Vətəndaşların ASANlaşan həyatı: “Burada yüksək səviyyədə xidmət göstərilir...” - REPORTAJ VİDEO
Bakı, 29 dekabr, Göyçək Mahmudlu, Fidan Əlizadə, AZƏRTAC
Düz 13 il öncə, 2012-ci il dekabrın 29-da vətəndaşların həyatına onların işlərini asanlaşdıran və cəmiyyətə rahatlıq bəxş edən müasir bir dəyər - "ASAN xidmət" daxil oldu. Həmin gündən etibarən vətəndaşlar uzun yolların, bitməyən növbələrin və qarışıq sənədlərin yükündən azad olmağa başladılar. Artıq hər kəs müxtəlif dövlət qurumlarına ayrı-ayrılıqda getmədən, bir məkanda çox sayda xidmətləri ala bilirdi. Zamanla xidmətin şəbəkəsi genişləndi, ölkənin dörd bir yanını əhatə etdi. Çox keçmədən Azərbaycanın milli brendinin səs-sorağı ölkə hüdudlarını da aşmağı bacardı. "ASAN xidmət" təcrübəsi 13 il ərzində dörd qitədən olan ölkələrin marağına səbəb oldu.
Hazırda respublika ərazisində 28 "ASAN xidmət” mərkəzi fəaliyyət göstərir. Onlardan 7-si Bakıda, 2-si Gəncədə, 2-si Sumqayıtda olmaqla digərləri Sabirabad, Bərdə, Qəbələ, Masallı, Quba, Mingəçevir, İmişli, Şəki, Şamaxı, Kürdəmir, Tovuz, Ağcabədi, Balakən, Salyan, Naxçıvan, Lənkəran və Şuşadadır.
“ASAN xidmət” mərkəzlərində müxtəlif dövlət orqanları, həmçinin özəl şirkət və müəssisələr tərəfindən ümumilikdə 400-ə yaxın xidmət göstərilir.
Vətəndaşlar “ASAN Kommunal” mərkəzlərində isə 55 növ xidmətdən yararlana bilirlər.
Sənədlər səliqə ilə qəbul edilir, suallar səbirlə cavablandırılır
"ASAN xidmət" işçilərinin peşə bayramı münasibətilə AZƏRTAC-ın müxbirləri yollarını 7 saylı Bakı "ASAN xidmət" mərkəzindən salıblar.
Günorta saatlarıdır. "ASAN xidmət" mərkəzinin qarşısında insanlar tələsik addımlarla içəri daxil olurlar. Üzlərdə gərginlik yoxdur, əksinə, sakitlik və ümid hiss olunur. Burada zaman insanın xeyrinə işləyir.
Zalda nizam hökm sürür. Elektron tablodan vətəndaşlar sıraya uyğun olaraq, bir-bir çağırılırlar, pəncərələrin arxasında isə gülərüz əməkdaşlar vətəndaşları qarşılayırlar. Sənədlər səliqə ilə qəbul edilir, suallar səbirlə cavablandırılır. Bir neçə dəqiqə əvvəl çətin görünən məsələ indi sadə bir prosedura çevrilir.
Gənc bir vətəndaş qısa müddətdə istədiyi xidməti alıb, mərkəzdən çıxır, yaşlı bir qadın isə əməkdaşa təşəkkür edir. Bu kiçik anlar "ASAN xidmət"in mahiyyətini açır: insanı yormayan, əksinə ona rahatlıq verən bir sistem.
"ASAN xidmət" bu gün sadəcə bir dövlət qurumu deyil. O, vətəndaşın vaxtına, qayğılarına, etibarına dəyər verən müasir yanaşmanın canlı nümunəsidir. Buradan çıxan hər kəs yalnız sənədini deyil, həm də məmnunluq hissini özü ilə aparır.
