ABŞ-da gözlənilən makroiqtisadi göstəricilər fonunda qızılın qiyməti artmaqda davam edir
Bakı, 25 sentyabr, AZƏRTAC
ABŞ iqtisadiyyatı ilə bağlı mühüm statistik məlumatların açıqlanması ərəfəsində qlobal bazarlarda qızılın qiyməti artmaqda davam edir.
AZƏRTAC xəbər verir ki, Nyu-Yorkun “Comex” əmtəə birjasında qızılın unsiyasının dekabr fyuçerslərinin qiyməti 0,5 faiz artaraq 3786,6 dollara çatıb. 2025-ci ilin əvvəlindən bəri bahalaşma təxminən 37 faiz olub.
Sentyabrın 25-də investorlar ABŞ-da cari ilin ikinci rübü üzrə ümumi daxili məhsulun yekun qiymətləndirilməsinin açıqlanacağını gözləyirlər. İlkin hesablamalara görə, ABŞ iqtisadiyyatının illik artımı 3-3,3 faizdir.
Bundan əlavə, sentyabrın 26-da ABŞ-da avqust ayı üzrə əhalinin gəlirləri və xərcləri ilə bağlı hesabat təqdim olunacaq. Bu hesabatda inflyasiya göstəricisi də yer alır ki, bu da ABŞ Federal Ehtiyatlar Sisteminin diqqətlə izlədiyi əsas indikatorudur və onun gələcək faiz siyasətinə birbaşa təsir edir.
Ekspertlərin sözlərinə görə, 2026-cı ilin ortalarınadək qızılın unsiyasının qiyməti 4050–4150 dollara çata bilər.
Bölmənin digər xəbərləri
