FHN-in kinoloqları işğaldan azad olunmuş ərazilərdə minaların təmizlənməsi işinə xüsusi təlim keçmiş minaaxtaran itlərlə qoşulur VİDEO
Bakı, 10 dekabr, AZƏRTAC
Digər aidiyyəti dövlət qurumları ilə yanaşı, Fövqəladə Hallar Nazirliyi (FHN) də işğaldan azad olunmuş əraziləri müharibənin partlamamış qalıqlarından təmizlənməsi əməliyyatlarını sürətli şəkildə davam etdirir.
AZƏRTAC xəbər verir ki, ayrılmış ərazilərin xeyli hissəsi təmizlənərək təhvil verilib. Bu aydan etibarən nazirliyin Xüsusi Riskli Xilasetmə Xidmətinin minaaxtaran istehkamçıları ilə bərabər kinoloqları da xüsusi təlim keçmiş minaaxtaran itlərlə prosesə qoşulur. Ərazilərin partlamamış hərbi sursatlarla (PHS) çirklənmə miqyası həddindən artıq geniş olduğu üçün minaaxtaran itlərə ehtiyac yaranıb. Bu itlər sürətli şəkildə mina və partlayıcı maddələr aşkarlayır.
Nazirliyin Xüsusi Riskli Xilasetmə Xidmətinin kinoloji mərkəzinin nümayəndəsi Elvin Qocayev bildirib ki, xidməti itlərdən beş istiqamətdə istifadə olunur: Bu axtarışlara insan, cəsəd, partlayıcı təhlükəli maddələr və mina aiddir. Partlayıcı təhlükəli maddələr dedikdə burada şübhəli əşyalar, avtomobilə quraşdırılmış əldə qayırılmış partlayıcı maddələr, böyük tribunalarda quraşdırılmış partlayıcı maddələr daxildir. Partlayıcı maddəni xidməti it aşkarlayarkən oturmaq və uzanmaqla bunu siqnal verir. O, bununla da partlayıcı maddənin yerini göstərir və istehkamçı qrup bu minanı zərərsizləşdirir.
Qeyd edək ki, əməliyyatlar təyin olunmuş istiqamətlər üzrə, kənd və qəsəbələrdə, eləcə də su hövzələrinin kənar ərazilərində, su kanalları boyunca aparılır. Əməkdaşlar ən müasir avadanlıqla təchiz olunub və bu sahədə beynəlxalq kurslarda iştirak edərək akkreditasiyadan keçiblər.
Düşmən qadağan olunmuş üsullardan istifadə etməklə, ərazilərin minalanması zamanı heç bir standart, norma gözləməyib və ərazilər çox ciddi şəkildə minalanıb. Bütün bunlara baxmayaraq, ərazilərdə minatəmizləmə prosesi tam gücü ilə davam etdirilir. Bu sahədə müvafiq dövlət qurumlarının mütəxəssisləri qarşılıqlı əməkdaşlıq şəraiti və birgə fəaliyyət prinsipləri əsasında iş aparırlar. Qeyd olunanlarla yanaşı, işğaldan azad olunmuş ərazilərdə quruculuq işləri də sürətlə davam etdirilir. Otuz ildir doğma ata-baba yurdlarından didərgin düşmüş məcburi köçkünlərimizin, ərazilərə səfər edəcək vətəndaşlarımızın tam təhlükəsiz yaşaması üçün dövlət əlində olan bütün imkanlardan istifadə edir ki, ərazilərdə heç bir maneə qalmasın. Bu torpaqlara qarış-qarış yenidən həyat verilir. Bunun üçün vətəndaşlar həmin ərazilərdə minatəmizləmə işlərini səbirlə gözləməli və qanunsuz səfərlərdən çəkinməlidirlər.
Vətəndaşların dəstəyi nəticəsində həmin ərazilərdə aparılan təhlükəsizlik və yenidənqurma fəaliyyəti uğurla həyata keçirilir. FHN quruculuq işlərində iştirak edən şəxsləri, işğaldan azad olunmuş ərazilərə yaxın bölgələrdə yaşayan kənd təsərrüfatı ilə məşğul olan vətəndaşlarımızı ərazilərdə ehtiyatlı olmağa, müvafiq qurumlar tərəfindən müəyyən olunmuş yollardan istifadə etməyə, xüsusi işarələnmiş zolaqlardan çıxmamağa çağırır. Mina və ya partlamamış hərbi sursatlar, əraziyə xas olmayan şübhəli əşyalar, ərazinin minalı olmasını göstərən amillər gördükdə dərhal Fövqəladə Hallar Nazirliyinin 112 - qaynar xəttinə və ya Daxili İşlər Nazirliyinin 102 - Zəng Mərkəzinə məlumat verilməlidir.
Bəzi hallarda vətəndaşların qeyri-qanuni yollarla ərazilərə keçməyə cəhd hallarına da rast gəlinir. Nazirlik bir daha müraciət edərək xahiş edir ki, bu cür səfərlərdən çəkinsinlər, qanunsuz yollarla ərazilərə keçməsinlər. Partlayıcı qurğuların qurbanına çevrilməsinlər.
Bölmənin digər xəbərləri
