FHN Bakı Şəhər Halqası Əməliyyat Şirkəti ilə birgə marşallar üçün təlimlər keçirib VİDEO
Bakı, 25 avqust, Göyçək Mahmudlu, AZƏRTAC
Formula 1 Qatar Airways Azərbaycan Qran-Prisi 2024-ə hazırlıq çərçivəsində Fövqəladə Hallar Nazirliyinin (FHN) Akademiyasında yanğından mühafizə və xilasetmə üzrə ixtisaslaşmış marşallar üçün növbəti təlim keçirilib.
AZƏRTAC xəbər verir ki, təlimin nəzəri hissəsində tədbir iştirakçılarına Bakı Şəhər Halqasının yanğınsöndürən marşallar komandası tərəfindən yanğın təhlükəsizliyi, mümkün belə hadisələrin qarşısının alınması və xilasetmə tədbirlərinin təşkili istiqamətində onların bacarıqlarının möhkəmləndirilməsi məqsədilə təqdimatlar edilib.
Praktiki hissədə isə FHN-in peşəkar yanğınsöndürən və xilasedicilərinə yanğın təhlükəsizliyi və xilasetmə işlərində istifadə olunan xüsusi texnika və avadanlıqlarla davranış qaydaları əyani şəkildə izah olunub.
Fövqəladə Hallar Nazirliyinin Əməliyyat planlaşdırma şöbəsinin rəisi, polkovnik-leytenant Elvin Ağayevin sözlərinə görə, FHN-in Baş əməliyyat idarəsi və Bakı Şəhər Halqası Əməliyyat Şirkəti tərəfindən təşkil olunan təlimin keçirilməsində məqsəd yarışlar zamanı baş verə biləcək yanğınların qarşısının alınması və onun fəsadlarının çevik şəkildə aradan qaldırılması üçün marşalların bacarıq və təcrübələrinin artırılması olub.
Bildirilib ki, nəzəri və praktiki hissələrdən ibarət təlimdə 200 nəfərə yaxın marşal iştirak edib. Onlardan 68 nəfəri FHN-in peşəkar yanğınsöndürən və xilasediciləridir.
E.Ağayev bu ilin iyun ayından başlayan təlimlərin artıq 5-ci dəfədir keçirildiyini də diqqətə çatdırıb.
Bakı Şəhər Halqası Əməliyyat Şirkətində idman departamentinin idman əməliyyatları üzrə baş mütəxəssisi Kamal Əliyarzadə marşalların 21 yaşdan yuxarı şəxslərdən ibarət olduğunu, kişi və qadınların nisbətinin isə müvafiq olaraq 65 və 35 faiz təşkil etdiyini qeyd edib: "Ötən illərə nisbətən qadınların sayı artıb. Ümumilikdə isə keçən mövsümün marşal heyətinin 80 faizini saxlamaq şərti ilə 2 min 800 nəfərin marşal olmaq istəyini qeydə almışıq. Onların arasından isə çatışmayan 20 faiz seçilib".
Təlimlərdə iştirak edən yanğınsöndürən marşal Zəhra Məmmədli əvvəllər könüllü kimi fəaliyyət göstərdiyini, marşalların işi ilə tanış olduqdan sonra bunun onu cəlb etdiyini deyib: "Bu il Formula 1 yarışlarında yanğınsöndürən marşal olaraq fəaliyyət göstərəcəyəm. Mənim üçün də yeni və ilk təcrübədir. Düşünürəm ki, burada öyrəndiyimiz nəzəri və praktik biliklər normal gündəlik həyat tərzimizdə də köməyimizə çatacaq. Çox maraqlı və çox həyəcanlıdır. Əminəm ki, burada öyrəndiklərimizi yarış zamanı professional şəkildə yerinə yetirə biləcəyik".
İtaliyalı marşal Federiko Paone isə ikinci dəfədir ki, marşal kimi Bakı Qran-Prisində fəaliyyət göstərdiyini deyib: "Keçən il keçirilən Bakı Qran-Prisindən böyük həzz aldım. Bu, çox maraqlı təcrübədir. Bakı Şəhər Halqası Əməliyyat Şirkəti çox böyük bir təşkilatdır və marşalların təlim prosesinə böyük peşəkarlıqla yanaşır. Artıq 6 ildir ki, Bakıda yaşayıram. İki ildir ki, Bakı Marşal klubunun üzvüyəm. Marşal fəaliyyətimlə mən Bakı Qran-Prisinə töhfəmi vermək istəyirəm".
Qeyd edək ki, növbəti Formula 1 Azərbaycan Qran-Prisi bu ilin sentyabrın 13-dən 15-dək Bakıda keçiriləcək. Yarış müddətində Fövqəladə Hallar Nazirliyinin 30 ədəddən çox xüsusi texnikası və 400 nəfərə yaxın canlı qüvvəsinin cəlb olunması nəzərdə tutulub.
Bölmənin digər xəbərləri
