İQTİSADİYYAT
ABŞ MDB ÖLKƏLƏRİNİN BƏZİLƏRİNƏ YARDIMI AZALDIR, BƏZİLƏRİNƏ İSƏ ARTIRIR
İTAR-TASS-dan AZƏRTAC-a daxil olmuş xəbərdə deyilir ki, ABŞ “Azadlığa Dəstək Aktı” çərçivəsində keçmiş sovet respublikalarına maliyyə yardımını davam etdirmək niyyətindədir. Amma bu, əvvəlki illərdəkinə nisbətən daha az olacaqdır. Prezident Corc Buşun Konqresə təsdiq olunmağa göndərdiyi 2004-cü maliyyə ili (bu il oktyabrın 1-də başlanır) üçün büdcə layihəsində bundan ötrü 576 milyon dollar ayırmaq təklif edilir.
Xatırladaq ki, ABŞ hökuməti ötən il MDB ölkələrinə yardım göstərilməsi üçün 755 milyon dollar ayırmışdı.
Assoşieyted Press agentliyi xəbər verir ki, Birləşmiş Ştatlar hökuməti Rusiya və Ukraynaya yardımı iki dəfə azaltmağı, Azərbaycanın payını 2003-cü ildəki 45 milyon dollardan 41,5 milyon dollara endirməyi qərara almışdır. Büdcə layihəsində Ermənistana yardımı keçən ilki təxminən 80 milyon dollardan 49,5 milyon dollara endirmək nəzərdə tutulur. Təbii ki, öz xislətinə sadiq qalan ermənilər dərhal şivən qopararaq, buna öz etirazlarını bildirmişlər. Amerikanın Erməni Milli Komitəsi xüsusilə böyük hay-küy qaldırmışdır.
Əfqanıstanda əməliyyat zamanı ABŞ-a kömək göstərmiş Orta Asiya respublikaları üçün yardımın artırılması nəzərdə tutulur. Məsələn, Özbəkistan ötən maliyyə ilindəki 31,5 milyon dollar əvəzinə bu dəfə 42 milyon, Qırğızıstan 36 milyon dollar əvəzinə 40 milyon, Tacikistan isə 22,5 milyon dollar əvəzinə 35 milyon dollar alacaqdır.
Bölmənin digər xəbərləri
