Abheet Solomon: Uşaqların sağlamlığını birbaşa şəhər planlaşdırmasına daxil etməliyik
Bakı, 21 may, AZƏRTAC
Mənzil haqqında danışarkən üç əsas ölçüyə baxmalıyıq: təhlükəsiz mənzilə çıxış, adekvat yaşayış şəraiti və ətraf mühit riskləri, o cümlədən iqlim dəyişikliyi. Bu amillər birlikdə insanın həyat boyu inkişafını ana bətnindən yeniyetməlik dövrünə qədər formalaşdırır, onun sağlamlığına, təhsilinə və potensialına təsir göstərir.
AZƏRTAC xəbər verir ki, bunu UNICEF-in ətraf mühit sağlamlığı rəhbəri Abheet Solomon Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “Davamlı mənzil siyasətləri vasitəsilə səhiyyə nəticələrinin gücləndirilməsi: Mənzil və səhiyyə üzrə çoxsektorlu dialoq”da videomüraciəti zamanı deyib.
"Birinci ölçü təhlükəsiz mənzilə çıxışdır. Dünyada milyonlarla uşaq üçün təhlükəsiz ev əlçatmazdır. Bunun səbəbləri yoxsulluq, münaqişələr və sistemlərin zəifliyidir. Ailələr dağılır və uşaqlar qeyri-rəsmi yaşayış məntəqələrinə, məcburi köçkünlüyə və evsizlik reallığına sürüklənirlər. Belə qeyri-sabit şəraitdə uşağın təhsili dayanır, təhlükəsizlik hissi itir və o, həssaslıq dövründən çıxmaqda çətinlik çəkir. İkinci ölçü yaşayış şəraitidir. Qlobal miqyasda 1,5 milyarddan çox insan qeyri-adekvat və dağılmış mənzillərdə yaşayır. Həmin böyük rəqəmin arxasında təmiz su, təhlükəsiz enerji və möhkəm dam kimi əsas ehtiyaclardan məhrum milyonlarla uşaq dayanır. Bu əsas təminatlar olmadıqda, ev xəstəliklərin yayılması üçün təhlükəli mühitə çevrilir. Əgər biz bu əsasları düzəltməsək, bütöv bir nəslin inkişafına zərər vurmuş olarıq. Üçüncü ölçü uşağın ətraf mühitidir. Uşaqlar həm evin daxilində, həm də kənarda görünməyən təhlükələrlə əhatə olunublar. Onlar zəhərli hava, nəqliyyat tüstüsü və yandırılan tullantıların təsirinə məruz qalırlar. Qurğuşunla zəhərlənir, kiflə boğulur və çirklənmiş torpaqda yaşamağa məcbur olurlar. İqlim dəyişikliyi fonunda isə ekstremal istilər və dağıdıcı daşqınlarla üzləşirlər, eyni zamanda, təhlükəsiz yaşıl məkanlardan məhrum olurlar. Beləliklə, mənzil sadəcə sığınacaq deyil. Bu, ictimai sağlamlıq böhranı, sosial bərabərlik məsələsi və uşağın fundamental hüququdur. Həmin vəziyyəti dəyişmək üçün biz daha əlçatan mənzillərə çıxışı genişləndirməli, onları təmiz su, təmiz hava və iqlim qorunması ilə təmin etməliyik. Siyasətlərimizi yenidən nəzərdən keçirməli, uşaqların sağlamlığını birbaşa şəhər planlaşdırmasına daxil etməli və dayanıqlı şəhərləri əsasdan qurmalıyıq. Ən əsası isə həssas və unudulmuş icmaları dəstəkləməliyik".
Bölmənin digər xəbərləri
