SİYASƏT


Nigar Arpadarai: Ermənistan Azərbaycanın ərazi bütövlüyünü tanımalıdır

Strasburq, 21 iyun, AZƏRTAC

Əvvəlcə Azərbaycan Prezidenti İlham Əliyevlə Türkiyənin birinci xanımı Əminə Ərdoğan arasındakı qısa söhbətə istinad edən erməni deputatın çıxışına münasibət bildirmək istəyirəm. Söhbətin kontekstdən çıxarılması və ya təhrif olunması tamamilə qəbuledilməzdir. Belə yanaşma AŞPA üzvlərindən gözlənilən davranış qaydalarına uyğun deyil. Biz deputatıq, nifrət və təhqir deyil, hörmət və qanun dilində danışmaq üçün buradayıq.

AZƏRTAC xəbər verir ki, bu fikirləri Azərbaycanın AŞPA-dakı nümayəndə heyətinin üzvü Nigar Arpadarai qurumun sessiyasında Büro və Daimi Komitənin hesabatı ilə bağlı müzakirələr zamanı çıxışında söyləyib.

İyunun 20-də Ümumdünya Qaçqınlar Gününün qeyd edildiyini bildirən azərbaycanlı deputat deyib ki, Avropa məkanında əhalinin sayına görə ən çox qaçqın Azərbaycanda olub. Səkkiz milyon əhalisi olan Azərbaycan ötən əsrin 90-cı illərinin əvvəlində ermənilər tərəfindən Qərbi Azərbaycandan, həmçinin respublikamızın ayrılmaz hissəsi olan Qarabağ və onun ətrafındakı 7 rayondan qovulan 1 milyon azərbaycanlı qaçqın və məcburi köçkünü qəbul edib.

Bu gün Azərbaycanın ərazilərinin işğaldan azad edilməsinə baxmayaraq, ölkədə məcburi köçkünlər məsələsi hələ də qalmaqdadır. Çünki qaçqınlar və məcburi köçkünlər evlərinə qayıda bilmirlər. Azad edilmiş ərazilər yerlə-yeksan edilib, infrastruktur dağıdılıb, məscidlər tövlələrə çevrilib. Ən dəhşətlisi isə ərazilərdə yüz minlərlə mina yerləşdirilib. Avropa Şurası bu istiqamətdə dərhal və təcili tədbirlərin görülməsini tələb etməlidir.

Deputat diqqətə çatdırıb ki, iyunun 4-də Azərbaycanın Kəlbəcər rayonunda mina partlayışı nəticəsində iki azərbaycanlı jurnalist və bir məmur həyatını itirib. Mümkün olan bütün platformalardan mina xəritələrinin Azərbaycana verilməsi ilə əlaqədar Ermənistan rəhbərliyinə çağırışlar edilsə də, bunun heç bir nəticəsi olmayıb. Ermənistanın təkcə Ağdam rayonunda 97 min mina basdırdığı, Paşinyanın bunun mina xəritələrinin çox kiçik bir hissəsi olduğunu etiraf etdiyi diqqətə çatdırıb. Paşinyanın bu etirafının müharibə cinayətinin sübutu olduğu, azad edilmiş ərazilərimizdə ermənilər tərəfindən yerləşdirilən minaların partlaması nəticəsində 150-dək azərbaycanlının həyatını itirdiyi və ya yaralandığı vurğulanıb.

“Avropa Şurasının bütün bunlara susması, reaksiya verməməsi təəccüb doğurur, bütün mina xəritələri qeyd-şərtsiz verilməlidir”, - deyə N. Arpadarai diqqətə çatdırıb. O, Büronun bu məsələ ilə əlaqədar Ermənistana təzyiq göstərmək üçün gördüyü işlə maraqlanıb.

“Azərbaycan Ermənistanla sülh müqaviləsi imzalamağa hazır olduğunu açıq şəkildə bildirdi. Əlbəttə, müqavilə hər iki ölkənin ərazi bütövlüyünün tanınmasını nəzərdə tutur və biz buna hazırıq. Ermənistanın ərazi bütövlüyünü açıq şəkildə tanımağa hazırıq və təbii ki, Ermənistan da öz növbəsində Azərbaycanın ərazi bütövlüyünü tanımalıdır.

Təəssüf ki, Azərbaycan tərəfinin sülhlə bağlı bəyanatı beynəlxalq səviyyədə geniş yayılmasına baxmayaraq, Ermənistan tərəfi heç bir reaksiya verməyib. Səbəb isə Ermənistanın siyasi hakimiyyətinin Azərbaycana qarşı ərazi iddialarını davam etdirməsi və bu vəziyyətdən çıxmağa hazır olmamasıdır”, - deyə N.Arpadarai bildirib.

Deputat sonda qeyd edib: “Avropa Şurası Ermənistandan konkret olaraq soruşmalıdır ki, o, regionda davamlı sülh üçün Azərbaycanın ərazi bütövlüyünü tanımağa hazırdırmı?”.

Şəhla Ağalarova

AZƏRTAC-ın xüsusi müxbiri

Strasburq

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.