“ASAN xidmət”də 100 milyonuncu müraciət qeydə alınıb VİDEO
Bakı, 10 iyul, AZƏRTAC
“ASAN xidmət”də 100 milyonuncu vətəndaş müraciətinin qeydə alınması ilə əlaqədar tədbir keçirilib.
AZƏRTAC xəbər verir ki, həmin müraciət yeni doğulmuş İnci Kamallının anası Göyçək Kamalzadə tərəfindən 7 saylı Bakı “ASAN xidmət" mərkəzinə edilib. O, övladı üçün Ədliyyə Nazirliyinin həyata keçirdiyi doğumun qeydə alınması xidmətindən yararlanıb.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev 100 milyonuncu müraciəti edən Göyçək Kamalzadəyə “ABAD”çı tərəfindən hazırlanmış simvolik hədiyyəni təqdim edib.
Bildirək ki, Prezident İlham Əliyevin Fərmanı ilə yaradılan “ASAN xidmət” vətəndaş məmnunluğu, şəffaflıq, operativlik və innovativ yanaşma prinsipləri əsasında fəaliyyət göstərir. “ASAN xidmət” mərkəzlərində ümumilikdə 400-ə yaxın xidmət təqdim olunur.
“ASAN xidmət” modeli beynəlxalq səviyyədə də böyük maraq doğurur və bu günədək 35-dən çox ölkəyə ixrac edilərək dövlət xidmətlərinin təşkili sahəsində Azərbaycanın uğurlu təcrübəsi kimi paylaşılır.
100 milyonuncu müraciəti edən Göyçək Kamalzadə jurnalistlərə açıqlamasında deyib: "Övladımın vətəndaş qeydiyyatına alınması və doğum haqqında şəhadətnamənin alınması məqsədilə "ASAN xidmət"ə müraciət etdik. Təsadüfən 100 milyonuncu müraciətçi olduğumu öyrəndim. Bu, bizim üçün təəccüblü və sevindirici oldu. "ASAN xidmət" bizə çox doğmadır. Özüm də "ASAN xidmət"də könüllü kimi fəaliyyət göstərmişəm. Nikahımız da "ASAN xidmət"də qeydə alınıb. 100 milyonuncu müraciətçi olmaq bizi çox sevindirir. "ASAN xidmət" hər zaman şəffaf və operativ fəaliyyət göstərib. "ASAN xidmət"in rəhbərliyinə, bütün kollektivə dərin minnətdarlığımızı bildiririk. Bütün ailələrə xoşbəxt və sağlam övladlar arzulayırıq".
Göyçək Kamalzadənin həyat yoldaşı Təbriz Kamalzadə isə bildirib ki, 100 milyonuncu müraciətçi olmaq övladlarının bəxtinə düşüb. “Bu, həm bizim, həm də övladımız üçün yaddaqalan hadisə olacaq. Göstərilən yüksəkkeyfiyyətli xidmətlərə görə kollektivə minnətdaram", - deyə o diqqətə çatdırıb.
Müxbir - Göyçək Mahmudlu
Bölmənin digər xəbərləri
