Abşeron rayonunda Xocalı soyqırımının 30-cu ildönümü qeyd edilib
Xırdalan, 25 fevral, Ə.Rzayeva, AZƏRTAC
Abşeron rayonunda Xocalı faciəsinin 30-cu ildönümü ilə əlaqədar anım tədbiri keçirilib. Xırdalan şəhərində yerləşən Mədəniyyət Evində baş tutan tədbirdə Abşeron Rayon İcra Hakimiyyətinin başçısı Abdin Fərzəliyev, rayonun hüquq-mühafizə orqanlarının rəhbərləri, YAP Abşeron rayon təşkilatının sədri, Abşeron rayon İdman və Gənclər İdarəsinin rəisi, Xocalı faciəsinin günahsız qurbanlarının yaxınları, şəhid ailələri və qazilər iştirak ediblər.
AZƏRTAC xəbər verir ki, tədbir iştirakçıları əvvəlcə məktəblilər tərəfindən Xocalı faciəsinə həsr olunan rəsm və əl işlərindən ibarət sərgiyə baxış keçiriblər.
Azərbaycanın bütövlüyü uğrunda canından keçmiş şəhidlərimizin və faciə zamanı ermənilərin qətlə yetirdiyi günahsız soydaşlarımızın əziz xatirəsi bir dəqiqəlik sükutla yad edildikdən sonra Xocalı faciəsini özündə əks etdirən qısametrajlı film nümayiş olunub.
Abşeron Rayon İcra Hakimiyyətinin başçısı Abdin Fərzəliyev çıxış edərək bildirib ki, 1992-ci il fevralın 25-dən 26-sına keçən gecə erməni qəsbkarları Azərbaycan xalqına qarşı misli görünməmiş faciə törədiblər. Əliyalın, qoca, uşaq, qadın demədən və sadəcə, azərbaycanlı olduqlarına görə yüzlərlə insan qanına qəltan edilib. Respublikamızdakı ozamankı hakimiyyətin faciəni lazımınca qiymətləndirmədiyini və əsl həqiqətin xalqdan gizlədilməyə çalışıldığını vurğulayan RİH başçısı soyqırımına hüquqi qiymətin yalnız ümummilli lider Heydər Əliyevin ikinci dəfə hakimiyyətə qayıdışından sonra verildiyini tədbir iştirakçılarının diqqətinə çatdırıb. Ulu Öndərin sayəsində ermənilərin Azərbaycan xalqına qarşı törətdikləri qanlı qətliam soyqırımı faktı kimi təsbit olunub.
RİH başçısı bildirib ki, əsası ümummilli lider Heydər Əliyev tərəfindən qoyulan siyasətin Azərbaycan Respublikasının Prezidenti İlham Əliyev tərəfindən uğurla davam etdirilməsi və Birinci vitse-prezident Mehriban xanım Əliyevanın rəhbərliyi ilə Heydər Əliyev Fondu tərəfindən həyata keçirilən layihələr nəticəsində Azərbaycan həqiqətləri dünya ictimaiyyətinə çatdırılır və bir çox dövlətlər tərəfindən Xocalıda baş verənləri soyqırımı kimi tanıyır.
Xocalı faciəsinin günahsız qurbanlarının və ölkəmizin bütövlüyü uğrunda canlarını fəda edən şəhidlərimizin qanının yerdə qalmadığını, onların qisasının döyüş meydanında alındığını qeyd edən RİH başçısı bildirib ki, Müzəffər Ali Baş Komandan İlham Əliyevin rəhbərliyi altında yenilməz Ordumuz Vətən müharibəsində cəmi 44 günə erməni qəsbkarlarını məğlubiyyətə uğradıb və 30 il düşmən əsarətində qalan torpaqlarımızı işğaldan azad edib.
Daha sonra Abşeron Rayon Ağsaqqallar Şurasının sədri Nadir Ağayev, Yeni Azərbaycan Partiyasının Abşeron rayon təşkilatının sədri Abbas Əliyev və Xocalı sakini Brilyant Hacıyeva çıxış edərək Xocalı faciəsinin acı nəticələrindən, ermənilərin tarix boyu azərbaycanlılara qarşı yeritdikləri soyqırımı siyasətindən danışıb, gəncləri bu faciələri unutmamağa və Azərbaycan həqiqətlərinin dünyaya çatdırılmasında səylərini artırmağa çağırıblar.
Sonda Abşeron Mədəniyyət Evinin incəsənət nümayəndələrinin hazırladığı və Xocalı soyqırımını özündə ehtiva edən bədii kompozisiya nümayiş etdirilib.
Bölmənin digər xəbərləri
