Nigar Arpadarai: Bakı İqlim Fəaliyyəti Həftəsində regiona dair müxtəlif mövzular müzakirə olunacaq VİDEO
Şamaxı, 26 avqust, AZƏRTAC
Artıq ikinci dəfədir ki, ölkəmizdə COP29 İqlim Dəyişmələri üzrə Yay Düşərgəsi keçirilir. Bu il düşərgəyə 20 ölkədən qonaqlar qatılıb ki, bu da təşəbbüsün əhəmiyyətini daha da artırır. Çünki gənclərin iqlim dəyişiklikləri ilə mübarizədə rolu çox böyükdür və biz çalışdıq ki, COP tədbirləri mümkün qədər inklüziv olsun. Bu məqsədlə dövlət tərəfdaşları ilə yanaşı, qeyri-dövlət aktorlarının – özəl sektorun, vətəndaş cəmiyyətinin, gənclərin, akademik dairələrin, şəhər nümayəndələrinin də iştirakı təmin olundu. Bir sözlə, hər kəs bu prosesin bir parçası oldu. Qürurla deyə bilərik ki, biz ikinci ən böyük COP tədbirinə ev sahibliyi etdik.
Bu sözləri AZƏRTAC-a açıqlamasında COP29-un İqlim dəyişmələri üzrə yüksəksəviyyəli çempionu Nigar Arpadarai Şamaxıda keçirilən “COP29 İqlim Dəyişmələri üzrə İkinci Yay Düşərgəsi” çərçivəsində deyib.
Onun sözlərinə görə, hazırda COP29 Sədrliyi ikinci ildir ki, fəaliyyətini aktiv şəkildə davam etdirir: “Gördüyünüz kimi, işimiz davam edir və biz bir çox məsələlərdə mümkün qədər fəal olmağa çalışırıq. Çünki COP30-a ev sahibliyi edəcək Belem komandası ilə də sıx əməkdaşlıq edirik. Bizim ən önəmli təşəbbüslərimizdən biri də Bakı İqlim Fəaliyyəti Həftəsidir. Dünyada İqlim Həftələrinin keçirilməsi artıq ənənəyə çevrilib. Ən böyük tədbirlər Londonda və Nyu-Yorkda təşkil olunur. Bu ilin iyununda Londonda keçirilən İqlim Həftəsində biz çox fəal iştirak etdik. BMT-nin İqlim Dəyişmələri üzrə Çərçivə Konvensiyasının Katibliyi də mütəmadi olaraq bu tədbirləri müxtəlif ölkələrdə keçirir. Yaxın günlərdə Panama və Afrikada İqlim Həftələri keçiriləcək və COP29 Sədrliyi bu tədbirlərdə təmsil olunacaq. Daha sonra nümayəndələrimiz Nyu-Yorkda keçiriləcək İqlim Həftəsində iştirak edəcəklər. Bütün bu beynəlxalq tədbirlərin ardınca – sentyabrın 29-da Bakıda Bakı İqlim Fəaliyyəti Həftəsi başlayacaq”.
Nigar Arpadarai sonda vurğulayıb: “Biz bu tədbiri Rio və London İqlim həftələrinin komandaları ilə tərəfdaşlıq şəklində təşkil edirik. Böyük bir qlobal xəritənin parçası olmaq bizim üçün xüsusi önəm daşıyır. Bir həftə ərzində keçiriləcək tədbirlər zamanı xaricdən çoxsaylı qonaqlarımız olacaq – beynəlxalq təşkilatların nümayəndələri, özəl sektor, dövlət qurumları və gənclər təşkilatları ilə birlikdə maraqlı konsepsiya hazırlanıb. İqlim Həftəsi günlərə bölünüb və hər gün fərqli mövzular üzrə müzakirələr aparılacaq. Hazırkı fəaliyyətimizin əsas istiqaməti də məhz bununla bağlıdır. Biz çalışırıq ki, İqlim Həftəsi region üçün aktual mövzuları da əhatə etsin. Regionumuza xüsusi diqqət ayrılacaq və sentyabrın sonunda bütün iqlim icmasını – beynəlxalq ictimaiyyəti yenidən Bakıda bir araya gətirəcəyik”.
Bölmənin digər xəbərləri
