Akademik Valeri Asatiani: Ölkələrimiz arasında mədəni əlaqələrin inkişafında tarixi şəxsiyyətlərin rolu böyükdür
Tbilisi, 10 fevral, AZƏRTAC
Gürcüstan ilə Azərbaycan arasında bütün sahələrdə, o cümlədən mədəniyyət sahəsində çox gözəl münasibətlər var. Strateji tərəfdaşlıq səviyyəsinə yüksəlmiş bu münasibətlər təkcə Cənubi Qafqazda deyil, dünyada nümunədir.
Bu sözləri AZƏRTAC-a müsahibəsində Gürcüstan Elmlər Akademiyasının həqiqi üzvü, Albert Şnayder adına Beynəlxalq Sülh mükafatı laureatı, Gürcüstanın sabiq mədəniyyət naziri Valeri Asatiani söyləyib. Onun sözlərinə görə, ölkələrimiz arasındakı əlaqələrin bütün sahələrdə, eləcə də mədəniyyət sahəsində belə yüksək səviyyədə inkişafında tarixi şəxsiyyətlər Azərbaycan xalqının Ümummilli Lideri Heydər Əliyevin və Eduard Şevardnadzenin böyük rolu olub: “Yadımdadır, dahi tarixi şəxsiyyət Heydər Əliyev Gürcüstana rəsmi səfərə gələndə təkcə siyasətdən və iqtisadiyyatdan danışmadı. O zaman mən mədəniyyət naziri idim. Heydər Əliyev məni yanına dəvət etdi və biz mədəni əlaqələrimiz barədə xeyli söhbət etdik. O dedi ki, ölkələr arasında əlaqələrin inkişafı üçün təkcə siyasət və iqtisadiyyat bəs eləmir. Mədəniyyət sahəsində də əlaqələrə fikir vermək lazımdır. Mədəniyyət xadimləri də gərək bu işdə yaxından iştirak etsinlər. Mən razılığımı bildirdim və minnətdarlıq etdim. Ondan sonra biz Polad Bülbüloğlu ilə birgə xeyli çalışdıq. Biz çox iş gördük və sevinirəm ki, əməyimiz hədər getmədi. Sevindirici haldır ki, bu iki dahi şəxsiyyətin əsasını qoyduqları dostluq və qardaşlıq münasibətlərini bu gün Azərbaycan Prezidenti İlham Əliyev və Gürcüstan rəsmiləri uğurla davam etdirirlər. Biz bunun əyani sübutunu bütün sahələrdə görürük”.
Akademik deyir ki, mədəni əlaqələrin inkişafında mədəniyyət xadimlərinin rolu, həqiqətən də, danılmazdır. Belə insanlardan biri də bu günlərdə 80 illik yubileyi qeyd olunan Azərbaycanın Milli Məclisin deputatı, sabiq mədəniyyət naziri, Xalq artisti və mənim əziz dostum Polad Bülbüloğludur: “Mən fürsətdən istifadə edərək əziz dostumu yubileyi münasibətilə təbrik edirəm. Bilirsiniz ki, Poladın həyatının müəyyən bir hissəsi Gürcüstanla bağlıdır. Poladın atası məşhur musiqiçi, SSRİ Xalq artisti Murtuza Məşədi Rza oğlu Məmmədovun da həyatının bir hissəsi Gürcüstanla bağlıdır. Tbilisinin mərkəzindəki Qorqasali küçəsində, M.F.Axundzadə adına Azərbaycan Mədəniyyəti Mərkəzinin qarşısında Bülbülün büstü qoyulub. Polad isə Tbilisinin fəxri vətəndaşı seçilib. Bu bağlılıq ölkələrimiz arasında mədəni əlaqələrin inkişafında mühüm rol oynayıb”.
V.Asatiani bildirib ki, Azərbaycan mədəniyyət ustalarına Gürcüstanda böyük maraq var. Bu günə qədər Azərbaycan rəssamlarının, heykəltaraşlarının, müğənni və bəstəkarlarının yaradıcılıq və xatirə gecələri, sərgiləri təşkil olunub. Bakıda da belə tədbirlərin təşkili bizim münasibətlərimizin hansı səviyyədə olduğunu sübut edir.
“Amma biz bununla kifayətlənməməliyik, qarşıda hələ görüləsi çox işlərimiz var. İnanıram ki, indiki və gələcək nəsillər də bu işdə fəal olacaqlar və bizim dostluğumuz, qardaşlığımız bundan sonra daha da möhkəmlənəcək və inkişaf edəcək”, – deyə V.Asatiani vurğulayıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
