"Kəpəz"in legioneri: Derbidə layiqli qələbə qazandıq, növbəti hədəf “Qarabağ”dır
Bakı, 23 yanvar, AZƏRTAC
"Turan Tovuz"la matçda yaxşı oynadıq və qalib gəldik. Düşünürəm ki, qələbəyə layiq idik".
Bu sözləri AZƏRTAC-a açıqlamasında "Kəpəz"in futbolçusu Junior Martins Azərbaycan Premyer Liqasının XIX turunda "Turan Tovuz"a 2:1 hesablı qalib gəldikləri oyunu şərh edərkən deyib.
Qərb derbisində komandasının qələbə qoluna imza atan braziliyalı yarımmüdafiəçi qazanılan 3 xalın önəmli olduğunu bildirib: "Komanda yoldaşlarım çox istəkli mübarizə apardılar. Bütün oyunlarda qalibiyyət əldə etmək üçün çalışırıq. İndi əsas məqsəd Premyer Liqada qalmaqdır. Komandada hər kəs buna can atır".
XX turda "Qarabağ"a qarşı keçirəcəkləri oyuna da toxunan 24 yaşlı vinger bunları söyləyib: "Güclü komandaya qarşı oynayacağıq. Rəqibə hörmətlə yanaşırıq. Ancaq hədəf bu görüşdən də 3 xalla ayrılmaqdır".
Qeyd edək ki, "Kəpəz" hazırda 17 xalla 9-cu pillədə qərarlaşıb.
Bölmənin digər xəbərləri
