Daşkənddəki “Altın qalam” milli mükafatının verilməsi mərasimi keçirilib VİDEO
Daşkənd, 5 may, АZƏRTAC
Daşkənddəki “Türküstan” Sənət sarayında ХVI “Altın qalam” milli mükafatının verilməsi münasibətilə mərasim keçirilib.
AZƏRTAC xəbər verir ki, hər il keçirilən və Özbəkistanın fəal jurnalistlərinin mükafatlandırılması məqsədilə təşkil edilən mərasimə dövlət və hökumət təmsilçiləri, xarici ölkələrin diplomatik nümayəndəlikləri, jurnalistlər, ölkənin elm, mədəniyyət və incəsənət xadimləri, ictimaiyyətin nümayəndələri iştirak ediblər.
Özbəkistan Jurnalistlər İttifaqının sədri Alimjon Usarov tədbiri giriş sözü ilə açaraq jurnalistikanın ölkənin həyatındakı rolundan və mövqeyindən danışıb, dövlət tərəfindən bu sahəyə göstərilən diqqət və qayğını xüsusi qeyd edib.
Özbəkistan Prezidentinin mətbuat xidmətinin rəhbəri Şerzod Asadov bildirib ki, hər il mətbuat azadlığı günü ilə əlaqədar keçirilən mərasimdə jurnalistikanın müxtəlif sahələrini əhatə edən qələm sahiblərinə “Altın qalam” milli mükafatları verilir. Bu da ölkədə jurnalistikanın daha da inkişaf etməsinə, jurnalistlərin həvəsləndirilməsinə zəmin yaradır.
Sonra qəzet, radio, televiziya, elektron KİV sahəsində fərqlənən jurnalistlərə “Altın qalam” milli mükafatları təqdim edilib.
Türkiyənin TRT televiziya kanalının Özbəkistandakı müxbiri Nizam Şahin də “Altın qalam” milli mükafatını alanlar arasında olub.
Özbəkistandakı Heydər Əliyev adına Azərbaycan Mədəniyyət Mərkəzi (AMM) də jurnalistlərə öz mükafatlarını verib.
AMM-nin direktoru Samir Abbasov öz çıxışında bildirib ki, Özbəkistan mətbuatı ilə sıx əməkdaşlıq platforması yaradaraq, ölkələrimizin dostluğu, mədəniyyəti, nailiyyətləri, Azərbaycanın haqq işinin Özbəkistanda, Mərkəzi Asiyada yayılması istiqamətində mühüm işlər həyata keçirilir. Direktor hər il fərqlənən, müsabiqələrdə qalib olan özbək jurnalistlərin Azərbaycana mediaturunun təşkil edildiyini söyləyib.
Sonra S.Abbasov Azərbaycan-Özbəkistan dostluğu, əməkdaşlığı, ölkəmizin haqq işinin təbliği istiqamətində seçilən özbək jurnalistlərə mükafatları təqdim edib.
“Azərbaycanla Özbəkistan arasında dostluq, əməkdaşlıq, habelə Qarabağ münaqişəsinə dair çoxsaylı məqalələr və nəşrlərin müəllifi Şuxrat Salamova, Azərbaycan mədəniyyəti, ədəbiyyatına dair televiziya verilişinə görə “Özbəkistan tarixi” televiziya kanalının rejissoru, aparıcı Dildora Hasanovaya, “Şuşa İli” və Şuşanın Azərbaycanın mədəniyyət paytaxtı elan edilməsi ilə əlaqədar çoxsaylı məqalələr hazırlayan Özbəkistanın “qalampir.uz” xəbər portalının baş redaktoru Firuzaxon Najmiddinovaya və “ishonch.uz” xəbər portalı və eyni adlı qəzetin jurnalisti Zebo Namazovaya Azərbaycan tərəfinin diplomları, qiymətli hədiyyələri və pul mükafatına layiq görülüblər.
Türkiyə və Çin Xalq Respublikasının səfirlikləri də “Altın qalam” müsabiqəsi üzrə öz mükafatlarını fərqlənən özbək jurnalistlərə təqdim ediblər.
Tədbir çərçivəsində Özbəkistanın tanınmış incəsənət ustalarının iştirakı ilə konsert proqramı təqdim olunub.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
