“Bakı-2015” birinci Avropa Oyunlarının kişilər arasında stolüstü tennis yarışlarının ilk gününün axşam sessiyasının birinci dairəsinin yarışları başlanıb.

Sessiyanın birinci yarısında dörddə bir finala çıxmaq uğrunda Almaniya, İspaniya, Ukrayna, İsveç, Belarus, Çexiya, Yunanıstan və Fransa komandaları mübarizə aparacaqlar. Azərbaycan, Xorvatiya, Avstriya, Macarıstan, Rusiya, Polşa, Rumıniya və Portuqaliyanın nümayəndələri axşam sessiyasının ikinci yarısında çıxış edəcəklər.

Qeyd edək ki, Almaniya komandasının tərkibinə stolüstü tennis üzrə dəfələrlə Avropa çempionu, iki Dünya Kubokunun sahibi, yeddi Dünya Çempionatının qalibi, Olimpiya Oyunlarının mükafatçısı Timo Boll və yeddi dəfə Avropa çempionu, dünya çempionatlarının və Olimpiya Oyunlarının mükafatçısı, birinci Avropa Oyunlarının idman elçilərindən biri olan Dmitri Ovçarov daxildirlər.

Ölkəmizi Fərhad İsmayılov, Ramil Cəfərov və Xəyal Həşimli təmsil edir.

15:24

Qadın komandaları arasında stolüstü tennis yarışının birinci dövrəsinə yekun vurulub.

Yarışın birinci gününün yekunlarına əsasən, iyunun 14-də keçiriləcək dörddəbir final mərhələsində Fransa, Almaniya, Rusiya və Çexiya milli komandalarından əlavə, Serbiyanı 3:0 hesabı ilə məğlub Hollandiya, Lüksemburqa 3:1 hesabı ilə qalib gələn Polşa və eyni hesabla müvafiq olaraq Serbiya və Belarusu məğlub edən İsveç və Ukrayna yığmaları medallar uğrunda mübarizəni davam etdirəcək.

Dörddəbir finalda Almaniya-Rusiya, Fransa-Çexiya, Ukrayna-İsveç və Polşa-Niderland komandaları qarşılaşacaq.

14:16

Birinci Avropa Oyunlarında qadın komandalar arasında stolüstü tennis yarışlarında birinci dövrənin səhər oyunlarının ilk hissəsinə yekun vurulub. Azərbaycan və Fransa milli komandalarının görüşü qonaqların 0:3 hesablı qələbəsi ilə başa çatıb. Almaniya yığması isə Macarıstan təmsilçilərini məğlub edib – 3:0. Rusiya idmançıları portuqaliyalı atletlərdən üstün olublar – 3:1. Çexiya və Avstriya yığmaları arasındakı görüşdə isə çexlər 3:1 hesabı ilə qələbə qazanıblar.

Səhər sessiyasında keçiriləcək digər görüşlərdə aşağıdakı cütlüklər qarşılaşacaq: Ukrayna-Belarus, İsveç-Rumıniya, Polşa-Lüksemburq və Serbiya-Hollandiya.

Bundan başqa, axşam sessiyasında kişi komandalar arasında yarışlar da oynanılacaq. Saat 16:30-da başlayacaq oyunlarda Almaniya-İspaniya, Ukrayna-İsveç, Belarus-Çexiya və Yunanıstan-Fransa qarşılaşmaları oynanılacaq. Saat 19:30-da isə Avstriya Xorvatiya ilə, Macarıstan Rusiyaya qarşı, Polşa millisi Azərbaycan yığması ilə, Rumıniya komandası isə Portuqaliya seçməsinə qarşı görüşlər keçiriləcək.

10:03

Bakı, 13 iyun, AZƏRTAC

İyunun 13-də Bakı İdman Zalında birinci Avropa Oyunlarının stolüstü tennis yarışlarına start verilib. Bu yarışlarda dünyanın 35 ölkəsindən 128 idmançı iştirak edəcək.

AZƏRTAC xəbər verir ki, yarışların ilk günündə səhər sessiyasında qadınlar arasında, axşam sessiyasında isə kişilər arasında qoşa görüşlər planlaşdırılıb.

Qadınların yarışlarında birincilik uğrunda Azərbaycan, Almaniya, Portuqaliya, Rusiya, Fransa, Çexiya və Avstriya komandaları, kişilərin qarşılaşmasında isə Ukrayna, Belarus, İsveç, Rumıniya, Polşa, Lüksemburq, Serbiya və Niderland komandaları mübarizə aparacaqlar.

Qadınların yarışlarında ölkəmizi Rüfət Quliyeva, Məryəm İmanova və Şərmin Şirinova təmsil edəcəklər.

Qoşa yarışlar üzrə final görüşləri iyunun 15-də keçiriləcək.

Xatırladaq ki, qoşa görüşlərdə cəmi 32 komanda (kişilərdən ibarət 16 komanda və qadınlardan ibarət 16 komanda) çıxış edəcək.