REGİONLAR
Qaxda qızılcaya yoluxan azyaşlılar həkim nəzarətindədir - REPORTAJ VİDEO
Qax, 4 dekabr, AZƏRTAC
Qax rayonunda da qızılcaya yoluxma faktı qeydə alınıb. Yoluxma aşkar edilən kimi rayonda bu istiqamətdə müvafiq tədbirlərin görülməsinə başlanılıb. Xüsusən məktəblər və uşaq bağçalarında dezinfeksiya işləri aparılır.
AZƏRTAC xəbər verir ki, rayonda ilk yoluxma hallarına Gülük və Qarabaldır kəndində təsadüf edilib. Azyaşlılarda qızılca əlaməti aşkar edilib və dərhal həkim nəzarətinə götürülüb. Hazırda hər iki uşaq Qax Rayon Mərkəzi Xəstəxanasında müalicə alır.
Həkimlər bildirirlər ki, son vaxtlar ölkədə qızılcanın yayılmasından narahat olan valideynlər uşaqlarını peyvənd etdirmək üçün həkim məntəqələrinə daha çox müraciət edirlər.
Qax Rayon Mərkəzi Xəstəxanasının həkimi Dilşaq Poladova deyir ki, qızılcaya yoluxanlar Məmmədli Abdurahman və Sahibə Babayevadır. Hər iki uşaq xəstəxananın infeksion şöbəsində müalicə alır.
Həkim bildirib ki, son vaxtlar xəstəliklə bağlı, demək olar, rayonun bütün kəndlərində qapı-qapı düşərək valideynlərlə maarifləndirmə, izahat işi aparılır. “Qızılca xəstəliyinə yüngül xəstəlik kimi baxmağı tövsiyə etmirəm. Qızılcanın ağırlaşmaları var, meningit, ensifalit, sətəlcəm kimi. Ona görə bir daha valideynlərə müraciət edirik ki, uşaqların həyatını təhlükəyə atmasınlar”, - deyən həkim, son günlər valideynlərin xəstəxanaya, kənd həkim məntəqələrinə gələrək uşaqlarını müayinə etdirdiklərini müsbət hal kimi qiymətləndirib.
Rayonun Qarabaldır kənd sakini Şəhanə Balayevanın 4 yaşlı oğlu Abdurəhman Məmmədli bu günlərdə qızılca xəstəliyinə yoluxub. Qadının sözlərinə görə, övladında narahatlıq və hərarət hiss etdikdən sonra dərhal həkimə müraciət edib. Qadın etiraf edir ki, uşaqları bir aya yaxın öskürəkdən əziyyət çəksə də, fikir verməyiblər, türkəçarələrlə sağalacağını zənn ediblər. Lakin ötən həftədən uşaqda qızdırmalar olub və xəstəxanaya gəliblər. Şəhanə Balayeva valideynlərə müraciət edərək, hər hansı ilkin əlamət olduqda dərhal həkimlə əlaqə saxlamağı tövsiyə edir.
Bu xəstəliyin əsasən məktəblilər arasında yayılması bölgə və rayon təhsil ocaqlarında müvafiq qabaqlayıcı tədbirlərin görülməsini vacib edib. Məsələ ilə əlaqədar Şəki-Zaqatala Regional Təhsil İdarəsinin əməkdaşı Mahal Məmmədov bildirib ki, idarənin tabeliyində olan ümumi təhsil müəssisələrində dezinfeksiya işləri aparılır. İdarənin əhatə etdiyi 1 şəhər və 5 rayonun ümumi və məktəbəqədər təhsil müəssisələri dezinfeksiya olunur.
Qızılca xəstəliyinə yoluxma halı ölkənin şimal-qərb bölgəsində ilk dəfə sentyabr ayının ikinci ongünlüyündə Şəki Şəhər İnteqrasiya Təlimli İnternat Tipli Gimnaziyada qeydə alınıb. Oktyabrın birinci ongünlüyündə isə bölgədə Zaqatala rayonunda qızılca xəstəliyi qeydə alınıb.