndəliyinin və şəxsən Fondun vitse-prezidenti Leyla xanım Əliyevanın daimi dəstəyi sayəsində mümkün olub. Leyla xanım bizim bütün təkliflərimizi, arzularımızı böyük maraqla qəbul edir, bizi fəal dəstəkləyir. Əlbəttə, M.İ.Rudomino adına Xarici Ədəbiyyat Kitabxanasına da dərin təşəkkürümüzü bildiririk. Onlar Azərbaycan mədəniyyətinə çox səmimi münasibət bəsləyir. Axı mədəniyyət də bir növ diplomatiyadır və bizim Mədəniyyət Mərkəzi Rusiya ilə Azərbaycan arasında özünəməxsus körpü rolu oynayır”.
M.İ.Rudomino adına Xarici Ədəbiyyat Kitabxanasının baş direktoru Pavel Kuzmin kitabxananın da bu il öz yubileyini qeyd etməsini xatırladıb. O deyib: “On il mühüm tarixdir, xüsusən ona görə ki, bu müddət Xarici Ədəbiyyat Kitabxanasının 100 illiyinin tamam olduğu tarixlə eyni vaxta düşür. Bizim məqsədimiz mədəniyyətlərarası, millətlərarası dialoqu inkişaf etdirmək, xalqlarımızın xeyirxah xatirəni qoruyub saxlamasına, bu xatirənin, bu ənənələrin gənc nəslə çatdırılmasına kömək etməkdir. Müdrik əcdadlarımız yaxşı deyiblər, ənənə ocağın külünə ehtiram deyil, ocağın odunu nəsildən-nəslə ötürməkdir. Azərbaycan Mədəniyyət Mərkəzi artıq 10 ildir ki, sizin gözəl ölkənizin böyük və rəngarəng mədəniyyətini təbliğ etməklə məşğuldur”.
P.Kuzmin bu yaxınlarda Bakıda səfərdə olması barədə söhbət açaraq deyib: “Möhtəşəm Heydər Əliyev Fondunda gözəl görüş oldu. Leyla xanımla çox yaxşı qarşılıqlı münasibətlərimiz var. O da bizim kitabxanada olub. Heydər Əliyev Fondu və Azərbaycan Mədəniyyət Mərkəzi ilə əməkdaşlıq barədə böyük proqramımız var”.
Kitabxananın baş direktoru ikitərəfli humanitar dialoqun inkişafı naminə çoxillik əməkdaşlığa görə Heydər Əliyev Fondunun Rusiyadakı nümayəndəliyinə və Azərbaycan Mədəniyyət Mərkəzinə təşəkkürnamələr və kitabxananın 100 illiyinə həsr edilmiş medal təqdim edib.
Azərbaycanın Rusiya Federasiyasındakı səfirliyinin mədəniyyət attaşesi Nigar Axundova Mədəniyyət Mərkəzini 10 illik yubileyi münasibətilə təbrik edib, ona yeni uğurlar arzu edib.
Təntənəli tədbir çərçivəsində Azərbaycan Milli Elmlər Akademiyasının vitse-prezidenti, filologiya elmləri doktoru, professor İsa Həbibbəylinin və filologiya elmləri doktoru, professor Abuzər Bağırovun “Azərbaycan Turanın incisidir” kitabının təqdimatı olub. Kitabda Azərbaycan poetik irsinin tarixinin müxtəlif dövrlərinə həsr edilmiş monoqrafik araşdırmalar toplanıb. Monoqrafiya-antologiya beş il (2015-2019) ərzində məşhur “Literaturnaya qazeta”nın səhifələrində dərc edilmiş yeddi xüsusi buraxılışın materialları əsasında tərtib edilib.
Təntənəli tədbir beynəlxalq müsabiqələr laureatı, pianoçu Səidə Tağızadənin çıxışı ilə davam edib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
