AFFA könüllülük proqramına qeydiyyata start verib
Bakı, 16 mart, AZƏRTAC
Mayın 5-dən 21-dək Bakıda keçiriləcək 17 yaşadək futbolçular arasında Avropa çempionatının final mərhələsində könüllülərin xidmətindən istifadə olunacaq.
AZƏRTAC xəbər verir ki, AFFA bu turnir üçün könüllülərin cəlb olunması prosesinə start verib. Bu mötəbər yarış zamanı 800 könüllünün cəlb edilməsi nəzərdə tutulub. Könüllülərin fəaliyyət sahələrinə biletlərin yoxlanılması, media, protokol, marketinq, akkreditasiya, qonaqpərvərlik, tibb, nəqliyyat və s. aiddir.
Bu proqrama qoşulmaq istəyənlər əvvəl qeydiyyatdan keçməlidirlər. Qeydiyyatdan keçənlər apreldə müsahibəyə dəvət ediləcəklər. AFFA tərəfindən “AVRO-2016”da könüllü kimi iştiraka qəbul ediləcək gənclərin daha da hazırlıqlı və məlumatlı olması üçün çempionatdan əvvəl stadionlarda təlimlər keçiriləcək. Yerli və xarici şəxslərdən formalaşacaq 800 nəfərlik könüllü komandasına qoşulmaq üçün ərizə qəbulu martın 30-dək davam edəcək.
Bölmənin digər xəbərləri
