Uşaq inkişaf mərkəzinin şagirdləri rusiyalı kosmonavt Fyodor Yurçixin ilə virtual bağlantı yaradıblar VİDEO
Bakı, 24 may, AZƏRTAC
Azərbaycan Kosmik Agentliyi (“Azərkosmos”) nəzdində fəaliyyət göstərən Kosmik Akademiyada “Uniq” uşaq inkişaf mərkəzinin təşkilatçılığı ilə rusiyalı kosmonavt, mühəndis və Beynəlxalq Kosmik Stansiyanın (BKS) təcrübəli iştirakçısı Fyodor Nikolayeviç Yurçixin ilə virtual görüş keçirilib.
AZƏRTAC xəbər verir ki, tədbirdə 153 nömrəli orta məktəbin nəzdində fəaliyyət göstərən 3 saylı Uşaq-gənclər inkişaf mərkəzinin “Proqramlaşdırma” dərnəyinin şagirdləri, “Uniq” uşaq inkişaf mərkəzinin üzvləri və onların valideynləri iştirak edib.
Tədbirdə çıxış edən “Proqramlaşdırma” dərnəyinin rəhbəri Zaur Əliyev tədbir iştirakçılarına kosmonavt Fyodor Yurçixin barədə ətraflı məlumat verib. O qeyd edib ki, Rusiya kosmonavtı, mühəndis və Beynəlxalq Kosmik Stansiyanın (BKS) təcrübəli iştirakçısı olan Fyodor Yurçixin beş kosmik missiyada iştirak edib.
Bildirilib ki, Fyodor Yurçixin 3 yanvar 1959-cu ildə Gürcüstan SSR-in Batumi şəhərində anadan olub. O, Moskva Aviasiya İnstitutunu bitirib və mühəndis kimi fəaliyyətə başlayıb. Yurçixin əvvəlcə “Energiya” Raket Kosmik Korporasiyasında kosmik gəmilərin dizaynı və idarə edilməsi üzrə işləyib.
Fyodor Yurçixin 1997-ci ildə Rusiya Kosmik Agentliyinin (“Roskosmos”) kosmonavtlar korpusuna seçilib. O, beş kosmik missiyada iştirak edib. 2002-ci ildə “STS-112” adlı missiya zamanı F.Yurçixin “Atlantis” kosmik gəmisi ilə BKS-ə uçub və stansiyanın qurulması işlərində iştirak edib. 2007-ci ildə “Soyuz TMA-10” missiyasında Yurçixin BKS-in 15-ci əsas ekipajının üzvü kimi 6 ay stansiyada qalıb və bir neçə fəza gəzintisi həyata keçirib. “Soyuz TMA-19” (2010) missiyası zamanı o, BKS-in 24-cü əsas ekipajının komandiri kimi fəaliyyət göstərib. “Soyuz TMA-09M” (2013) – Yurçixin, BKS-in 36-cı əsas ekipajının üzvü kimi yenidən stansiyada uzunmüddətli missiya həyata keçirib. “Soyuz MS-04” (2017) missiyası onun son kosmik uçuşu olub. O, BKS-in 51-ci və 52-ci əsas ekipajlarının üzvü kimi fəaliyyət göstərib.
F.Yurçixin kosmosda ümumi 672 gün keçirərək Rusiyanın ən təcrübəli kosmonavtlarından biri oldu. O, həmçinin 9 fəza gəzintisi həyata keçirib və kosmik stansiyanın qurulması və təmir işlərində fəal iştirak edib.
Kosmik uçuşlardan sonra Fyodor Yurçixin “Roskosmos”da məsləhətçi kimi çalışıb və gənc kosmonavtların hazırlanmasında iştirak edib. O, həmçinin kosmik təhsil və elmi təbliğat sahəsində fəal iştirak edir.
F.Yurçixinin mükafatları və nailiyyətləri barədə məlumat verən Z.Əliyev bildirib ki, kosmonavt 2008-ci ildə “Rusiya Qəhrəmanı”, “Lenin” ordeni və digər yüksək dövlət mükafatlarına layiq görülüb. Kosmik tədqiqatlarda əvəzolunmaz töhfələrinə görə dünyada tanınıb.
Virtual bağlantı zamanı Fyodor Yurçixin kosmosda olmaq imkanı olduğu üçün özünü çox şanslı insan hesab etdiyini qeyd edib.
Tədbir çərçivəsində uşaqların suallarını cavablandıran kosmonavt Fyodor Yurçixin deyib: “Bizim evimiz - bizim planetimizdir. Hər bir insan bizim Yer planetimizi ailəmizi və evimizi qoruduğu kimi qorumalıdır. Mən çox xoşbəxt insanam ki, bizim planetimizə kosmosdan baxmışam və onun necə gözəl olduğunu müşahidə etmişəm. Əgər sizin də böyük xəyalınız varsa, mütləq ardınca gedin və arzunuzu reallaşdıranadək dayanmayın”, - deyə Fyodor Yurçixin vurğulayıb.
Sovet kosmonavtı, Sovet İttifaqı Qəhrəmanı, kosmosa uçan ilk insan Yuri Qaqarinin daim öz idealı olduğunu diqqətə çatdıran F.Yurçixin uşaqlara kosmik səyahət barədə ətraflı danışıb.
Tədbir çərçivəsində dərnək fəaliyyətində fərqlənən şagirdlərə sertifikatlar və xatirə hədiyyələri təqdim olunub.
Bölmənin digər xəbərləri
