AĞDAMDA UĞURLAR VƏ İNKİŞAFLA YANAŞI PROBLEMLƏR DƏ VAR
Müşavirə iştirakçıları əvvəlcə ümummilli liderimiz Heydər Əliyevin xatirəsinə Quzanlı kəndində ucaldılmış abidənin önünə əklil, gül-çiçək dəstələri qoymuş, ulu öndərin xatirəsini dərin ehtiramla yad etmişlər. Sonra müşavirə öz işini davam etdirmiş, rayon icra hakimiyyətinin başçısı Həsən Sarıyevin 2005-ci ildə görülən işlərə dair hesabat məruzəsi dinlənilmişdir.
Natiq demişdir ki, ərazisinin 70 faizindən çoxu on üç il əvvəl erməni silahlı birləşmələri tərəfindən işğal olunsa da rayonun əhalisi ən çətin məqamlarda dövlət və dövlətçiliyə sədaqət nümayiş etdirmiş, inamını itirməmiş, sosial-iqtisadi, mədəni quruculuq, ictimai-siyasi və digər sahələrdə fərqlənmişdir. Ümummilli liderimiz Heydər Əliyevin siyasi kursunun layiqli davamçısı İlham Əliyevin “Azərbaycan Respublikasında sosial-iqtisadi inkişafın sürətləndirilməsi tədbirləri haqqında” və “Azərbaycan Respublikası regionlarının sosial-iqtisadi inkişafı Dövlət Proqramı” (2004-2008-ci illər) haqqında” fərmanlarından irəli gələn vəzifələr rayonumuzda uğurla həyata keçirilir. 2005-ci ildə kənd təsərrüfatı, sənaye, tikinti, abadlıq və digər sahələrdə yüksək göstəricilər qazanılmışdır. Pambıq istehsalı əvvəlki ilə nisbətən 2 dəfə, tərəvəz istehsalı 14,6 faiz, meyvə istehsalı 13,3 faiz, kartof istehsalı 2,8 faiz artmış, 5.012 ton pambıq, 9.225 ton kartof, 31.679 ton tərəvəz, 1.727 ton meyvə istehsal olunmuşdur. Heyvandarlıq sahəsində də dinamik inkişafa nail olunmuşdur. Ötən il qaramalın sayı artaraq 29.055 başa, davarın sayı 104742 başa çatdırılmış, 2210 ton ət, 20.413 ton süd istehsal edilmişdir.
Rayonumuzda qaçqın və məcburi köçkünlərin yaşayış şəraitini yaxşılaşdırmaq məqsədi ilə görülən işlər 2005-ci ildə də davam etdirilmişdir. Azərbaycan Prezidenti İlham Əliyevin 2004-cü il 1 iyul tarixli Sərəncamı ilə təsdiq edilmiş “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı”na uyğun olaraq rayonumuzun ərazisinə 3860 məcburi köçkün ailəsinin köçürülməsi nəzərdə tutulmuşdur. Rayonda salınacaq 12 qəsəbədən 4-də inşaat işləri başa çatdırılıb, bütün sosial-texniki infrastrukturu istifadəyə verilib. Bərdə və Ağcabədi rayonlarındakı çadır şəhərciklərində və Bərdədəki dəmir yolu üzərindəki yük vaqonlarında məskunlaşmış 700-dən çox ailə həmin qəsəbələrə köçürülüb. Yaxın vaxtlarda istifadəyə hazır olan Səfərli qəsəbəsinə də əhalinin köçürülməsinə başlanacaqdır. Köçkün qəsəbələrinin salınması üçün 762 hektar torpaq sahəsi ayrılmışdır. Respublikamızın 50-dən çox rayonuna səpələnmiş ağdamlı məcburi köçkünlərin həyat şəraitinin yaxşılaşdırılması üçün dövlət tərəfindən ötən on üç il ərzində ardıcıl və məqsədyönlü tədbirlər həyata keçirilib.
Müşavirədə qeyd olunmuşdur ki, Prezident İlham Əliyevin qaçqın və məcburi köçkünlərə dair siyasətinin əsası xalqımızın böyük oğlu, dünya şöhrətli siyasi xadim Heydər Əliyev tərəfindən qoyulub. 2002-ci ildə ümummilli liderimiz Heydər Əliyevin Fərmanına uyğun olaraq 500 evdən ibarət 4 qəsəbə salınmışdır. Həmin qəsəbələrdə təhsil, səhiyyə, ticarət, məişət və digər obyektlər fəaliyyət göstərir.
