“2030-cu ilə doğru: Azərbaycanda sosial və iqtisadi inklüzivlik” mövzusunda tədbir keçirilib
Bakı, 14 iyun, AZƏRTAC
İyunun 14-də Bakıda “2030-cu ilə doğru: Azərbaycanda sosial iqtisadi inklüzivlik" mövzusunda tədbir təşkil olunub. Tədbirdə beynəlxalq təşkilatların Azərbaycanda akkreditə olunan nümayəndələri, müvafiq qurumların rəhbərləri və əməkdaşları iştirak edib.
AZƏRTAC xəbər verir ki, tədbirdə Baş nazirin müavini, Dayanıqlı İnkişaf üzrə Milli Əlaqələndirmə Şurasının sədri Əli Əhmədov çıxış edərək Azərbaycanın BMT-nin Qlobal İnkişaf Strategiyasına qoşulduğunu və bu strateji proqrama töhfə verdiyini nəzərə çatdırdı. Qeyd olundu ki, Azərbaycan 2030-cu ilə kimi özünün Milli İnkişaf Konsepsiyasını həyata keçirir. Bu konsepsiyaya 40-dan çox proqram daxildir ki, bunlar da ölkədə sosial-iqtisadi inkişafın dayanıqlı olmasını təmin edir.
BMT bu gün dünyada baş verən qlobal siyasi proseslər nəticəsində yaranan işsizlik, yoxsulluq, qaçqınlar kimi sosial problemlərlə məşğuldur. Azərbaycan 2020-ci ildə 44 günlük Vətən müharibəsində işğal altındakı torpaqlarını azad etdi və 1 milyondan artıq insanın üzərindən “qaçqın” statusu götürüldü. Qarabağda aparılan quruculuq və bərpa işlərinin məqsədi ondan ibarətdir ki, əhali oraya köçürülsün və məskunlaşsın.
BMT-nin Azərbaycandakı rezident-əlaqələndiricisi Vladanka Andreyeva çıxış edərək nəzərə çatdırıb ki, BMT-nin məqsədi inkişaf etməkdə olan ölkələrə yardım etməkdən ibarətdir. Bu gün dünyada böyük problemlər var ki, bunlarında həll olunması üçün həm zaman həm də resurslar lazımdır. Lakin Azərbaycan inklüziv inkişaf istiqamətində uğurlu addımlar atıb. Azərbaycan hökuməti sosial ədalət prinsipindən çıxış edərək COVID-19 pandemiyası dövründə əhaliyə böyük yardımlar etdi. Həyata keçirilən iqtisadi islahatların nəticəsində hökumət işsizliyin sayını 50 faizdən 5,5 faizə kimi azalda bildi ki, bu da uğurlu göstəricidir. Ölkədə davamlı olaraq əməkhaqları, təqaüdlər artırılır və bu əhalinin bütün təbəqələrinə şamil edilir. BMT bu kimi təşəbbüsləri və hökumətlərin sosial inkişaf istiqamətindəki addımlarını dəstəkləməyə hazırdır.
Tədbirdə çıxış edən əmək və əhalinin sosial müdafiə naziri Sahil Babayev qeyd etdi ki, BMT-nin Strateji İnkişaf proqramındakı 17 məqsədini Azərbaycan hökuməti özünün Milli İnkişaf Proqramına daxil edib. Bura təhsilin hamı üçün əl çatan olması, sosial ədalət, işsizliyin və yoxsulluğun tamamilə aradan qaldırılması kimi məsələlər daxildir. Bu istiqamətdə Azərbaycan hökuməti son 4 ildə 4 milyon nəfəri əhatə edən sosial proqramlara 6.8 milyard manat vəsait ayırıb. Əməkhaqları 2,5 dəfə, təqaüdlər 5 dəfə artırılıb və 10 növ sosial ödəniş həyata keçirilir. Son 5 ildə həyata keçirilən islahatlar nəticəsində 400 min nəfər işlə təmin olunub, 445 min peşə təhsilinə cəlb edilib.
“Sosial ədalətin əsas istiqamət olması nəzərə alınıb və əlillərin həyat səviyyəsinin yüksəldilməsi üçün 12 reabilitasiya mərkəzi istifadəyə verilib. Cari ildə əlavə olaraq 4 yeni reabilitasiya mərkəzi də istifadəyə veriləcək. Ötən il bu mərkəzlərdə 50 min əlil reabilitasiya kursu keçib. Məqsədimiz ondan ibarətdir ki, ildə 50 min deyil 100 min əlil reabilitasiya kursu keçsin”,-deyə nazir bildirib.
Ailə, Qadın və Uşaq Problemləri üzrə Dövlət Komitəsinin sədri Bahar Muradova ölkədə qadın və ailələrə göstərilən dövlət qayğısından danışıb: “Regionlarda 17 Ailə Dəstək Mərkəzi fəaliyyət göstərir ki, bu mərkəzlər kənd yerlərində yaşayan qadınlar arasında maarifləndirmə işləri aparır, müraciət edənlərə yardım edir. Yaxın gələcəkdə əlavə olaraq 3 yeni Ailə Dəstək Mərkəzi yaradılacaq”.
Sonra iqtisadiyyat nazirinin müavini Sahib Məmmədov, Avropa İttifaqının Azərbaycan nümayəndəliyinin əməkdaşlıq məsələləri üzrə koordinatoru Viktor Bojkov və başqaları çıxış edərək inklüziv inkişafın məqsəd və məramlarından danışdılar.
Çıxışlardan sonra “Dayanıqlı İnkişaf Məqsədlərinə nail olmaq üçün inklüziv artımın və sosial inklüzivliyin daha da gücləndirilməsi perspektivləri” və “2030-cu ilə doğru: İnklüziv sosial-iqtisadi inkişafa baxış” mövzularında panel iclasları keçirilib.
Panel iclaslarında Azərbaycanda sosial-iqtisadi inkişafa dair təqdimatlar olub və məruzələr dinlənilib.
Bölmənin digər xəbərləri
