AĞSU RAYONUNUN TORPAQ MÜLKİYYƏTÇİLƏRİ PAYIZ ƏKİNİNƏ HAZIRLAŞIRLAR
Ağsu rayonunda payız əkininə ciddi hazırlıq görülür. Rayon icra hakimiyyətinin aqrar şöbəsində AZƏRTAC-ın müxbirinə bildirmişlər ki, hazırda bütün ərazi vahidlərində şum qaldırılır, keyfiyyətli toxum tədarük edilir. Bu dəfə 28 min hektardan çox sahədə payız əkini keçiriləcəkdir ki, bunun da 26 min hektarına taxıl səpiləcəkdir. İndi hər gün sahələrə 30-35 şum traktoru çıxarılır. Bunlardan 20-si Rusiya Federasiyasında və Çində istehsal olunmuş yeni texnikadır. Cari ildə yaradılmış Aqroservis əkinə hazırlıq işlərində kənd əməkçilərinə hərtərəfli kömək göstərir. Şum altına vermək üçün rayona 100 ton superfosfat gübrəsi gətirilib fermerlərə paylanmışdır.
Əkində əsasən akademik Cəlal Əliyevin “Qiymətli”, “Bərəkətli” taxıl sortlarından istifadə ediləcəkdir. Bu məqsədlə kifayət qədər yüksək reproduksiyalı toxum tədarük edilmişdir. Rayonun ən çox taxıl əkilən Bozavand, Kəndoba, Padar, Bico və digər kəndlərinin ərazilərində səpinə hazırlıq işləri başa çatmaq üzrədir.
Bölmənin digər xəbərləri
