Bakı, 19 yanvar, AZƏRTAC

Bakı Dövlət Universitetinin (BDU) nəzdində Konfutsi İnstitutu Xəzər Universiteti yanında “Dünya” məktəbi ilə birlikdə Çin Yeni ilinə həsr edilən tədbir keçirib. Məktəbin kitabxanasında keçirilən tədbirdə Konfutsi İnstitutunun əməkdaşları, məktəbin müəllim və şagirdləri iştirak ediblər.

AZƏRTAC xəbər verir ki, tədbirin məqsədi məktəbliləri Çin dili, mədəniyyəti və ənənələri ilə tanış etməkdir.

Mərasimi üç şagird açaraq, “Yeni iliniz mübarək” adlı Çin mahnısını ifa ediblər. “Dünya” məktəbinin direktor müavini Leyla Cəbrayılova tədbirdə çıxış edərək BDU-nun nəzdində Konfutsi İnstitutu ilə məktəb arasında əməkdaşlığın uğurlu inkişafından danışıb. Qeyd edib ki, məktəbin rəhbərliyi şagirdlərin hərtərəfli inkişafına xüsusi diqqət yetirir və onların müxtəlif ölkə və xalqların mədəniyyətləri, dilləri ilə tanış olmasına imkan yaradır. Direktor müavini Çin dilini bilməyin əhəmiyyətini vurğulayıb.

Sonra BDU-nun nəzdindəki Konfutsi İnstitutunun Çin üzrə direktoru xanım Luo Siaocı çıxış edib. O, Çin dilinin öyrədilməsində və şagirdlər arasında Çin mədəniyyətinin yayılmasında universitetin və məktəbin rəhbərliklərinin dəstəyini yüksək qiymətləndirib. Şagirdlərin Çin dilində sərbəst danışa biləcəklərinə və Çinə səfər edəcəklərinə ümidvar olduğunu bildirib.

Konfutsi İnstitutunun müəllimi iştirakçılara Çin çay mərasimini nümayiş etdirib.

Uşaqlar tədbirdə Çin kalliqrafiyası, kağızdan kəsilmiş şəkillər, yemək çubuqları ilə tanış ediliblər. Onlar ilk dəfə yazı fırçası ilə Çin heroqliflərini yazıb, kağızlardan qayçı ilə rəsmlər kəsib, yemək çubuqlarından istifadə ediblər. Konfutsi İnstitutu müəllimlərinin köməyi ilə fəallıq göstərən məktəblilər öz yaradıcılıqlarını nümayiş etdiriblər.

Tədbirin sonunda xatirə şəkli çəkdirilib.