ABŞ KONQRESİNİN ÜZVLƏRİ BEYNƏLXALQ İCTİMAİYYƏTİ XOCALI FACİƏSİNİ UNUTMAMAĞA ÇAĞIRMIŞLAR
AZƏRTAC-ın xüsusi müxbiri xəbər verir ki, Xocalı faciəsinin ildönümü ABŞ Konqresində də anılmışdır.
Nümayəndələr Palatasında Azərbaycan üzrə işçi qrupunun həmsədri Solomon Ortis və qrupun üzvü Virciniya Foks ölkəmizin tarixinə qanlı hərflərlə yazılan bu faciə ilə bağlı bəyanatlarla çıxış etmişlər.
Qrupun həmsədri, Texas ştatının təmsilçisi, demokrat Solomon Ortis bildirmişdir ki, 1992-ci il fevralın 25-dən 26-na keçən gecə Azərbaycanın Dağlıq Qarabağ bölgəsinin Xocalı şəhəri erməni qüvvələri tərəfindən dağıdılmışdır. Konqresmen həmkarlarına bu hücumun acınacaqlı faktları barədə danışmışdır. O demişdir ki, Xocalıda 613 nəfər qətlə yetirilmişdir. Bunlardan 106-sı qadın, 83-ü uşaq, 56-sı isə xüsusi qəddarlıq və işgəncə ilə öldürülənlərdir. 1275 nəfər əsir götürülmüş, 150 nəfər itkin düşmüş, 487 nəfər, onlardan 76-sı azyaşlı olmaq şərti ilə əlilə çevrilmişdir. 8 ailə tamamilə məhv edilmiş, 25 uşaq hər iki valideynini itirmiş, 130-u isə ən azı bir valideynindən məhrum edilmişdir. Solomon Ortis diqqətə çatdırmışdır ki, Xocalı cinayətinə görə indiyədək heç kim məsuliyyətə cəlb olunmayıb və əfsuslar olsun ki, Dağlıq Qarabağ münaqişəsi hələ də həll edilməmişdir.
Şimali Karolina ştatının Konqresdəki təmsilçisi, respublikaçı xanım Virciniya Foks isə hesab edir ki, Somali, Ruanda, Kamboca, Bosniya və Darfurda baş verən faciəvi hadisələr Konqresin diqqətini cəlb etdiyi halda, 1992-ci ildə Qafqazda baş verənlər barədə xəbərdar olanlar azdır. Xanım Foks demişdir ki, üstündən 16 il keçəndən sonra “Xocalı” sözü Azərbaycan xalqı və bütün bölgə üçün ağrılı və kədərli xatirələrlə bağlıdır. O, ABŞ-ın “Hyman Rayts Votc”, Rusiyanın “Memorial” insan haqları təşkilatlarının hesabatları, həmçinin beynəlxalq KİV-lərin o zaman yazdıqlarına istinad etmişdir. Xanım Foks 1993-cü ilin 29 noyabrında ABŞ hökumətinin yüksək səviyyəli rəsmisinin erməni işğalının nəticələrinə dair “Nyusuik” jurnalındakı aşağıdakı sitatını xatırlatmışdır: “Hazırda gördüklərimiz qarşılarına gələn hər bir kəndin sistematik olaraq dağıdılmasıdır. Bu, barbarlıqdır”.
Solomon Ortis də Xocalı qırğınına ayrıca hal kimi baxmağın tərəfdarı deyil. O, hesab edir ki, burada baş verənlər erməni hərbi qüvvələrinin Dağlıq Qarabağ müharibəsi boyu dağıdıcı əməllərinə xas idi.
Azərbaycan üzrə işçi qrupunun həmsədri Ortis ölkəmizin xarici işlər naziri Elmar Məmmədyarovun bu yaxınlarda “Uol Strit Cornal” qəzetində çap edilən məqaləsinə istinad edərək bildirmişdir ki, Ermənistan ilə Azərbaycan arasında 14 ildir ki, atəşkəs davam etsə də, erməni hərbi qüvvələri hələ də Azərbaycan ərazilərindədir. Sülh danışıqları prosesi tezləşdirilməlidir. Əks təqdirdə, status - kvonun saxlanılması baha başa gələr. Ermənistan-Azərbaycan, Dağlıq Qarabağ münaqişəsinin həlli regional təhlükəsizlik və iqtisadi artımı təmin edərdi.
ABŞ konqresinin üzvləri beynəlxalq ictimaiyyəti Xocalı qırğınına müvafiq münasibət bildirməyə, azərbaycanlılara qoşularaq bu faciəni anmağa çağırmışlar. Onlar vurğulamışlar ki, dünya Xocalı haqqında əsl həqiqətləri bilməli və xatırlamalıdır.
Bölmənin digər xəbərləri
