Qışlıq şəkər çuğundurunun sınaq əkini uğurlu alınıb - sahələrdən bol məhsul yığılır FOTO VİDEO
İmişli, 15 iyul, Aydın Yavərzadə, AZƏRTAC
Ölkəmizdə yazlıq şəkər çuğundurundan əlavə, qışlıq şəkər çuğunduru da becərilir. Bu sahədə aparılan sınaqlar özünü doğruldub və iki ildir ki, kütləvi şəkildə becərmə işləri görülür, sahələrdən bol məhsul toplanılır.
AZƏRTAC-ın bölgə müxbirinin məlumatına görə, qışlıq şəkər çuğundurunun becərilməsi üçün əvvəlcə sınaq əkini aparılıb. Almaniya, Belçika, Danimarka və Fransadan gətirilən 13 sort sınaqdan keçirilib və 6 sort əkin üçün məqsədəuyğun sayılıb. Həmin sortlar hesabına iki ildir ki, ölkə ərazisində qışlıq şəkər çuğunduru becərilir və yüksək məhsul əldə edilir.
İmişli Şəkər Zavodunda qəbulu həyata keçirilən məhsulun alış qiymətində də artım var. Belə ki, 16 faiz şəkərlilik dərəcəsi olan məhsulun hər tonu 87 manata qəbul edilir. Artan hər bir şəkərlilik dərəcəsinə görə fermerlər məhsulun tonuna əlavə 3 manat alırlar. Bundan başqa, əkin sahələrində ənənəvi suvarma aparan fermerlər məhsulun hər tonuna görə 19 manat, sahələrini müasir suvarma sistemləri ilə suvaran fermerlər isə 22 manat əlavə subsidiya almaq imkanı əldə edirlər.
“AŞİB Aqro” MMC-nin baş inspektoru Ərəstun Göyüşov bildirir ki, şəkər çuğunduru əkini xaricdən şəkər idxalına tələbatın azaldılmasında xüsusi əhəmiyyətə malikdir. Bu məqsədlə şəkər çuğunduru sahələri hər il artırılır: “Ənənəvi olaraq respublikada adətən yazlıq şəkər çuğunduru əkilib. Artıq son illər qışlıq şəkər çuğundurunun əkininə də başlanılıb. Bu il 1200 hektar sahədə qışlıq şəkər çuğunduru becərilib. Yığım aparılan 880 hektar sahədən 31 min 500 ton məhsul tədarük olunub. Orta hesabla hər hektara 37 tondan çox məhsul götürülür və məhsulun şəkərlilik faizi 15-16 faizdir”.
Onun sözlərinə görə, qışlıq şəkər çuğunduru oktyabr ayında əkilir və əsas yetişmə dövrü qış aylarına təsadüf etdiyi üçün cəmi iki dəfə suvarmaqla bol məhsul əldə etmək olur. “Bu əkinin digər üstünlüyü isə qış mövsümündə zərərvericilərdən və xəstəliklərdən azad olmasıdır. Bütün bu amillər qışlıq əkin sahələrinin genişlənməsinə gətirib çıxarıb. Ötən ilin məhsulu üçün 600 hektar sahədə qışlıq şəkər çuğunduru becərildiyi halda, bu il sahələr iki dəfə artırılıb. Növbəti il üçün də sahələrin genişləndirilməsi nəzərdə tutulub”, - deyə o əlavə edib.
Şəkər çuğunduru əkən fermer Möhübbət Məmmədov isə deyir ki, qışlıq çuğundurun becərilməsində çəkilən xərclər də azalır. O, hər hektara 50-60 ton məhsul götürdüyünü bildirir: “Məhsulun bol olması ilə bərabər, həm də şəkərlilik faizi çoxdur. Qışlıq əkin növü fermerlər üçün çox əhəmiyyətlidir. Məhsulun vegetasiya dövrü qış aylarına düşdüyü üçün alaq otlarına qarşı mübarizəyə ehtiyac qalmır, eyni zamanda, suvarmaya tələbat azalır. Nəticədə isə çəkilən xərclər az olur”. O, iki ildir ki, 40 hektar sahədə qışlıq şəkər çuğunduru əkir və növbəti ildən sahələri genişləndirəcək.
Şəkər çuğunduru becərilən yazlıq sahələrdən də bol məhsul götürülməsi hədəflənib. Bu il 20 rayonda olmaqla, 5880 hektar sahədə yazlıq çuğundur əkilib. Hazırda sahələrdə becərmə işləri aparılır. Yazlıq sahələrdən məhsul yığımı sentyabr-oktyabr aylarında olacaq və ümumilikdə, 220 min ton məhsul götürülməsi proqnozlaşdırılır.
Bölmənin digər xəbərləri
