Yarımçıq qalan müqəddəs missiya - Məhərrəm İbrahimovun şəhadətindən 5 il ötür VİDEO
Bakı, 4 iyun, AZƏRTAC
2021-ci il iyunun 4-ü. Bu gün həmin o dəhşətli tarixdən 5 il ötür. Zaman bəlkə bəzi yaralara məlhəm olur, amma Vətən naminə yarıda qalan ömürlərin acısını əsla azaltmır.
Jurnalist Məhərrəm İbrahimovun Kəlbəcər dağlarında erməni vəhşiliyini ifşa edib həqiqətləri tarixə köçürərkən şəhidlik zirvəsinə ucalmasının beşinci ildönümündə onunla çiyin-çiyinə çalışmış AZƏRTAC-ın əməkdaşları Müşfiqabad qəsəbəsindəki qəbiristanlığa gedərək unudulmaz həmkarlarının məzarını ziyarət ediblər.
Anım mərasimində AZƏRTAC-ın əməkdaşları ilə bərabər, Binəqədi Rayon İcra Hakimiyyətinin, rayonun M.Ə.Rəsulzadə qəsəbəsi bələdiyyəsinin nümayəndələri və şəhid jurnalistin ailə üzvləri də iştirak ediblər.
Şəhid jurnalistin qardaşı Əsgər İbrahimov, bacısı Sevda Əsgərova, AZƏRTAC-ın İdarə Heyətinin sədr müavini Dağbəyi İsmayılov, Binəqədi Rayon İcra Hakimiyyəti başçısı Aparatının məsul əməkdaşı Rəhman Qəhrəmanov və M.Ə.Rəsulzadə qəsəbəsi bələdiyyəsinin sədri Hümbət Hüseynov çıxış edərək, Məhərrəm İbrahimovun şərəfli ömür yolundan, onun hərbi jurnalistika tariximizə yazdığı qəhrəmanlıq salnaməsindən söz açıblar.
Çıxışlarda vurğulanıb ki, Vətən müharibəsi günlərindən etibarən daim ön cəbhədə, hadisələrin ən qaynar nöqtələrində olan Məhərrəm işğaldan azad edilmiş torpaqlarımızın hər qarışını addım-addım gəzərək erməni vandallarının törətdiyi vəhşilikləri yazıya çevirir, tarixləşdirirdi. Onun yazdığı hər bir sətir bu gün düşmənin iç üzünü dünyaya göstərən təkzibolunmaz tarixi sənədə çevrilib. Lakin təəssüf ki, doğma yurdun salnaməsini yaratmaq kimi müqəddəs amalı canı bahasına yerinə yetirən cəsur jurnalistin ömür yolu elə Kəlbəcər dağlarında yarıda qaldı.
Belə ki, peşə fəaliyyəti ilə əlaqədar işğaldan azad edilmiş Kəlbəcər rayonuna ezam olunmuş bir qrup jurnalisti aparan avtomobilin Susuzluq kəndi istiqamətində 2021-ci il iyunun 4-də saat 11 radələrində tankəleyhinə minaya düşməsi nəticəsində AZƏRTAC-ın müxbiri Məhərrəm İbrahimov, Azərbaycan Televiziyasının operatoru Sirac Abışov və Kəlbəcər Rayon İcra Hakimiyyəti başçısının Susuzluq kənd inzibati ərazi dairəsi üzrə nümayəndəsinin müavini Arif Əliyev həlak oldular.
Diqqətə çatdırılıb ki, işğaldan azad olunan ərazilərdə vəzifə borcunu yerinə yetirmiş İbrahimov Məhərrəm Əli oğlu Azərbaycan Prezidenti İlham Əliyevin imzaladığı Sərəncamla 3-cü dərəcəli "Vətənə xidmətə görə" ordeni ilə təltif edilib. Həmçinin Binəqədi rayonunun M.Ə.Rəsulzadə qəsəbəsindəki küçələrdən birinə şəhid jurnalistin adı verilib. AZƏRTAC-ın inzibati binasında Məhərrəm İbrahimovun xatirəsi əbədiləşdirilib, barelyefi açılıb.
Vurğulanıb ki, Məhərrəm Ermənistanın xain mina terroru nəticəsində şəhadətə qovuşsa da, onun əziz xatirəsi, göstərdiyi peşə şücaəti və adı xalqımızın qan yaddaşına əbədi həkk olunub.
Ailə üzvləri şəhid jurnalistin xatirəsini hər zaman uca tutan və bu anım günündə yanlarında olan hər kəsə dərin minnətdarlıqlarını ifadə ediblər.
Mərasimin sonunda şəhid jurnalistin ruhuna dualar oxunub, məzarı üzərinə tər güllər düzülüb.
Ziyarətdən sonra Məhərrəm İbrahimovun xatirəsinə ehsan süfrəsi açılıb.
Zaman sürətlə axıb keçir... İndi Məhərrəmin qarış-qarış gəzdiyi Qarabağda və Şərqi Zəngəzurda həyat yenidən canlanır. İrimiqyaslı quruculuq işləri, ucalan yeni binalar və salınan yollar otuzillik işğalın və amansız vandallığın izlərini silir, insanlar böyük qürurla öz doğma yurdlarında yeni ömür salnaməsi yazırlar. Lakin illər, əsrlər keçsə də, gələcək nəsillər bu torpaqların hansı çətinliklərlə azad olunduğunu, düşmənin vurduğu yaraların miqyasını və 2021-ci il iyunun 4-də yarımçıq qalan o müqəddəs missiyanı əsla unutmayacaqlar. Onlar bu acı, həm də şərəfli tarixi məhz Məhərrəm kimi qələmini silaha çevirən fədakar oğulların bizə miras qoyduğu, min bir əzabla arxivləşdirdiyi təkzibolunmaz materiallar əsasında öyrənəcəklər.
Ruhun şad olsun, Məhərrəm!
Bölmənin digər xəbərləri
