Cənubi afrikalı pedaqoq: Şamaxıda öyrənmək istədiyim vacib mövzulardan biri yaşıl kurikulumdur VİDEO
Şamaxı, 26 avqust, AZƏRTAC
Mən Cənubi Afrikadanam. Bizim 11 rəsmi dilimiz və doqquz bölgəmiz var. Mən isə KvaZulu-Natal bölgəsindənəm. COP29 üzrə yay düşərgəsində iştirak etmək mənim üçün böyük fürsətdir. Burada yeni biliklər, pedaqoji bacarıqlar və əməkdaşlıq imkanları əldə edəcəyimə ümid bəsləyirəm ki, geri qayıdanda məktəblərimizdə və qeyri-hökumət təşkilatlarımızda bu bilikləri tətbiq edək, icmalarımızı, şagirdləri və hər kəsi maarifləndirək. İnsanlar iqlim dəyişikliyi deyilən bu fenomeni praktiki olaraq dərk etməlidirlər.
Bu barədə AZƏRTAC-a müsahibəsində “COP29 İqlim Dəyişmələri üzrə ikinci yay düşərgəsi”nin iştirakçısı, Cənubi Afrikanın KvaZulu-Natal bölgəsinin “Shea Oconor Combine School”un nümayəndəsi Simangaliso Dhalmini deyib.
“Şamaxıda öyrənmək istədiyim ən vacib mövzulardan biri yaşıl kurikulumdur. Bu, şagirdləri, müəllimləri, təhsil işçilərini, qeyri-hökumət təşkilatlarını və dövlət nümayəndələrinin fəaliyyətini gücləndirəcək. Hazırda dünyada iqlim üzrə müxtəlif siyasətlər mövcuddur, amma onlar praktikada nəticə vermir. Bizə yerlərdə fəaliyyət göstərən insanlar lazımdır ki, bu işləri real həyata keçirsinlər. Bu, günəş panellərinin quraşdırılması, orqanik tərəvəzlərin əkilməsi, meşələrin qırılmasının qarşısının alınması, ekoloji baxımdan daha təmiz yanacaqdan istifadə edilməsi və bütün bu tədbirlərin həyata keçirilməsinə nail olmaqdır. Dünya sürətlə dəyişir, amma biz hələ də bu dəyişikliklərə uyğun addımlar atmaqda gecikirik.
Mən buradan əldə edəcəyim bilik və pedaqoji bacarıqları qeyri-hökumət təşkilatlarına və icmalara çatdırmaq istəyirəm. Çünki universitetlərə gedə bilməyən, formal təhsil ala bilməyən insanlar da bu bacarıqlardan faydalana bilsinlər. Mənim əsas məqsədim budur.
Şamaxı heyrətamiz dərəcədə gözəldir. Leyla Həsənovanın, COP29 Sədrliyinin, gənclər düşərgəsinin və bütün təşkilat komandasının işini xüsusi vurğulamaq istəyirəm. Onlar hər kəsi bu tədbirə dəvət etdilər, çünki iqlim dəyişikliyi problemi yalnız müəyyən insanlara təsir etmir – bu, hamımıza aiddir. Belə bir fikir var: “Fillər döyüşəndə ot daha çox zərər görür”. Bu o deməkdir ki, resursları məhdud olan ölkələr daha çox zərbə alacaq.
Bizə güclü insanlar deyil, bir-birinə dəstək olan insanlar lazımdır. Əllərimizi birləşdirib irəliyə doğru birlikdə hərəkət etməliyik. Mən həmişə deyirəm ki, bizə həqiqətən qayğı göstərən insanlar lazımdır. İnsanlar başqalarının birlikdə çalışdığını, bir-birinə qayğı göstərdiyini görəndə, onlar da bu prosesə qoşulur.
Bu, həqiqətən də möhtəşəm bir tədbir olub. Burada olmaqdan çox məmnunam. Özümü öz ölkəmdə olduğum kimi hiss edirəm, amma ən vacib məqam burada qurulan qarşılıqlı əlaqələr, aparılan müzakirələrdir. Hava limanından səhər yeməyinə qədər həmkarlarıma da dedim ki, bizə güc arxasınca qaçmayan, əməkdaşlıq edə bilən insanlar lazımdır. Çünki həqiqi güc birlikdə işləyəndə ortaya çıxır.
Bu tədbirdə əməkdaşlıq edən, uğurlu olmasına töhfə verən hər kəsə təşəkkür edirəm”, - deyə Simangaliso Dhalmini bildirib.
Bölmənin digər xəbərləri
