Ermənistan Brüssel görüşündə Qarabağ da daxil olmaqla Azərbaycanın ərazi bütövlüyünü tanıdı - Politoloq
Bakı, 22 may, AZƏRTAC
Ermənistanın baş naziri Nikol Paşinyan Azərbaycanın ərazi bütövlüyünü tanıması barədə bir neçə dəfə fikirlər səsləndirib. O, İslandiyada keçirilən Avropa Şurası Sammitində Ermənistanın Azərbaycanın 86,6 min kvadratkilometr ərazisini tanıdığını bəyan etdi. Bu da Ermənistanın Qarabağ da daxil olmaqla Azərbaycanın ərazi bütövlüyünü tanıması deməkdir. Bu fikirlər Azərbaycan Prezidentinin yerli telekanallara müsahibəsi zamanı Ermənistan Qarabağı Azərbaycanın ərazisi kimi tanımalıdır çağırışına cavab kimi qəbul edilməlidir. Çünki o çağırışın davamı kimi, dövlətimizin başçısının “Ermənistan istəsə sülh olacaq, istəməsə olmayacaq“ bəyanatı olmuşdu. Bu, Ermənistanın və havadarlarının sülh sazişi mövzusunda spekulyasiyalarına son qoymağın zəruri olması haqqında da bir xatırlatma idi.
Fransa, ilk növbədə, Ermənistanla münasibətləri 44 günlük Vətən müharibəsindən sonra hərbi əməkdaşlıq müstəvisinə qaldırmağa qərar verdi. Müharibənin bitməsindən sonrakı müddətdə Fransanın Azərbaycana münasibəti bu hərbi əməkdaşlığın ölkəmizə qarşı yönəldiyini ehtimal etməyimizə ciddi əsaslar yaradır. 2020-ci il üçtərəfli Bəyanatdan sonra Azərbaycanla şərti sərhəddə Ermənistanın törətdiyi hər iki ciddi hərbi təxribatın izləri məhz Fransaya gedib çıxır.
Bu fikirləri AZƏRTAC-a açıqlamasında Gənc Demokratlar İnstitutu İctimai Birliyinin sədri politoloq Yeganə Hacıyeva deyib.
Politoloq qeyd edib ki, erməni təxribatlarından sonra Ermənistanın müdafiə naziri Suren Papikyanın və Fransa müdafiə nazirinin köməkçisi Sebastyan Lekornunun Parisdə görüş zamanı Azərbaycanla sərhədində baş verənlər müzakirə edildi. Eyni zamanda, mövcud vəziyyət və hərbi potensialın artırılması üçün Ermənistana nümayəndə heyətinin göndərməsi də razılaşdırılmışdı.
Ondan daha əvvəl isə Emmanuel Makron Nikol Paşinyanla görüşündə bildirdi ki, Fransa Ermənistan və Azərbaycan arasında sülhün bərpasına, həmçinin dialoqun inkişafına yardım edəcək və qəti şəkildə regiona qayıdacaq. Bir sözlə Fransanın xeyir-duası və iştirakı ilə Ermənistanın atdığı addımlar regionun təhlükəsizliyini təhdid edir. Paralel olaraq Fransa regiona yerləşməyə cəhd edir, bu da Cənubi Qafqazda sülhə və təhlükəsizliyə hədədir.
“Aydın məsələdir ki, Fransa iki ölkə arasında sülhün və beynəlxalq əməkdaşlığın möhkəmləndirilməsi üçün razılaşmalara ardıcıl riayət olunmasının deyil, təxribatların təşviqində maraqlıdır. Bu fikirləri ötən ay Ermənistanda səfərdə olan Fransanın xarici işlər naziri Ketrin Kolonnanın və Fransanın Silahlanma üzrə Baş Direktorluğunun nümayəndə heyətinin İrəvana səfəri zamanı açıqlamalarında daha aydın izləmək olurdu. Səfər zamanı Fransanın Ermənistandakı səfirliyinin yanında yeni hərbi attaşenin təyin olunması barədə qərar qəbul edilib. Fransanın Silahlanma üzrə Baş Direktorluğunun nümayəndə heyətinin İrəvana səfəri ilə ikitərəfli silahlanma komitəsi öz işini bərpa etdi. Komitəyə Fransa silahlarının Ermənistana tədarükü üçün “strateji planlaşdırma” strategiyasını təmin etmək tapşırıldı. Xatırladaq ki, bu komitə fəaliyyətini 2022-ci ilin yanvarında Ermənistanın sabiq prezidenti Armen Sarkisyanın postunu tərk etməsindən sonra dayandırmışdı.
Armen Sarkisyan ölkəsində Fransa hərbi sənayesinin əsas “kommersiya agenti” kimi "Thales", "Areva", "Alstom" hərbi şirkətlərinin maraqlarını təmsil edirdi. Qeyd olunan faktlar Fransanın Ermənistandakı maraqlarının heç də səmimi dostluq üzərində qurulmadığını göstərir”, - deyə Y.Hacıyeva söyləyib.
“Fransa Ermənistanı Azərbaycanla sərhəddə hərbi təxribata təhrik etməklə regionda yarana biləcək müharibəyə yeni bazar əldə etmək cəhdi kimi baxır. Bu üsul Fransanın ənənəvi imperiya xislətinin bir parçasıdır”, - deyən politoloq xatırladıb ki, Fransa bu cür təhriklərlə, münaqişə tərəflərinə silah satmaqla, regionun təbii sərvətlərini ələ keçirməklə milyardlar qazanıb.
Bölmənin digər xəbərləri
