2023-cü ildə cari əməliyyatlar hesabının profisitli olacağı ilə bağlı proqnoz dəyişməz qalır
Bakı, 16 dekabr, AZƏRTAC
Profisitli tədiyə balansı valyuta bazarında təklif kanallarını dəstəkləməkdə davam edir. Həm neft-qaz sektoru, həm də qeyri-neft-qaz sektoru üzrə ixracın artım tempi yüksək olaraq qalır. Bu şəraitdə tədiyə balansının cari əməliyyatlar hesabının əsas elementi olan xarici ticarət balansının profisiti 10 ayda ötən ilin eyni dövrü ilə müqayisədə 3,1 dəfə artaraq 23,1 milyard ABŞ dollarına çatıb. Qeyri-neft-qaz ixracının həcmi 16,2 faiz genişlənib və 2,4 milyard dollar təşkil edib.
Azərbaycan Mərkəzi Bankından AZƏRTAC-a bildirilib ki, 2023-cü ildə də cari əməliyyatlar hesabının profisitli olacağı ilə bağlı proqnoz dəyişməz qalır. Enerji daşıyıcılarının qiymətləri hazırkı səviyyəsində qalarsa, növbəti ildə də cari hesab profisitinin ümumi daxili məhsula nisbətinin ikirəqəmli səviyyədə qalacağı gözlənilir. Profisitli tədiyə balansı ölkənin strateji valyuta ehtiyatlarının artması və valyuta bazarında təklifin genişlənməsi ilə müşayiət olunur. Bu da Azərbaycan Respublikası Dövlət Neft Fondunun vəsaitlərinə daha çox qənaət etməyə imkan verir.
Bölmənin digər xəbərləri