Son vaxtlar rayonda yeni istehsal sahələri yaradılmış, fəaliyyəti dayanmış müəssisələrdə proses bərpa olunmuşdur. İki pambıq, bir üzüm açıq səhmdar cəmiyyəti, meliorasiya və suvarma sistemləri idarəsi, subartezian quyularının istismarı idarəsi, 34 kəndli-fermer təsərrüfatı, 220 fiziki şəxs və kiçik müəssisə aqrar islahatların həyata keçirilməsi ilə məşğul olur. 11 təsərrüfatın 8-də torpaq islahatı başa çatdırılıb. Rayonda aparılan aqrar islahatla bağlı 15715 hektar torpaq sahəsi 8070 nəfər mülkiyyətçiyə verilib. Ərazidə məskunlaşmış qaçqın və məcburi köçkünlərin kənd təsərrüfatı ilə məşğul olmaları üçün 1500 hektar torpaq sahəsi ayrılıb.
Hesabat dövrü ərzində rayon əhalisinin içməli və suvarma suyu ilə təchizatı məqsədi ilə 7 kənddə 8 subartezian quyusu qazılmış, quyularda 49 ədəd təzə nasos quraşdırılmış, 430 ədəd nasos əsaslı təmir olunmuşdur.
Regionların sosial-iqtisadi inkişafı Dövlət Proqramının icrası baxımından 2005-ci il Ağdam rayonu üçün tərəqqi və quruculuq ili olmuşdur. Təhsil, səhiyyə və rabitənin inkişafında da nəzərəçarpacaq nailiyyətlər qazanılmışdır. Ötən il Çullu kəndində 300 yerlik, Bənövşələr qəsəbəsində 190 yerlik, “Alıbəyli-1”, “Alıbəyli-2” qəsəbələrinin hər birində 96 yerlik məktəb binaları tikilib istifadəyə verilmiş, 10-a yaxın məktəbdə əsaslı və cari təmir aparılmışdır. Bakıda fəaliyyət göstərən 32 nömrəli Ağdam köçkün orta məktəbi Heydər Əliyev Fondunun himayəsindədir. 81 nömrəli məktəb Heydər Əliyev Fondunun vəsaiti hesabına təmir edilmiş, müasir avadanlıqlarla təchiz olunmuşdur. Ağdamlılar göstərdiyi diqqət və qayğıya görə Fondun prezidenti, YUNESKO-nun xoşməramlı səfiri, Milli Məclisin deputatı Mehriban xanım Əliyevaya dərin minnətdarlıqlarını bildirirlər.
Hesabat ilində tibb müəssisələrinin şəbəkəsi genişləndirilmiş, Quzanlı kənd xəstəxanasında 9 həkim kabineti yenidən qurulmuş, müasir tibb avadanlığı ilə təchiz edilmişdir. Rentgen kabineti, elektrokardioqraf (EKQ) və digər avadanlıq xəstəxanaların istifadəsinə verilmişdir. Rayon mərkəzi xəstəxanasına iki təcili yardım maşını alınmışdır.
Ötən il iki konserv sexi inşa edilmiş, Xaçın çayı hövzəsində sutkalıq istehsal gücü 75 ton olan qum-çınqıl sexi fəaliyyətə başlamışdır. Burada 20 nəfər işlə təmin olunmuşdur.
Regionların sosial-iqtisadi inkişafı Dövlət Proqramının icrası ilə bağlı 923 nəfər daimi, 1642 nəfər mövsümi işlərə cəlb edilmişdir. Ötən il isə rayonda 353 daimi, 1037 mövsümi iş yeri yaradılmışdır.
Müşavirədə hesabat ilində yol verilmiş nöqsanlar təhlil edilmiş, onların aradan qaldırılması üçün konkret təkliflər verilmişdir.
Müzakirələrdə rayon prokuroru Tahir Vəliyev, təhsil şöbəsinin müdiri Elmira Şükürova, maliyyə şöbəsinin müdiri Böyükağa Əhmədov, Əhmədağalı kənd bələdiyyəsinin sədri Eldar Qasımov, paylayıcı elektrik şəbəkəsinin müdiri Yusif Həşimov, Bənövşələr qəsəbə məktəbinin direktoru Tünzalə Vəliməmmədova çıxış etmişlər.
Sonda Prezident İlham Əliyevə müraciət qəbul olunmuşdur.
Müşavirənin işində daxili işlər naziri Ramil Usubov, Prezidentin İcra Aparatının məsul işçisi Mirzə Novruzov, Milli Məclisin deputatı Bəxtiyar Əliyev iştirak etmişlər.
Bölmənin digər xəbərləri
