ABŞ-ın qanunvericiləri Xocalı faciəsi qurbanlarının xatirəsini yad edəcəklər
Bakı, 14 fevral (AZƏRTAC). ABŞ-ın türk icmasının (Azerbaijan-American Council, Azerbaijan Society of America, Pax Turcica) Xocalı faciəsinin tanınması ilə bağlı keçirdiyi kampaniya çərçivəsində Amerika qanunvericilərindən cavabların daxil olması davam edir.
AZƏRTAC xəbər verir ki, bu günlərdə demokrat-senator Riçard Blumental və konqresmen Luis Sloterdən cavab məktubları gəlmişdir.
1992-ci ildə törədilmiş Xocalı faciəsinə diqqətin cəlb edilməsinə görə təşəkkürünü bildirən senator R.Blumental bu mövzulara dair Amerika qanunvericilik aktlarının yenidən gözdən keçirilməsinə kömək edəcəyini, həmçinin Azərbaycan və erməni xalqları arasında sülhün bərpa edilməsinin bütün mümkün yollarını araşdıracağını vəd etmişdir.
Konqresmen L.Sloter də öz növbəsində, ictimaiyyətin diqqətini Xocalı faciəsinin 21-ci ildönümünə yönəltdiklərinə görə ABŞ-dakı türk diasporunun nümayəndələrinə minnətdarlığının bildirmişdir. O, bu məsələnin Konqresin Nümayəndələr Palatasında müzakirə olunacağı təqdirdə türk icmasının bununla bağlı fikirlərini nəzərə alacağını vəd edərək yazmışdır: “Bu dəhşətli hadisə Dağlıq Qarabağda müharibə dövründə etnik zorakılığın ən qanlı aktı olmuşdur”.
Bölmənin digər xəbərləri
