Aktotı Raimkulova: Bakı bir əsrdən sonra yenidən türkologiyanın gələcəyini müəyyənləşdirir VİDEO
Bakı, 29 iyun, AZƏRTAC
Bu gün Bakıda Birinci Türkoloji Qurultayın 100 illiyinə həsr olunmuş “Türk Dünyası Həftəsi” açılır. Bu tədbir türkologiyanın inkişafı, türk xalqlarının dili, mədəniyyəti və ortaq tarixi irsi ilə bağlı aktual məsələlərin müzakirəsi üçün yeni platformaya çevrilməyi hədəfləyir.
Türk Mədəniyyəti və İrsi Fondunun prezidenti Aktotı Raimkulova AZƏRTAC-a müsahibəsində bildirib ki, forumun bir əsr sonra keçirilməsi xüsusi rəmzi əhəmiyyətə malikdir.
“Bir əsrdən sonra günəşli Bakıda keçirilən Türkoloji Qurultay əlamətdar bir hadisədir. Yüz il əvvəl məhz burada, Birinci Türkoloji Qurultayda türkologiya bir elm kimi ortaya çıxdı. O zaman ortaq türk dili və əlifbası olan türkologiyanın inkişafı, həmçinin ortaq mədəni irsimizin qorunması və inkişafı üçün qlobal məqsədlər müəyyən edilmişdi”, - deyə o bildirib.
A. Raimkulovanın sözlərinə görə, tarixi qurultayın bir çox iştirakçısı sonradan siyasi repressiyaların qurbanı olub, lakin onların müdafiə etdiyi ideyalar aktuallığını qoruyub saxlayıb.
“Təəssüf ki, bildiyiniz kimi, bundan sonra müxtəlif siyasi repressiyalar baş verdi. Lakin bu gün başa düşürük ki, yüz il əvvəl qarşıya qoyulmuş məqsədlər son dərəcə aktual olaraq qalır. Elm, mədəniyyət, tarix və dilçilik sahəsində ən tanınmış simaları nailiyyətlərini bölüşmək və türkşünaslığın inkişafı üçün birgə yeni yollar axtarmaq üçün Bakıda bir araya gəliblər”, - deyə fondun prezidenti qeyd edib.
O, Birinci Türkoloji Qurultayın 100 illiyi ilə bağlı tədbirlərin Azərbaycan Prezidenti İlham Əliyevin 2025-ci ilin oktyabr ayında imzaladığı Sərəncam sayəsində mümkün olduğunu vurğulayıb.
“İl ərzində müxtəlif tədbirlər keçirilir, lakin bu qurultay yubiley ilinin ən böyük və ən diqqətəlayiq tədbiridir”, - deyə A. Raimkulova bildirib.
Türk Mədəniyyəti və İrsi Fondunun prezidenti, həmçinin yubiley ilinin son tədbirinin ilin sonuna qədər UNESCO-nun qərargahında keçiriləcək beynəlxalq simpozium olacağını açıqlayıb.
O vurğulayıb: “Türk Mədəniyyəti və İrsi Fondu bu əlamətdar tarixi qeyd etmək üçün silsilə tədbirlər keçirir. İlin son tədbiri UNESCO-da keçirməyi planlaşdırdığımız Birinci Türkoloji Qurultayın 100 illiyinə həsr olunmuş beynəlxalq simpozium olacaq. Dünyanın hər yerindən, xüsusən də Türk dünyası ölkələrindən aparıcı türkoloqları bir araya gətirmək niyyətindəyik. Beynəlxalq təşkilatın bu təşəbbüsü dəstəkləməsi və onun keçirilməsinə kömək etməsi bizim üçün xoşdur”.
Forumun uğurlu olacağına əminliyini bildirən A. Raimkulova qeyd edib ki, qurultaydan sonra qəbul edilən qərarlar türkologiya elminin daha da inkişafına töhfə verəcək.
“İnanıram ki, bu həftə mühüm kəşflər ediləcək və əhəmiyyətli qərarlar qəbul olunacaq. Forumun nəticələri türkoloji düşüncənin və türkologiyanın bir elm kimi daha da inkişafına töhfə verəcək”, - deyə Türk Mədəniyyəti və İrsi Fondunun prezidenti fikirlərini yekunlaşdırıb.
Bölmənin digər xəbərləri
