AĞCABƏDİDƏ YARDIMÇI STANSİYA GƏRGİNLİK XƏTLƏRİNƏ QOŞULMUŞDUR
Məlum olduğu kimi, ötən ay “Azərenerji”nin və Almaniyanın “Siemens” firmasının mütəxəssisləri Ağcabədi rayonunda yeni tikilmiş yardımçı stansiyada son sazlama işləri aparmışlar.
“Azərenerji” ASC-dən AZƏRTAC-a bildirmişlər ki, ikinci kommunikasiyalar tam quraşdırıldıqdan, sazlama işləri başa çatdırıldıqdan və transformatora yağ doldurulduqdan sonra 330 kilovoltluq elektrik xəttinə gərginlik verilmişdir. Mütəxəssislərin fikrincə, stansiyanın gərginlik xəttinə qoşulması zamanı problem yaranmamışdır və transformator martın 12-də istifadəyə veriləcəkdir. Fevralın əvvəllərində Ağcabədiyə gətirilmiş 280 meqavat gücündə avtotransformator “Azərenerji”nin sifarişi ilə “Siemens”in Xorvatiyadakı zavodunda istehsal olunmuşdur.
Yeni yardımçı stansiyanın sınaq buraxılışı Ağdam, Bərdə, Yevlax istiqamətindəki elektirk xətlərini işə salmağa imkan vermişdir. Bununla da “Azərenerji”nin elektrik enerjisini respublikanın mərkəzi və cənub-qərb rayonlarına daha səmərəli ötürmək imkanları genişlənir.
Bölmənin digər xəbərləri
