SİYASƏT


Azərbaycanlı deputat Avropa Şurasında məruzəçi təyin edildi

Budapeşt, 5 dekabr, AZƏRTAC

Avropa Şurası Parlament Assambleyasında (AŞPA) kənardan idarə olunan ayrı-ayrı şəxslərin və müəyyən maraqlara xidmət edən ziyankar qruplaşmaların ara-sıra təzahür edən canfəşanlıqlarına rəğmən bu mötəbər təşkilatla Azərbaycan arasında əlaqələr yüksələn xətlə inkişaf etməkdədir. Bunun növbəti təsdiqi AŞPA-nın mədəniyyət, elm, təhsil və media komitəsinin Budapeştdə keçirilən toplantısında baş verib.

AZƏRTAC xəbər verir ki, Parlament Assambleyasının ən fəal deputatlarından olan Azərbaycan Milli Məclisinin deputatı Rafael Hüseynova növbəti dəfə yüksək etimad göstərilib. Əvvəllər də müxtəlif illərdə ayrı-ayrı komitələrin xətti ilə bir neçə ümumavropa əhəmiyyətli mövzu üzrə məruzəçi təyin edilmiş Rafael Hüseynova yeni vacib problemin araşdırılması tapşırılıb. Qeyd etmək lazımdır ki, digər bir mövzu üzrə komitə iclasında məruzəçinin müəyyənləşdirilməsində fikir ayrılığı yarandığı, bir neçə iddiaçı arasında səslərin parçalandığı və məruzəçini təyin etmək mümkün olmadığı üzündən müzakirələr qış sessiyasına qədər təxirə salınsa da, Rafael Hüseynovun məruzəçi təyin edilməsi haqda qərar yekdilliklə qəbul edilib.

AZƏRTAC Milli Məclisin mədəniyyət komitəsinin sədri Rafael Hüseynovun AŞPA-nın builki yaz sessiyası əsnasında “Avropada şagirdlərin tələbatına yönələn təhsil modeli” adlı qətnamə üçün təklif layihəsi hazırladığını və həmin sənədi 30-dan artıq deputatın imzaladığını xəbər vermişdi. Lakin qətnamə üçün heç də bütün təkliflər məruzəçi təyin edilməsi ilə nəticələnmir. AŞPA bürosu bu qəbil təkliflərdən yalnız ən mühüm, xüsusi aktuallıq kəsb edənlərini seçərək müvafiq komitələrdə məruzə hazırlanmasını tövsiyə edir. Rafael Hüseynovun qaldırdığı problemin mahiyyəti bundan ibarətdir ki, müasir Avropa təhsilində, xüsusən orta məktəb təhsili şəbəkəsində şagird şəxsiyyətinin təlim prosesində nə dərəcədə nəzərə alınması amili mütəmadi mübahisələr doğurur, yeni yollar axtarışını tələb edir. Hazırkı Avropa məktəbi şagirdləri istedadlı, orta, ya zəif deyə çeşidləməyərək onlara ümumi əsaslarla dərs verir. Bu isə ona gətirib çıxarır ki, məktəbin və müəllimin daha zəif olan bir şagirdin irəliləməsi üçün sərf etdiyi zaman digər daha artıq irəliləmək imkanı olan, daha qabiliyyətli şagirdin vaxtından kəsilərək edilir. Rafael Hüseynovun hazırlamağa planlaşdırdığı yeni araşdırma bu və buna bənzər halların aradan götürülməsi, şagirdlərin ehtiyac və tələblərinin istedad səviyyələrinə uyğun olaraq nəzərə alınması ilə bağlı kompleks tədbirlərin görülməsini, bütövlükdə orta məktəb təhsilində yeni yanaşmaların tətbiqini nəzərdə tutur. Sevindirici haldır ki, Avropanın təhsil həyatında əhəmiyyətli yeniliklərə gətirib çıxaracaq mühüm təhsil modelinin təşəbbüskarı və icraçısı Azərbaycan təmsilçisidir.

Adətən Avropa Şurasında bu qəbildən olan məruzələrin hazırlanmasına il yarım, bəzən isə 2 il vaxt ayrılır və hesabatın hazırlanması prosesində ardıcıl müzakirələr aparılır. Parlament Assambleyasının iş cədvəlində Rafael Hüseynovun hazırlayacağı məruzənin 2019-cu ilin noyabrında tamamlanması və növbəti ilin qış, yaxud yaz sessiyasında Assambleyada açıq müzakirəyə çıxarılaraq qəbul edilməsi nəzərdə tutulur. Rafael Hüseynov bildirib ki, məruzə müxtəlif Avropa ölkələri məktəblərində təhsil sistemini araşdıraraq aparılan təhlillər əsasında mümkün mütərəqqi modelləri müəyyənləşdirmək, məktəblinin şəxsi keyfiyyətləri və potensialının təhsil prosesində daha artıq nəzərə alınmasını təmin edəcək qaydaların yaradılmasını nəzərdə tutur. Mədəniyyət, elm, təhsil və media komitəsinə Avropanın müxtəlif guşələrindən dəvət ediləcək mütəxəssis və ekspertlərin iştirakı ilə keçiriləcək kollokviumlarla yanaşı, mövzu üzrə daha əhatəli faktiki məlumatın toplanması məqsədilə dünyanın baş elm, təhsil, mədəniyyət təşkilatı olan UNESCO ilə müştərək konfransın keçirilməsi də diqqətdə saxlanılır.

AŞPA-nın komitə iclasında belə bir təklif də irəli sürülüb ki, məruzə başa çatdırıldıqdan sonra Rafael Hüseynovun müəllifi olduğu və daha əvvəllər hazırladığı “Avropada qaçqın və məcburi köçkünlərin təhsil problemləri”, “Avropa ali təhsil məkanının vahidliyi və beynəlxalq açıqlığı”, “Avropada jurnalistlərin peşəkar təhsili və treninqi” kimi məruzələrlə birlikdə təhsil sahəsində Avropa Şurasının apardığı siyasətin göstəricisi kimi ayrıca kitab halında da nəşr edilsin.

Pərvanə Qarayeva

AZƏRTAC-ın xüsusi müxbiri

Budapeşt

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.