Vətəndaşların məmnunluq əmsalı 100 faizə yaxınlaşır
"ASAN xidmət"in əməkdaşı Emiliya Bayramova AZƏRTAC-a bildirib ki, bu günədək “ASAN xidmət” mərkəzlərinə 9 milyon 140 mindən çox vətəndaşın 93 milyondan çox müraciəti daxil olub.
Rəy sorğularına əsasən, vətəndaşların xidmətlərdən məmnunluq əmsalı 99,9 faiz təşkil edir.
Mərkəzdə xidmət alan vətəndaşlara yaxınlaşıb, onların fikirlərini də öyrəndik. İl ərzində "ASAN xidmət"ə 2-3 dəfə müraciət etdiyini bildirən İlqar Bədəlov bu dəfə sürücülük vəsiqələrinin dəyişdirilməsi xidmətindən istifadə etdiyini bildirdi. O, göstərilən xidmətlərin yüksək səviyyədə olduğunu qeyd etdi: "Əməkdaşlar çox yaxşı, nəzakətli davranır, könüllülər köməyini əsirgəmirlər".
Vətəndaşlıq vəziyyəti aktlarının dövlət qeydiyyatı xidmətindən yararlanan Xatun Kəlbiyeva il ərzində bir neçə dəfə "ASAN xidmət"lə yolunun kəsişdiyini dedi. O da göstərilən xidmətlərdən və əməkdaşların davranış üsullarından razılığını ifadə etdi.
Çin vətəndaşı Yang Shao Nian isə mərkəzə həyat yoldaşı üçün yaşayış icazəsini almaq üçün müraciət etdiyini söylədi: "2023-cü ildə işlərimlə əlaqədar Çindən Bakıya gəlmişəm. Bakı hazırda Çinə hərtərəfli açıqdır və burada çoxlu biznes imkanları mövcuddur. Buna görə də mən Bakıda uzunmüddətli məskunlaşmaq, ticarət və bizneslə məşğul olmağı planlaşdırıram. Çin və Azərbaycan münasibətləri çox dostcadır və Azərbaycan dövləti Çin vətəndaşlarının burada investisiya qoymasına və biznes qurmasına böyük dəstək göstərir. Eyni zamanda, hökumətiniz tərəfindən təqdim olunan siyasətlər də olduqca əlverişlidir. Bundan əlavə, dövlət qurumları biz çinli işçilərə qarşı açıq və əlçatan xidmət göstərir. Məsələn, bu gün mən "ASAN xidmət"də çox rahatlıqla həyat yoldaşımın yaşayış icazəsi vəsiqəsini ala bildim. Buna görə də çox minnətdaram".
Vətəndaşlardan alınan rəydən sonra müşahidələrimizi davam etdirdik. Çıxışda könüllülər vətəndaşlardan hansı xidmətdən yararlandıqları, razı qalıb-qalmadıqları barədə sorğu aparırdılar. Bu, onu göstərir ki, mərkəz üçün vətəndaş məmnunluğunu, xidmətlərin daha da yüksək keyfiyyətlə göstərilməsi çox önəmlidir.
Burada uşaqlar üçün əyləncə məkanının yaradılması, kafenin fəaliyyət göstərməsi bütün yaş qruplarından olan vətəndaşların diqqətdə saxlanılmasının, onların ehtiyaclarının ciddi şəkildə nəzərə alınmasının, rahatlığının təminatı üçün bütün vasitələrdən istifadə edilməsinin bariz nümunəsidir.
Qısası, "ASAN xidmət"in qapısından daxil olan hər kəs səmimiyyət və nizamla qarşılanır. Əməkdaşların gülər üzü, işlərin sürətlə və şəffaf şəkildə görülməsi vətəndaşlarda rahatlıq yaradır. Bu brend Azərbaycanın dünyaya verdiyi mesajdır: müasir dövlət yalnız qanunlarla deyil, ağıllı həllərlə idarə olunur.
Bölmənin digər xəbərləri
