Bakı, 29 mart, AZƏRTAC

Martın 29-da Qırğızıstanın Azərbaycandakı səfirliyində Əməkdar artist, bəstəkar və müğənni Elza Seyidcahana qırğız musiqisinin inkişafındakı xidmətlərinə görə bu ölkənin Bəstəkarlar İttifaqının üzvlük vəsiqəsi təqdim olunub.

AZƏRTAC xəbər verir ki, Qırğızıstanın ölkəmizdəki səfiri Kayrat Osmonaliyev çıxış edərək Azərbaycanla mədəni əməkdaşlığın inkişaf etdirilməsinin vacibliyini söyləyib.

Səfir deyib: “Biz türk xalqları olaraq qədim tarixi köklərə malikik. Ölkələrimiz arasında siyasi, iqtisadi və mədəni sahədə çox sıx əlaqələr mövcuddur. Biz Elza xanımı Qırğızıstan Bəstəkarlar İttifaqına qəbul etməkdən çox məmnunuq. Belə bir çətin zamanda mədəniyyət sahəsinə önəm vermək olduqca vacibdir, çünki mədəniyyət insanlar arasında sülh yaradır”.

Bildirilib ki, cari ilin fevral ayında Qırğızıstan Bəstəkarlar İttifaqı idarə heyətinin iclasında Azərbaycanın Əməkdar artisti, bəstəkar və müğənni Elza Seyidcahan Türkdilli Dövlətlərin Siyasətinə Dəstək Fondunun təqdimatı ilə qırğız musiqisinin inkişafındakı xidmətlərinə görə Qırğızıstan Bəstəkarlar İttifaqının üzvü seçilib.

Əməkdar incəsənət xadimi, Bəstəkarlar İttifaqının katibi Zemfira Qafarova bildirib ki, indi hər iki ölkə bəstəkarlarının bir-birilərini yaxından tanıması üçün gözəl fürsət yaranıb. O, qırğız bəstəkarlarının əsərləri ilə tanış olmaq və birgə mədəni tədbirlər həyata keçirmək arzusunu ifadə edib.

Tədbirin təşkilatçılarına və iştirakçılarına minnətdarlığını bildirən Elza Seyidcahan qardaş qırğız xalqının Bəstəkarlar İttifaqına üzv seçilməsindən məmnunluğunu söyləyib.

Qırğızıstanda keçirilən “İssık-Kul Musiqi Müsabiqəsi”nin qalibi olduğunu və TÜRKSOY-un xüsusi mükafatını qazandığını diqqətə çatdıran bəstəkar qeyd edib ki, Türkdilli Dövlətlərin Siyasətinə Dəstək Fondunun layihəsi ilə Leyla Əliyevanın sözlərinə yazılmış “İssık-Kul” mahnısını Sayman Aruzun tərcüməsində fars dilində ifa edib.

“Mən və digər azərbaycanlı musiqiçilər bu il keçiriləcək "İssık-Kul- Türkün inci dünyası” festivalında iştirak edəcəyik. Festivalda Leyla Əliyevanın sözlərinə yazılmış “İssık-Kul” mahnısı müxtəlif dövlətlərin ifaçıları tərəfindən 12 dildə təqdim olunacaq”, - deyə bəstəkar bildirib.

O, mətnin müəllifi Leyla Əliyevaya, tərcüməçi Sayman Aruza, musiqi müəllifi Abbasqulu Nəcəfzadəyə, həmçinin Türkdilli Dövlətlərin Siyasətinə Dəstək Fondunun sədri Nüsrət Məmmədova təşəkkür edib.

Mərasimdə iki ölkə arasında mədəni sahədə əlaqələrin daha da gücləndirilməsi məqsədilə birgə layihələrin həyata keçirilməsi, o cümlədən gənc qırğız bəstəkarlarının Bakıda konsertinin təşkili müzakirə olunub.

Sonra səfir Qırğızıstan Bəstəkarlar İttifaqının üzvlük vəsiqəsini Elza Seyidcahana təqdim edib.