Bonn şəhərində NDC 3.0 prosesində gənclərin və uşaqların iştirakına dair panel sessiya keçirilib VİDEO
Bonn, 18 iyun, Pərvanə Qafarova, Elvin Mövsümov, AZƏRTAC
İyunun 18-də Almaniyanın Bonn şəhərində Birləşmiş Millətlər Təşkilatının İqlim Dəyişikliyi üzrə Çərçivə Konvensiyası (UNFCCC) çərçivəsində Subsidiar Orqanların 62-ci sessiyası (SB62) zamanı COP30 və COP29 Sədrliyinin “NDC 3.0 prosesində gənclərin və uşaqların mənalı iştirakı üçün nəsillərarası dialoqun gücləndirilməsi” mövzusunda birgə panel sessiyası keçirilib.
AZƏRTAC xəbər verir ki, tədbirdə Braziliyada keçiriləcək COP30-un İqlim dəyişikliyi üzrə çempionu Marcella Oliveira və COP29-un İqlim üzrə gənclər çempionu Leyla Həsənova, eləcə də Braziliyanın iqlim dəyişikliyi üzrə katibi, COP30-un icraçı direktoru Ana Toni iştirak ediblər.
Öncə Marcella Oliveira Azərbaycanın sədrliyi dövründə gördükləri layihələrin əhəmiyyətini xüsusi vurğulayıb.
Sonra “Mutirao” mövzusunda videotəqdimat edilib.
Braziliyanın COP30 Gənc iqlim çempionu bildirib ki, ötən il noyabrda ilk dəfə gənclər və uşaqlar mövzusu ön plana çıxdı, belə ki, COP29-da Uşaq və gənclərin iqlim dəyişikliyinə qarşı mübarizədə rolu barədə Bakı Bəyannaməsi qəbul olundu.
“Uşaq və gənclərin iqlim dəyişikliyinə qarşı mübarizədə rolu konkret tədbirlərlə müşayiət olunmalıdır. Biz hələ də bu qruplara xüsusi diqqət yetirən maarifləndiricilərə və dəqiq hədəflərə ehtiyac duyuruq. Eləcə də iqlim öhdəliklərinin hazırlanması, icrası və monitorinqi mərhələlərində daha geniş ictimai iştirak təmin olunmalıdır. Yenilənmiş Milli Səviyyədə Müəyyən edilmiş Töhfələr (NDC) 2030 və 2035-ci illər üçün 2005-ci illə müqayisədə xalis istixana qazı emissiyalarının 59 faizdən 67 faizədək azaldılması üzrə milli hədəfi müəyyən edir. UNICEF-in Braziliyadakı nümayəndəsinin də qeyd etdiyi kimi, əgər Braziliya mümkün olan ən iddialı azalma strategiyalarını qəbul edərsə, həm indiki, həm də gələcək nəsil uşaqlar şübhəsiz fayda görəcək.
Bilirik ki, NDC-lər ərazilərimizə, həyatımıza, gənclərimizə və gələcək nəsillərimizə təsir göstərmək baxımından olduqca vacibdir. Bu, sabahın deyil, bu günün mövzusudur. Buna görə də bütün tərəflərdən keyfiyyətli və effektiv NDC-lər tələb olunur. Biz də nəsillərarası dialoq üçün buradayıq. Braziliya təkbaşına hərəkət edə bilməz və buna görə də bu, TROİKA çərçivəsində fəaliyyət göstərir. Hazırda cəmi 22 ölkə yeni NDC-lərini təqdim edib. Digər tərəflərin də bu nümunəni izləməsi və təcili hərəkət etməsi zəruridir. Ən əsası isə, qəbul olunan iqlim planlarının yalnız böyüklər tərəfindən hazırlanmasının yetərli olmadığını başa düşməliyik”, - deyə Marcella Oliveira əlavə edib.
Braziliyanın iqlim dəyişikliyi üzrə katibi, COP30-un icraçı direktoru Ana Toni çıxışında bildirib ki, ilk dəfə 2003-cü ildə COP-a qatılıb: “Kaş o dövrlərdə gənc iqlim səfirləri, gənc iqlim liderləri də olaydı. O vaxt yox idi, amma gənclər həmin konvensiyanın başlanğıcında da iştirak edirdilər. O zaman bizə necə ehtiyac var idisə, bu gün də bir o qədər ehtiyac var. Çünki o vaxtdan bu günə qədər illər keçdi və mən indi Ətraf Mühit Nazirliyində iqlim dəyişikliyi üzrə milli katib kimi fəaliyyət göstərirəm. Yeni NDC-nin hazırlanmasına cavabdehəm – əlbəttə, digər hökumət nümayəndələri ilə birlikdə. Sən o kresloda əyləşib 2035-ci il üçün NDC hazırlamalı olanda, doğrudan da sual yaranır: haradan başlamalısan? Necə başlamalısan?
İlk instinkt təbii ki, digər nazirliklərdəki həmkarlarla danışmaq olur – biz də məhz belə etdik. Əvvəlcə biz 23 nazirliklə danışıqlar aparmalı olduq ki, onların hər birini bu prosesə cəlb edək. Bu, asan vəzifə deyil – nəqliyyat nazirliyi, energetika nazirliyi, səhiyyə nazirliyi - hamısının bu masada yer alması lazımdır – təkcə hökumət daxilində belə. Ardınca özəl sektor qapını döyür, vətəndaş cəmiyyəti qapını döyür, regional və yerli idarəetmə qurumları qapını döyür. Hamı iştirak etmək istəyir”, - deyə Ana Toni əlavə edib.
COP29-un İqlim üzrə gənclər çempionu Leyla Həsənova çıxışında bildirib ki, Azərbaycanın ev sahibliyi etdiyi iqlim sammitində proseslərin mahiyyəti gənclərin daha yaxşı anlaması üçün daha aydın şəkildə təqdim edildi. İl ərzində COP29 gənclərə həqiqi və mənalı iştirakın nə demək olduğunu ifadə edə biləcəkləri məkanlar yaratdı. İkitərəfli görüşlərdən tutmuş yüksəksəviyyəli tədbirlərə qədər, biz uşaqların və gənclərin baxışlarının olması məsələsini hər zaman diqqətdə saxladıq. Uşaqlar kənarda qalmamalıdır. İştirak təkcə məsləhətləşmə və təhsillə kifayətlənməməlidir – eyni zamanda, uşaqlara həssas göstəricilərin yeni NDC-lərdə izlənilməsini əhatə etməlidir. Bu sahədə UNICEF-in təqdim etdiyi alətlər və digər resurslar çox yaxşı başlanğıc nöqtəsidir.
Uşaqların və gənclərin mənalı şəkildə cəlb olunması sadəcə simvolik bir jest deyil – bu, strateji bir zərurətdir. NDC 3.0 prosesi artıq bir çox ölkələrdə başlayıbdır və bu, sevindiricidir”, - deyə Leyla Həsənova vurğulayıb.
Bölmənin digər xəbərləri
