ABŞ-IN SVERDLOVSKDAKI BAŞ KONSULLUĞU İFTAR SÜFRƏSİ AÇMIŞDIR

16.10.2006 [18:46]
Çap et
A⁺ A^-

AZƏRTAC Müstəqil İslam İnformasiya saytına istinadla xəbər verir ki, ABŞ-ın Rusiyanın Sverdlovsk şəhərindəki baş konsulluğu müqəddəs Ramazan münasibətilə iftar süfrəsi açmışdır. Baş konsul Con Stepançuk iftar süfrəsinə vilayətin müsəlman təşkilatlarının rəhbərlərini, milli diasporların nümayəndələrini və din xadimlərini dəvət etmişdir.

Stepançuk 2001-ci ilin 11 sentyabr hadisələri, İraq və Əfqanıstanda müharibələr, habelə İranla münasibətlərin gərginliyi ilə əlaqədar ABŞ-da islama nifrət barədə jurnalistlərin sualına cavab verərək demişdir ki, onun ölkəsində “xristianlarla müsəlmanlar arasında qarşılıqlı münasibətlərdə problemlər yaranmışdır və biz bunu gizlətmirik. Hökumət dini prinsip üzrə müsəlmanlar barəsində ayrı-seçkiliyə yol verilməməsi üçün əlindən gələni əsirgəmir. Amerika vətəndaşlarının böyük ailəsinə bu və ya digər dərəcədə qoşulan hər bir cəmiyyət və millət buraya öz mədəni irsini, dinini və adət-ənənələrini gətirmişdir. Təxminən 7 milyon nəfər üzvü olan Amerika müsəlman cəmiyyəti də istisna deyildir”.

Baş konsulun sözlərinə görə, müsəlman cəmiyyətinin nəcib hissləri Ramazan günlərində özünü daha parlaq şəkildə büruzə verir.