Fidel Kastronun mükafatlandırdığı pəhləvanın nəvəsindən görünməmiş güc nümayişi FOTO VİDEO
Quba, 19 dekabr, Elxan Yusifli, AZƏRTAC
Altı yaşlı pəhləvan İbrahim Abdulhüseynov dişləri ilə 10 kiloqramlıq çəki daşını qaldırır, şüşə qırıntıları üzərində uzanır, iki tondan ağır avtomobili dartır və başqa çətin nömrələrin öhdəsindən asanlıqla gəlir. Bu, kökdən gələn gücün, Abdulhüseynovlar nəslinin pəhləvanlıq ənənəsinin göstəricisidir.
AZƏRTAC-ın bölgə müxbiri xəbər verir ki, adları “Ginnesin rekordlar kitabı”na düşməyə namizədlərin sırasına daxil edilən qubalı pəhləvanlar Laçın və Hüseyn Abdulhüseynovların övladları da babalarının yolunu davam etdirirlər.
Bu nəslin ilk tanınmış pəhləvanları Əli və Qəmbər qardaşları olub. Əli Abdulhüseynov Dağıstanın xalq pəhləvanı adını qazanıb. Keçmiş sovet dönəmində Əli və Qəmbər qardaşları bütün ittifaq respublikalarında çıxışları ilə tanınıb. Pəhləvan Əli Kubada keçirilən festivalda hamının diqqətini çəkməyi bacarıb. Bir-birindən maraqlı çıxışlarına görə Kuba inqilabının lideri Fidel Kastro tərəfindən mükafatlandırılıb.
“Bizə bu sənət babamızdan, atamızdan miras qalıb. Ona görə borcumuzdur ki, pəhləvanlıq sənətini yaşadaq, gənclərimizə aşılayaq, yaddan çıxmasın. Atamın əsasını qoyduğu “Pəhləvan Əli” idman klubu 30 ildən çoxdur fəaliyyət göstərir. Burada sağlam gələcək yetişir, eyni zamanda, uşaqlara pəhləvanlığın sirləri öyrədilir. Pəhləvanlıq irsən keçən, kökdən gələn gücdür. Bununla yanaşı, pəhləvanın səhnə mədəniyyəti, insanları ələ almaq bacarığı da olmalıdır”,- deyə Laçın Abdulhüseynov bildirib.
Müstəqillik dönəmində Laçın və Hüseyn Abdulhüseynovlar Azərbaycanın məşhur el sənətini bütün dünyada tanıtmağa nail olublar. Bir-birinin ardınca rekordları yeniləyən qardaşlar dünyanın 24 ölkəsində yarış və televiziya şou proqramlarında çıxış ediblər. 2017-ci ildə qubalı pəhləvan qardaşlar Amerika Birləşmiş Ştatlarının “America's Got Talent” teleşousunda iştirak edərək amerikalı tamaşaçıları da öz qeyri-adi nömrələri ilə şoka salmağı bacarıblar. Abdulhüseynov qardaşları Türkiyə, Rusiya, İtaliya, Ukrayna, Gürcüstan, Kolumbiya, Rumıniya və bir çox başqa ölkələrdə qeyri-adi istedada malik insanların çıxış etdikləri şou proqramlarında yaddaqalan nömrələr göstəriblər. Onların bir çox nömrələri ekspertlər tərəfindən efir üçün təhlükəli olduğu üçün yayımlanmayıb.
Laçın qeyri-adi üsulla göz nahiyəsində 33 kiloqram ağırlığı qaldırmaq, kəsici-deşici aləti boğaz boşluğuna söykəməklə avtomobil itələmək və heç bir qoruyucu vasitə olmadan biləyi üzərindən 2 tonluq maşını keçirməklə dünya rekorduna imza atıb. Onun qardaşı Hüseyn isə boğaz boşluğunda 33 kiloqram daş asmaqla, ayaqları üzərindən 3,4 ton ağırlığında avtomobili keçirməklə fərqlənib. Qubalı qardaşlar doqquzqat dünya rekordçularıdır.
“Pəhləvanlıq həm də vətənpərvərlik məktəbidir. Bizim üç yetirməmiz Vətən müharibəsində şəhidlik zirvəsinə ucalıb. Gənclərimizi sağlam ruhda böyütmək lazımdır. Bizim də övladlarımız yolumuzu davam etdirirlər. Atam həmişə “pəhləvanın oğlu pəhləvan olar” deyirdi. Ənənə davam edir”,- deyə Laçın Abdulhüseynov söyləyib.
Hazırda Abdulhüseynovlar ailəsinin daha 5 üzvü pəhləvanlığın sirlərini öyrənir. İbrahim, Kənan, Əli, Emil və Cavid yaşlarının az olmasın baxmayaraq bir çox rayon tədbirlərində, güclərini qüvvələrini sınayıblar.
Pəhləvanlardan ən kiçiyi Laçın Abdulhüseynovun oğlu İbrahimdir. Altı yaşlı İbrahim atası və babası kimi güclü və məşhur pəhləvan olmaq istəyir. Hələ dörd yaşı olanda çəki daşları ilə məşq etməyə başlayıb. Ən xoşladığı nömrə isə avtomobil dartmaqdır. O, bu yaşda iki tondan ağır avtomobil dartmaqla da məşhurlaşıb.
Təqdim olunan nömrələrin bir çoxu uşaqlar üçün riskli olduğundan davamlı məşq və diqqət tələb edir. Uşaqlar xüsusi texnikanı qavramadan təhlükəli nömrələrin icrasına icazə verilmir.
“Bir çox nömrələr uşaqlar üçün təhlükəlidir. Kimsə evdə baxıb təkrarlamağa çalışmasın. Bizim uşaqların yaşı az olsa da, xeyli təcrübələri var. Dəfələrlə səhnələrdə çıxış ediblər. Bütün nömrələrin icrasının öz texnikası var. Bədən, dəri möhkəm olmalıdır. Fiziki cəhətdən dözümlülük üçün məşqlər edilməlidir. Pəhləvanlar məşq zamanı düzgün tənəffüs formalaşdırmasına xüsusilə fikir verməlidirlər. Havanın qarın boşluğunda idarə edilməsi və qarın əzələlərinin məşqləri olduqca vacibdir”, - deyə Laçın Abdulhüseynov bildirib.
Abdulhüseynovlar pəhləvanlıq ənənəsini yaşatmaq, nəsildən-nəsilə ötürərək el sənətini yaşatmaq arzusundadırlar.
Bölmənin digər xəbərləri
