Kömürlə heyrətamiz əsərlər yaratmağı onu həmkarlarından fərqləndirir VİDEO
Biləsuvar, 11 aprel, İsmayıl Cəfərli, AZƏRTAC
Haqqında söhbət açacağımız rəssamın əl işlərindən biri İstanbul Universitetinin muzeyində nümayiş olunur. Onun çəkdiyi başqa bir rəsm əsəri isə Türkiyə Prezidenti Rəcəb Tayyib Ərdoğana hədiyyə edilib.
AZƏRTAC xəbər verir ki, ağac kömürü ilə möhtəşəm rəsm əsərləri çəkən Ruslan Qəhrəmanovun rəssamlıq istedadı hələ orta məktəb illərindən üzə çıxıb. Çəkdiyi rəsmləri həmyaşıdları və valideynləri heyranlıqla qarşılayıb. O, orta təhsilini doğulduğu Xırmandalı kəndində alıb. Valideynləri Ruslanın rəsm çəkmək bacarığını görüb, onu Biləsuvar Uşaq İncəsənət Məktəbinə gətiriblər. Burada 3 il rəssamlığın incə sirlərini öyrənərək yaşıdlarından fərqli qabiliyyəti və dərin duyumu sayəsində kursu fərqlənmə ilə bitirib. “Mənim ilk çəkdiyim şəkil atamın olub. 5-ci sinifdə oxuyurdum, ilk əsərimi ailəmdə gördülər. Dedilər ki, təhsilimi elə bu sahə üzrə davam etdirim. Yəni, mən əvvəllər rəssam olmaq fikrində deyildim. Beləliklə, bu sənəti daha dərindən öyrənməyə başladım. Buna da nail oldum. İlk əsərim kömürlə işlədiyim “Yorğun zənci” olub. 2017-ci ildə çəkmişəm”, - deyə gənc rəssam vurğulayıb.
Peşəkar yaradıcılığa başladığı illərdən Ruslan müxtəlif janrlarda özünü doğrulda bilib. Lakin ağac kömürlə işlədiyi heyrətamiz əsərlər isə onu bir çox həmkarlarından fərqləndirən başlıca uğurudur. Rusiya və Gürcüstandakı sərgilərindən sonra 2020-ci ildə “Xocalıya ədalət!” kampaniyası çərçivəsində 4 rəsm əsərinin Türkiyədə nümayiş olunması ona yeni şöhrət gətirib. Həmin sərgidə əsərləri tədbir iştirakçıları tərəfindən böyük maraqla izlənib. Onun sərgidə nümayiş etdirdiyi əsərlərdən biri tədbirə qatılan Türkiyə Prezidenti Rəcəb Tayyib Ərdoğana hədiyyə edilib, digəri isə İstanbul Universitetinin tarix muzeyində qorunur.
Ruslan hazırda Biləsuvar rayon Heydər Əliyev Mərkəzinin rəssamlıq studiyasında fəaliyyət göstərir. İstedadlı rəssam bu günədək yaratdığı 100-dən çox əsərin 80-nə yaxınını kömürlə işləyib. Onların da əksəriyyəti Vətən müharibəsi şəhidlərinə həsr olunub. O deyib: “Respublikada kömürlə əsərlər çəkən yeganə rəssam mənəm. Bu əsərlərim sırasında məni daha çox qürurlandıran şəhidlərin portretini çəkməkdir. 44 günlük müharibəmizdə şəhid olan igidlərimizi yad edirəm. Şəhidlərimizi unutmaq olmaz. “Ana fəryadı” əsərim var. İyul hadisələrinin şəhidi Rəşad Mahmudovun portreti var. Digər şəhidlərimizi də canlandıracağam”.
Bölmənin digər xəbərləri
