® “Rabitəbank” ilin birinci rübünü 3,5 milyon manat mənfəətlə tamamlayıb
Ölkənin aparıcı banklarından olan “Rabitəbank” 2021-ci ilin ilk rübü üzrə maliyyə göstəricilərini açıqlayıb.
Rəqəmlərə əsasən, cari ilin birinci rübündə dinamik inkişafa davam edən bank bütün mühüm maliyyə göstəricilərində artım nümayiş etdirib. “Rabitəbank” ASC İdarə Heyətinin sədri Elçin Qədimov 2021-ci ilin ilk rübünü müsbət qiymətləndirib: “İlin ilk rübünü uğurlu dəyərləndiririk. Əsas maliyyə göstəricilərində gözləntilərimizdən daha yüksək artım müşahidə olunur. Bankımız ilin ilk rübünü 3,5 milyon manat mənfəətlə başa çatdırıb və iş günləri sayının az olmasına baxmayaraq 18,6 milyon manat məbləğində bu günədək olan ən yüksək rüblük gəlir əldə edilib”.
Martın 31-nə bankın xalis mənfəəti 3,5 milyon manat təşkil edib ki, bu da keçən ilin analoji dövri ilə müqayisədə 59 faiz artım deməkdir. Digər əsas göstərici isə bankın kredit portfelinin artmasıdır ki, hesabat dövründə bankın kredit portfeli 443 milyon manat təşkil edib. Bu da 2020-ci sonuna olan kredit portfeli ilə müqayisədə 2,5 faiz artım deməkdir. Bank bugünədək olan ən yüksək rüblük gəlir nəticəsinə imza ataraq 2021-ci ilin ilk rübündə 18,6 milyon manat gəlir əldə edib. 2020-ci ilin analoji dövrü ilə müqayisədə bankın gəlirləri 21 faiz artıb.
“Rabitəbank”ın verdiyi kreditlərdə də artım müşahidə olunur. Gündəlik biznes kreditlərinin verilməsi həcmi 14,5 faiz artıb. İlin ilk rübündə kiçik və orta biznesin kredit portfelini 12 faiz, mikrokreditləri isə 20 faiz artırmağa müvəffəq olub. Qeyd edək ki, verilmiş kreditlərin 58 faizi ölkə üçün əhəmiyyətli real sektorun kreditləşməsinə yönəldilib.
2021-ci il “Rabitəbank” üçün kart biznesi sahəsində də uğurlu başlanğıc olub. Ötən ilin sonundakı göstərici ilə müqayisədə kart sayları 11 faiz artaraq 164 min təşkil edib. Keşbek kartı olan “Kartmane” debet kartının bu rüb ərzindəki satışı 40 faizdən çox artıb. Bankın kart məhsulunun populyarlaşması nəticəsində bankın plastik kart sahəsindəki gəlirlərində 2020-ci ilin analoji rübü ilə müqayisədə 56 faiz artım müşahidə olunub.
Bütün bank xidmətlərini sürətlə rəqamsal sferada da genişləndirən “Rabitəbank”ın mobil tətbiqi “Rabita Mobile”ın yükləmə sayı 27,2 faiz artaraq 121 minə çatıb. Bu rüb ötən ilin sonu ilə müqayisədə bankın mobil əlavəsi vasitəsilə aparılan kartla əməliyyat dövriyyəsi məbləğ olaraq 73 faiz, say olaraq isə 65 faiz artıb.
“Rabitəbank” ASC Azərbaycanın 16 regionu və Bakı şəhərində 27 xidmət məntəqəsi və 73 ATM-i, “Rabita Mobile” tətbiqi, İnternet Bankçılıq platforması və “RabitaBot” çatbotu, 133 nömrəli Çağrı mərkəzi ilə müştərilərin xidmətindədir.
Bölmənin digər xəbərləri
