20 Yanvar faciəsi - xalqımızın qəhrəmanlıq tarixinin parlaq səhifəsi
Bakı, 17 yanvar, AZƏRTAC
Yanvarın 17-də Yeni Azərbaycan Partiyası (YAP) Xətai rayon təşkilatının və 98 saylı tam orta məktəbin birgə təşkilatçılığı ilə 20 Yanvar faciəsinin 33-cü ildönümünə həsr olunmuş tədbir keçirilib.
AZƏRTAC xəbər verir ki, əvvəlcə Azərbaycanın Dövlət Himni səsləndirilib, şəhidlərimizin xatirəsi anılıb.
98 saylı tam orta məktəbin direktor müavini Bahar Məmmədova bildirib ki, çoxəsrlik tariximizdə qəhrəmanlıq və zəfərlə yanaşı, faciəli səhifələrimiz də var. 20 Yanvar faciəsi tariximizin həm qanlı, həm də qəhrəmanlıq səhifəsidir. Həmin gün uzun illər imperiya əsarəti altında yaşayan xalqımız azadlığa qovuşmaq üçün canından belə keçməyə hazır olduğunu bir daha dünyaya nümayiş etdirdi. Xalqımızın qan yaddaşında əbədi yaşayacaq 20 Yanvar faciəsi hər il Ümumxalq Hüzn Günü kimi geniş qeyd olunur.
Bahar Məmmədova vurğulayıb ki, gənclərimiz tariximizi bilməli, xalqımızın başına gətirilən faciələr barədə dolğun məlumatlara malik olmalıdırlar: “Tarixinə sahib çıxan xalq məğlubedilməzdir. Azərbaycan xalqı hər zaman yenilməzliyi, məğrurluğu ilə dünyanın diqqətində olub. Bu kimi tədbirlər maarifləndirici xarakter daşıyır. Vətənpərvər, milli ruhda tərbiyə olunan gənclərimizin inkişafında, gələcəklə bağlı baxışlarının formalaşmasında məktəblərin rolunu nəzərə alsaq, tariximizdə yer alan hər bir hadisəyə həsr olunan tədbirlər mühüm əhəmiyyətə malikdir”.
YAP Xətai rayon təşkilatının sədri Vüqar Rəhimzadə çıxış edərək bildirib ki, 20 Yanvar faciəsi Azərbaycan xalqının azadlıq mübarizəsinin və qəhrəmanlıq salnaməsinin parlaq səhifəsidir: “1990-cı il yanvarın 19-dan 20-nə keçən gecə keçmiş sovet ordusunun hərbi hissələri Bakı şəhərində öz suverenliyini əldə etmək üçün ayağa qalxan dinc əhaliyə qarşı misli görünməmiş qətliam törətdi. Azərbaycan xalqı göstərdiyi qətiyyəti ilə təsdiqlədi ki, heç bir qüvvə onun milli azadlıq uğrunda mübarizə əzmini qıra bilməz. Xalqımız ölüm saçan o qanlı-qadalı gecəni daim xatırlayır, bu faciəni törədənlərə dərin nifrətini bildirir”.
Vüqar Rəhimzadə bu mühüm məqamı da xüsusi vurğulayıb ki, 1990-cı il yanvarın 21-də sovet rejiminin qadağalarına rəğmən, həyatını təhlükə qarşısında qoyaraq Azərbaycanın Moskvadakı daimi nümayəndəliyinə gələn Ulu Öndər Heydər Əliyev qanlı faciənin təşkilatçılarını dünya ictimaiyyətinin gözü qarşısında ittiham etdi. Cəsarətli bəyanat verərək, əliyalın xalqa qarşı törədilən qırğının hüquqa, demokratiyaya, humanizmə zidd olduğunu, Moskvanın və respublika rəhbərlərinin səhvi ucbatından törədildiyini ifşa etdi.
“Lakin 20 Yanvar qırğını milli azadlıq uğrunda mübarizə aparan insanların iradəsini qıra bilmədi, xalqımız canı-qanı bahasına öz dövlət müstəqilliyini bərpa etdi”, - söyləyən YAP Xətai rayon təşkilatının sədri qeyd edib ki, bu gün müstəqilliyimizin, suverenliyimizin, ərazi bütövlüyümüzün təmin olunması uğrunda canlarından keçən şəhidlərimizin ruhu şaddır: “Azərbaycan Ordusu Müzəffər Ali Baş Komandan İlham Əliyevin rəhbərliyi ilə tariximizin Zəfər səhifəsini yazdı. Zəfərimiz qürurumuz, milli kimliyimiz, baş ucalığımızdır. Azərbaycan xalqı bir daha yenilməzliyini, məğrurluğunu dünyaya nümayiş etdirdi. Şəhidlərimizin ruhu qarşısında baş əyir, qazilərimizə şəfa diləyirik”.
Tədbirin əhəmiyyətindən bəhs edən 98 saylı məktəbin tarix müəllimi Günel Süleymanlı bildirib ki, məqsəd bugünkü və gələcək nəsillərə faciənin əsl mahiyyətini çatdırmaqdır.
Tədbir məktəblilərin ifasında qan yaddaşımıza həsr olunan şeirlərin səsləndirilməsi, səhnəciklərin nümayişi ilə başa çatıb.
Bölmənin digər xəbərləri
