Akademik Zərifə Əliyeva adına Lisey uğurlarını artırır
Bakı, 9 iyul, İbrahim Əsədov, AZƏRTAC
2014-2015-ci tədris ilində Akademik Zərifə Əliyeva adına Liseyin XI sinfini 161 şagird bitirib.
Bu barədə AZƏRTAC-a liseyin direktoru, əməkdar müəllim Mehriban Vəliyeva məlumat verib. Direktor qeyd edib ki, məktəbi bitirən şagirdlərdən 83-ü Azərbaycan bölməsində, 78-i isə rus bölməsində təhsil alıb.
Liseydə qazanılan uğurlar barədə danışan M.Vəliyeva bildirib ki, bu ilin fevralında keçirilən “Sabahın alimləri” IV Respublika müsabiqəsində liseyin şagirdləri 15 layihə ilə iştirak edib. Layihələrdən ikisi birinci, üçü ikinci, beşi üçüncü yeri tutub.
Müsabiqədə layihəsi birinci yerə layiq görülmüş şagirdlər Nigar Sərdarlı və Mədət Sərdarlı ABŞ-da keçirilən elm və mühəndislik sərgisində iştirak ediblər.
“Sabahın alimləri” müsabiqəsi hər il ABŞ-da 70-dən artıq ölkənin şagirdlərinin iştirakı ilə keçirilən İntel ISEF - Beynəlxalq Elm və Mühəndislik Sərgisi çərçivəsində təşkil edilir.
Direktor məktəblilərin digər müsabiqə və fənn olimpiadalarında da uğur qazandıqlarını bildirib.
Bölmənin digər xəbərləri
