Bayramqabağı bazarlarda hind toyuğuna tələbat artıb – Ağstafadan reportaj VİDEO
Ağstafa, 28 dekabr, R.Novruzoğlu, AZƏRTAC
Ölkəmizdə hind toyuğu, qaz və ördək ətinə tələbat ildən-ilə artmaqdadır. Bu ev quşları bayramlarda daha çox satışa çıxarılır.
AZƏRTAC xəbər verir ki, Ağstafada fərdi təsərrüfatlarda bəslənən hind toyuqlarını təsərrüfat sahibləri bu il də demək olar, ötənilki qiymətə satırlar. Hazırda hind toyuğunun əti erkək və fərə olmasından asılı olaraq 15-18 manata, diri halda isə çəkisi nəzərə alınmaqla, 40-60 manatadır. Bu qiymətlər keçən il də təxminən belə olub.
Yeni ilə sayılı günlər qaldıqca bazarlarda hind toyuğuna tələbat da artır. Bu quşların alıcısı qaz və ördəyə nisbətən daha çoxdur. İnsanlar bayram süfrələrində hind toyuğunun ətinin olmasını da istəyirlər. Hər Yeni il bayramında bu quşun ətinin süfrədə olması bir növ ənənə halını alıb.
Ağstafa bazarında da bayram öncəsi alıcıların aktivliyi hiss olunur. Burada əksər ev quşları satılır. Qaz və ördəyin qiyməti keçən bayrama nisbətən aşağıdır. Keçən bayram 35-40 manata satılan qaz, indi 28-30 manata təklif edilir. Ördək isə 12-15 manatadır. Ən az alınan da elə ördək və toyuqlardır. Toyuğun qiyməti 10-12 manatdır.
Hind toyuğu isə necə deyərlər, hər il öz dəyərini qoruyub saxlayır. Qazax sakini Ədalət Məmmədov Ağstafa bazarına hind toyuğu və ya qaz almaq üçün gəlib: “Qazax şəhərinə baxanda Ağstafanın bazarında çeşidlilik var. Qaz və hind toyuğu ilə maraqlanıram. Bura ətraf kəndlərdən həmişə ev quşları gətirirlər, ona görə də qiymətlər ucuzdur. İndidən bazarlıq edirik ki, dekabrın 30-da qiymətlər baha olacaq. Bayram süfrəsində hind toyuğunun bozartması, kababı olmalıdır. Yadımdadır ki, mən hələ uşaq olanda deyirdilər: “Qazı, ördəyi qar yağanda yemək lazımdır”. Yəni, onda əti daha təmiz olur, hərçənd ki, indi qar yağmır”.
Ağstafa rayonunda son illər fərdi hind toyuğu təsərrüfatlarının sayı da çoxalıb. Bayram ərəfəsində bazarlara çıxarılan bu quşların ətinin keyfiyyət baxımından üstün cəhəti ondadır ki, bunlar inkubator şəraitində deyil, evlərdə, fərdi təsərrüfatlarda bəslənmiş hind toyuqlarıdır. Satıcılar deyirlər ki, kəsilmiş erkək hind toyuğunun 1 kiloqramı 15 manata, fərə hind toyuğu isə 16-17 manata satılır. Fərə hind toyuğunun ətinin nisbətən dadlı və yumşaq olması onun qiymətinə də təsir edir.
Alıcı Rəfael Məmmədov bayramqabağı rayon bazarına hind toyuğu və toyuq beçəsi almağa gəlib. Deyir ki, hind toyuğu çəkisindən asılı olaraq 55-60 manatadır. “Qiymətlər pis deyil. Qaz da ucuzlaşıb, 35 manat idisə, indi 30 manata yaxşı qaz almaq olur. Mən hind toyuğu ilə maraqlanırdım. İstəyirəm ki, Yeni il süfrəsində hind toyuğunun əti də olsun”, - deyə o bildirir.
Bəziləri hətta ev quşunu alıb elə bazarda kəsdirir, təmizlətdirərək evə aparır. “Yeni il ərəfəsi gələnlərin çoxu qaz, ördək, hind toyuğu alır. Digər ev quşları elə də çox satılmır. Biz satdıqlarımız hamısı ev şəraitində təbii bəslənən quşlardır. Göy ot yeyən, buğda, arpa ilə bəslənmiş quşlardır”, - deyə satıcı Nazilə Tağıyeva vurğulayır.
Hind toyuğu olduqca zərif və soyuğa dözümsüz olur. Elə buna görə də hər təsərrüfat sahibi sona qədər bu sahədə uğur əldə bilmir. Qiymətlərinin digər quşlara nisbətən baha olması da bununla əlaqədardır.
Bölmənin digər xəbərləri
