Lənkəranda çəltik əkini müasir texnikalarla aparılır FOTO VİDEO
Lənkəran, 19 may, İlkin Adıyev, AZƏRTAC
Cənub bölgəsində çəltik əkininə başlanılıb. Lənkəranda aprel ayının əvvəllərindən əkinə hazırlıq işlərinə start verilib və şitillər xüsusi şəraitdə yetişdirilib. Artıq bir neçə gündür ki, şitillərin sahələrə köçürülməsinə başlanılıb.
AZƏRTAC-ın bölgə müxbiri xəbər verir ki, Lənkəranda çəltik əkini Cənubi Koreyadan gətirilmiş müasir texnikalar vasitəsilə həyata keçirilir. Texnikalardan istifadə ənənəvi əl əməyinə nisbətən daha səmərəli olmaqla yanaşı, həm də xərcləri əhəmiyyətli dərəcədə azaldır.
Bu texnikaların üstünlüyü yalnız əkinin keyfiyyətində deyil, eyni zamanda, yüksək iş sürətində də özünü göstərir. Belə ki, bu texnikalar vasitəsilə bir gün ərzində təxminən dörd hektar sahədə əkin aparmaq mümkündür. Şitilləri 25 santimetr dərinliyə qədər torpağa dəqiqliklə basdıran bu maşınlar əkinə başlamazdan əvvəl sahənin tam şəkildə təmizlənməsini tələb edir. Əgər ərazidə daş və ya digər maneələr olarsa, texnikanın sıradan çıxması riski yaranır.
Çəltikçilik sahəsində məhsuldarlığın artırılması məqsədilə bu il əvvəlki illərlə müqayisədə daha geniş əkin sahələri ayrılıb. Əsas hədəf isə dəyişməz qalır: bol məhsul və daha səmərəli əkin prosesi.
Aqronom Möhtəmən Fərziyev builki əkin mövsümünün nəticələrini qiymətləndirərək bildirib ki, keçən il hər hektardan orta hesabla 7,3 ton çəltik əldə olunmuşdu. Bu da olduqca yüksək göstərici sayılırdı. “Daha yüksək nəticələr əldə etməyə çalışırıq. Arzumuz budur ki, məhsuldarlıq hər hektara 7–8 ton səviyyəsində olsun” , – deyə Möhtəmən Fərziyev deyir.
Bu məqsədə çatmaq üçün yeni toxum sortlarının sınaqdan keçirilməsinə başlanılıb. Xüsusilə də Hindistandan gətirilmiş yüksək məhsuldar çəltik sortlarına böyük ümid bəslənilir.
“Əldə etdiyimiz ilkin nəticələr ümidvericidir. Bəzi sahələrdə artıq 5–6 ton məhsul götürmüşük. Bu da onu göstərir ki, düzgün aqrotexniki qulluq və effektiv toxum seçimi ilə məhsuldarlığı artırmaq mümkündür,” – deyə o əlavə edib.
Lənkəran Rayon Statistika İdarəsindən bildirilib ki, ötən il rayonda ümumilikdə 628,1 hektar ərazidə çəltik əkini aparılıb. Bu sahələrdən 2763,4 ton məhsul yığılıb. Orta məhsuldarlıq isə hər hektara 44 sentner təşkil edib.
Bölmənin digər xəbərləri
